ખુશખબર / રાજ્ય સરકારના કર્મચારીઓ માટે ખુશખબર, રક્ષાબંધન પર્વે નાયબ મુખ્યમંત્રી કરી મોટી જાહેરાત

નાયબ મુખ્યમંત્રીએ જણાવ્યું હતું કે, રાજ્યના નિગમ, બોર્ડ, કોર્પોરેશન અધિકારી, કર્મચારીઓને આ ગ્રેચ્યૂઇટીનો લાભ મળશે. જેમાં પેન્શન અને ગ્રેચ્યૂઇટી એક્ટ હેઠળ ભારત સરકારે સરકારી કર્મચારીઓ અને અધિકારીને રૂપિયા 10 લાખની મર્યાદામાં મળવાપાત્ર ગ્રેચ્યૂઇટીની રકમમાં વધારો કરીને રૂપિયા 20 લાખ ચુકવવાનો નિર્ણય કર્યો છે.

10 કરોડનો ભારણ થશે

વધુમાં નાયબ મુખ્યમંત્રીએ જણાવ્યું હતું કે, રાજ્ય સરકારે ગુજરાત ઔદ્યોગિક વિકાસ નિગમ લી. અને ગુજરાત ઉર્જા વિકાસ એન્જસી દ્વારા મળેલી દરખાસ્તને મંજૂરી આપી GIDC અને GEDAના કર્મચારીઓને રૂ.10 લાખની મર્યાદાના બદલે રૂ.20 લાખની મર્યાદામાં ગ્રેચ્યૂઇટી આપવાનો નિર્ણય કર્યો છે. રાજ્યના અન્ય બોર્ડ, નિગમ, કોર્પોરેશનના કર્મચારીઓના કિસ્સામાં પણ રૂપિયા 20 લાખની મર્યાદામાં ગ્રેચ્યૂઇટી ચુકવવાનો રાજ્ય સરકાર નિર્ણય કરશે. જેને લઇને ગુજરાત ઔદ્યોગિક વિકાસ નિગમ લી. અંદાજિત રૂપિયા 10 કરોડનું નાણાકીય ભારણ થેશે, જ્યારે ગુજરાત ઉર્જા વિકાસ એજન્સીને રૂપિયા 82 લાખનું નાણાકીય ભારણ થશે.

મેડિકલના વિદ્યાર્થીઓને રાહત

રાજ્યના નાયબ મુખ્યમંત્રી નીતિન પટેલે અન્ય કેટલીક પણ જાહેરાતો કરી હતી. જેમાં મેડિકલ ક્ષેત્રના વિદ્યાર્થીઓ માટે ગુજરાત સરકારે મોટી જાહેરાત કરી હતી. અત્યાર સુધી મેડિકલના વિદ્યાર્થીઓએ ડિગ્રી મેળવ્યા બાદ 3 વર્ષ સુધી ગામ્ય વિસ્તારમાં સેવા આપવી પડતી હતી. પરંતુ હવે આ સમય મર્યાદા ઘટાડી અને 3 વર્ષની જગ્યાએ 1 વર્ષ કરી દેવાઇ છે. ડિગ્રી મેળવ્યા બાદ 5 લાખના બોન્ડ ભરવાનો જે નિયમ હતો તેમાં કોઇ ફેરફાર નથી કરાયો. જો કે વિદ્યાર્થીઓએ હવે 15 લાખની વધુ ગેરંટી આપવી પડશે અને જો 1 વર્ષ ગ્રામ્ય વિસ્તારમાં સેવા ન કરી તો 20 લાખ જપ્ત થઇ જશે.