રાજ્યમાં મહિલાઓ અને બાળકીઓ પર દુષ્કર્મની ઘટનાઓ વધી રહી છે. રોજબરોજ દુષ્કર્મના કેસ સામે આવી રહ્યા છે. સગીરા હોય કે પછી મહિલા, સુરક્ષાને લઇને સવાલો ઉઠી રહ્યા છે. એક તરફ સરજાહેરમાં પ્રેમમાં પાગલ સનકી હત્યા કરી નાંખે છે તો બીજી તરફ છેડતીના પણ બનાવો વધી રહ્યા છે. ગુજરાત પોલીસ દ્વારા આવા નરાધમોને કડકમાં કડક સજા કરે અને રાજ્યમાં દાખલો બેસાડવો જોઇએ કે ફરીવાર આવી કોઇ ઘટના ન બને. ત્યારે આજે રાજ્યમાં દુષ્કર્મના બે કેસ નોંધાયા.
મહિલા PSI પર દુષ્કર્મ
પોલીસ તો લોકોને કાયદાનું ભાન કરાવે, ભૂલ કરનારને દંડ કરે. અરે પોલીસના હાથમાં જ કાયદો અને વ્યવસ્થા હોય છે ત્યારે ભાવનગરમાં તો મહિલા પોલીસ પણ અસુરક્ષિત હોવાનું સામે આવ્યુ. ભાવનગરમાં મહિલા PSI પર દુષ્કર્મ થયાની ફરિયાદ નોંધાઇ. મહિલા PSI પર અન્ય જિલ્લાના PSIએ દુષ્કર્મ આચર્યાની ફરિયાદ નોંધાતા ચકચાર મચી. જો કે મહિલા PSIએ બી-ડિવિઝનમાં પોલીસ ફરિયાદ નોંધાવતા તપાસના ચક્રોગતિમાન કર્યા છે. PSIએ ઘરમાં ઘૂસી 5 લાખની લૂંટ ચલાવી હોવાની પણ ફરિયાદ નોંધાવતા આ મામલે સી-ડિવિઝન પોલીસને તપાસ સોંપાઈ છે.
દ્વારકામાં બાળકી પર દુષ્કર્મ
યાત્રાધામ દ્વારકા ફરી શર્મશાર થયું. દ્વારકામાં 7 વર્ષની બાળકી પર દુષ્કર્મ આચર્યુ હોવાનું સામે આવ્યુ છે. ટયુશન ક્લાસિસ અને આરોપીના ઘરે બાળકી પર લંપટોએ સૃષ્ટિવિરુદ્ધનું કૃત્યુ આચર્યુ. જો કે આમાં એક મહિલાએ મદદ કરી હોવાનું પણ સામે આવ્યુ છે. બે યુવકે એક મહિલાની મદદથી બાળકી પર દુષ્કર્મ આચર્યું. સમગ્ર મામલે પોલીસ ફરિયાદ નોંધાતા મીઠાપુર પોલીસે આરોપીઓને પકડવા ચક્રો ગતિમાન કર્યા છે.