મેઘો મંડાયો / દ્વારકાના ભાણવડ અને વલસાડના ઉમરગામમાં આભ ફાટ્યા જેવી સ્થિતિ, 2 કલાકમાં 7 ઇંચ વરસાદ ખાબક્યો

• વલસાડમાં 2 કલાકમાં 7 ઇંચથી વધુ વરસાદ ખાબક્યો
• ઉમરગામમાં પણ 2 કલાકમાં 7 ઇંચ વરસાદ ખાબક્યો
• રાજ્યમાં 2 દિવસ વરસાદની આગાહીથી તંત્ર એલર્ટ

રાજ્યમાં હવામાન વિભાગની વરસાદની આગાહી વચ્ચે ભાણવડના ગૂંદા ગામે આભ ફાટ્યા જેવી સ્થિતિ ઉભી થઇ હતી. તોફાની વરસાદે ગામની ચારે તરફ પાણી પાણી કરી દીધા હતા. અહીં કલાકોમાં જ 7 ઇંચ જેટલો વરસાદ ખાબકતા ગામ ફરતે પાણીના પુર જેવી સ્થિતિ સર્જાઇ છે. તોફાની વરસાદે ગામમાંથી પુર વહેતા થયા છે. મેઘરાજાની તોફાની બેટિંગના કારણે ગામમાં પુર જેવી સ્થિતિ જોવા મળી છે. 7 ઇંચ વરસાદથી ગામમાં નીચાણવાળા વિસ્તારોમાં પાણી ભરાયા હતા. ભાણવડમાં ભારે વરસાદથી ડેમો ઓવરફ્લો થયા છે. વર્તુ 2 ડેમના 6 દરવાજા 4 ફૂટ સુધી ખોલાયા છે. ડેમના નિચાણવાળા વિસ્તારોને એલર્ટ કરાયા છે.

ઉમરગામમાં 2 કલાકમાં 7 ઇંચ વરસાદ ખાબક્યો

તો બીજી તરફ વલસાડ જિલ્લાના ઉમરગામમાં બારે મેઘ ખાંગા થયા છે. બે કલાકમાં 7 ઇંચ વરસાદ ખાબક્યો હતો. સાંજે 6 વાગ્યાથી 8 વાગ્યા સુધીમાં ઉમરગામમાં 7.2 ઇંચ વરસાદ ખાબક્યો હતો. મુશળધાર વરસાદથી ઉમરગામના અનેક વિસ્તારોમાં પાણી ભરાયા છે. જેમાં ઉમરગામના સ્ટેશન રોડ, ગાંધીવાડી, જીઆઇડીસી કોલોની સહિતના વિસ્તારોમાં પાણી ભરાયા છે. જાહેર રસ્તાઓ પર ઢીચણ સુધી પાણી ભરાયા છે. રાહદારીઓ અને વાહનચાલકોને ભારે મુશ્કેલીનો સામનો કરવો પડી રહ્યો છે. કેટલાક નીચાણવાળા વિસ્તારોમાં લોકોના ઘર સુધી પાણી ઘૂસ્યા છે. ઉમરગામમાં 2 કલાકમાં 7 ઇંચ વરસાદ ખાબકતા જનજીવન ખોરવાયું છે. કપરાડામાં પણ વરસાદ પડ્યો હતો.

કુતિયાણા તાલુકામાં અંદાજીત 5 ઈંચ જેટલો વરસાદ

તો પોરબંદર જિલ્લામાં કુતિયાણા તાલુકામાં ભારે વરસાદ થયો છે. કુતિયાણા તાલુકામાં અંદાજીત 5 ઈંચ જેટલો વરસાદ થયો છે. ભારે વરસાદના કારણે કુતિયાણાથી દેવળા જતા રસ્તા પર પાણી ફરી વળ્યાં છે. રસ્તા પર પાણી ફરી વળતા રસ્તાને બંધ કરવામાં આવ્યો છે. કુતિયાણાથી દેવળા જતો આ રસ્તો 8 ગામોને જોડે છે. છેલ્લી 2 કલાકથી આ રસ્તો બંધ થતા લોકોને ભારે મુશ્કેલી થઇ રહી છે.

રાજ્યમાં 2 દિવસ વરસાદની આગાહીથી તંત્ર એલર્ટ

રાજ્યમાં 2 દિવસ વરસાદની આગાહીથી તંત્ર એલર્ટ થઇ ગયું છે. જિલ્લા વહિવટી તંત્રને અલર્ટ રહેવા ગાંધીનગરથી સૂચન કરાયું છે. એનડીઆરએફની દક્ષિણ ગુજરાતમાં 3 અને અન્ય સ્પોટ પર 6 ટીમ અલર્ટ છે. દક્ષિણ ગુજરાતમાં નદી કાંઠા વિસ્તારોમાં અલર્ટ જાહેર કરી દેવાયું છે. ઉપરવાસમાં વરસાદના કારણે સેન્ટ્રલ વોટર કમિશન અલર્ટ છે.