દ્વારકા: ગુજરાત ATS ને વધુ એક સફળતા મળી છે. દ્વારકા અને માંડવીમાં થયેલા હેરોઈન સપ્લાય કેસ મામલે ATSએ વધુ એક આરોપીની જમ્મુ-કાશ્મીરથી ધરપકડ કરી છે. આરોપી નજીર અહેમદ ઠાકરની અંનતનાગ જિલ્લામાંથી ધરપકડ કરવામાં આવી છે.
આરોપીની કબૂલાતમાં સામે આવ્યું છે કે તેણે અન્ય એક સાગરીતની મદદ લઈ ઊંઝાથી પંજાબમાં ડ્રગ્સ સપ્લાય કર્યું હતું. ઉલ્લેખનીય છે કે ગુજરાત ATSએ સમગ્ર કેસ મામલે અગાઉ અજીજ ભાગડ રફીક સુમાર અને નજીર નામના ત્રણ શખ્સોની ધરપકડ કરી હતી.
ત્યારે ભારતના યુવાધનને બરબાદ કરવાના આશયથી પાકિસ્તાન દ્વારા મોકલવામાં આવતા અને તેની હેરાફેરી કરનારા મુખ્ય આરોપી રાજુ દુબઈ અને સિમરનજીત સિંહ હાલ વોન્ટેડ હોવાથી પોલીસે તેમને ઝડપી પાડવા આ દિશામાં તપાસના ચક્રોગતિમાન કર્યા છે.
આપને જણાવી દઇએ કે થોડા સમયગાળા પહેલા ગુજરાત ATS એ સલાયા બંદર ખાતેથી આશરે 15 કરોડની કિંમત ધરાવતું હેરોઇન ઝડપાતા હાહાકાર મચી જવા પામ્યો હતો. જો કે આ મામલે મળતી ઘટના અનુસાર રાજુ દુબઈ નામના શખ્સે અજીજને દરિયામાંથી 300 કિલો હેરોઈન લાવવાનુ કામ સોંપ્યુ હતું અને અજીજે દરિયામાં જઈ હેરોઈન લઈ રાજુ દુબઈના કહેવાથી માંડવી સુધી પહોંચાડયું હતું.
અજીજને સુચના હતી કે આ ડ્રગ રફીક સુમરા લેવા આવશે અને રફીકે તે ડ્રગ કબ્જે કરી પોતાના ગોડાઉનમાં રાખી મુક્યુ હતું.રાજુ દુબઈના કહેવાથી રફીકે આ ડ્રગ ઉંઝા સુધી પહોચાડી ત્યાંથી સિમરનજીતના વ્યકિતઓ એટલે કે નજીર અને મંજુરે પંજાબ સુધી ડ્રગ પહોંચાડી દીધેલ.
નોંધનીય છે કે આ સમગ્ર ઘટનામાં અજીજી પાંચ કિલો હેરોઈન ચોરી કરી લીધેલ અને જેથી સમગ્ર ભાંડો ફુટી ગયો હોવાનું સામે આવ્યું છે. ATSનું કહેવું છે કે આ ડ્રગ ત્રણ વારમાં ગયું છે જેમાં બે વાર 50-50 કિલો અને એક વાર 200 કિલો ડ્રગ પંજાબ પહોંચ્યુ છે. ત્યારે તપાસમાં એ પણ બહાર આવ્યુ છે કે આ ડ્રગ્સ પાકિસ્તાનની એક આંતકી સંગઠના દ્રારા ભારતની યુવા પેઠીને બરબાદ કરવા મોકલવામાં આવતુ હતું.
એટીએસની તપાસમાં બહાર આવ્યું છે કે નજીર વર્ષ 2007થી 2014 સુધી હત્યાના એક ગુનામાં જેલમાં હતો અને જ્યાં તેની મુલાકાત અનેક આંતકીઓ સાથે પણ થઈ હતી. જોકે હાલમાં તે જમ્મુ કાશ્મીરમાં ડ્રગના ગુનામાં પકડાયો હતો અને ત્યાંથી તેને પકડી લાવવામાં આવ્યા છે.