રાજ્યમાં કોરોના વાયરસે હાહાકાર મચાવ્યો છે, તો અમદાવાદમાં સૌથી વધુ કેસ કોરોના વાયરસના નોંધાયા છે ત્યારે આજરોજ રાજ્યના નાયબ મુખ્યમંત્રી નીતિન પટેલે રાજ્ય સરકારના વધુ એક આર્થિક રાહત પેકેજને લઇને મોટું નિવેદન આપ્યું હતું.
Dy CM નીતિન પટેલનું નિવેદન
રાજ્ય સરકાર ટૂંક સમયમાં જાહેર કરી શકે છે રાહત પેકેજ
કોંગ્રેસ પર નીતિન પટેલે કર્યા પ્રહાર
નાયબ મુખ્યમંત્રી નીતિન પટેલે જણાવ્યું હતું કે, ટૂંક સમયમાં રાજ્ય સરકાર વધુ એક આર્થિક રાહત પેકેજ જાહેર કરશે. હાલ આર્થિક રાહત પેકેજને આખરી ઓપ આપવામાં આવી રહ્યો છે તો આત્મનિર્ભર ગુજરાત માટે બેંકોને પણ સહાય કરવામાં આવશે તેવી વાત કરી હતી.
રાજ્યની આવકમાં થયો ઘટાડો
આ સાથે જ તેમણે જણાવ્યું હતું કે, કોરોનાને કારણે કરવામાં આવેલ લૉકડાઉનથી રાજ્ય સરકારની આવકમાં ઘટાડો થયો છે આ સાથે રાજ્ય અને કેન્દ્રની GSTની આવક ઓછી થઇ છે.
રાજ્યમાં શૈક્ષણિક સંકૂલો શરૂ કરવા અંગે DyCM નીતિન પટેલનું નિવેદન
રાજ્યમાં શાળા-કોલેજ શરૂ કરવાને લઇને રાજ્યના નાયબ મુખ્યમંત્રીએ જણાવ્યું હતું કે, વિદ્યાર્થીઓનું શિક્ષણકાર્ય નિયમિત ચાલે તે જરૂરી છે, શૈક્ષણિક સત્ર શરૂ કરવા અંગે કેન્દ્રએ માર્ગદર્શન આપ્યુ છે તે પ્રમાણે કોરોનાની રાજ્યમાં સ્થિતિને જોઇને રાજ્ય સરકાર-શિક્ષણ વિભાગ સાથે મળીને નિર્ણય કરશે. આ સાથે જ રાજ્યમાં ડિજીટલ શિક્ષણ આપવા પર મહત્વ મુકાશે.
નાયબ મુખ્યમંત્રીએ કોંગ્રેસ પર કર્યો કટાક્ષ
કોંગ્રેસના 2 MLAના રાજીનામા પર નીતિન પટેલે કોંગ્રેસ પર કટાક્ષ કરતા જણાવ્યું હતું કે, હાલ કોંગ્રેસ પોતે વેન્ટિલેટર પર છે એટલે તેને વેન્ટિલેટર યાદ આવે તે સ્વાભાવિક છે. આ સાથે જ કોંગ્રેસના ધારાસભ્યોમાં અસંતોષ છે તો નેતાઓ વધુ અને કાર્યકર્તાઓ ઓછા છે. ત્યારે ભવિષ્યમાં કોંગ્રેસમાંથી વધુ લોકો છૂટા પડશે.
પેટ્રોલ-ડીઝલના વેટમાં વધારાના સંકેત
નાયબ મુખ્યમંત્રી નીતિન પટેલે પેટ્રોલ-ડીઝલના વેટમાં વધારો થવા અંગેના સંકેત આપ્યા હતા. તેમણે જણાવ્યું હતું કે, અન્ય રાજ્યોની સરખામણીમાં ગુજરાતમાં વેટનો દર ઓછો છે. ત્યારે આગામી સમયગાળામાં પેટ્રોલ-ડીઝલના વેટ વધારવા અંગે સરકારમાં વિચારણા ચાલી રહી છે. ત્યારે આ અંગે પણ નિર્ણય લેવાઇ શકે છે.