બનાસકાંઠા / ડીસામાં એક વર્ષ અગાઉ ઝડપાયેલા ઘીના નમૂના FSLમાં ફેલ, અત્યાર સુધી વેપારીએ કેટલાયને નકલી ઘી ખવડાવી દીધું હશે?

• એક વર્ષ સુધી કેટલાયને અખાધ્ય ધી વેચ્યું!
• લોકોના આરોગ્ય સાથે ચેડાં
• આવા વેપારીઓ સામે કડક સજાની માંગ

ડીસા શહેરમાં આજે વધુ એક નકલી ઘી બનાવતી ફેક્ટરીને સીલ મારી દેવામાં આવ્યું છે. એક વર્ષ અગાઉ ફુડ વિભાગની ટીમે ડીસાની વીર માર્કેટિંગ નામની ઘી બનાવતી ફેકટરીમાં દરોડા પાડ્યા હતા. તે સમયે આ ફેક્ટરીમાંથી શિવમ બ્રાન્ડ નામના ઘીના નમુના લઈ FSLમાં મોકલી આપવામાં આવ્યા હતા. જેના સેમ્પલ ફેલ થતાં આજે એક વર્ષ બાદ પોલીસ અને ફૂડ વિભાગે આ મામલે કાર્યવાહી શરૂ કરી છે.

ફેક્ટરીના માલિક વિકી રાજુભાઈ મોદી સામે લોકોના સ્વાસ્થ્ય સાથે ચેડા કરવા તેમજ વિશ્વાસઘાત કરી નકલી ઘી વેંચતા ફરિયાદ નોંધાઈ છે. આજે ડીસા દક્ષિણ પોલીસ દ્વારા આ ઘી બનાવતી ફેક્ટરીમાં તપાસ હાથ ધરી હતી. પોલીસે ફેક્ટરીમાં પંચનામુ કરી આ ફેક્ટરીને સીલ કરી દીધી છે.

એક વર્ષ અગાઉ ફૂડ વિભાગે આ ઘીના નમુના લઈ FSLમાં મોકલ્યા હતા અને એક વર્ષ બાદ હવે નકલી ઘી વેચતા વેપારીઓ સામે કાર્યવાહી હાથ ધરવામાં આવી છે. ઉલ્લેખનીય છે કે એક વર્ષ સુધી આ વેપારીએ કેટલાય લોકોને નકલી ઘી ખવડાવી તેમના સ્વાસ્થ્ય સાથે ચેડા કર્યા હશે, ત્યારે એક વર્ષ સુધી ક્યાં ક્યાં ઘી વેચ્યું, કેટલા રૂપિયાનું ઘી વેચ્યું તે મામલે પણ તપાસ થવી જોઈએ. આવા લોકોના આરોગ્ય સાથે ચેડાં કરતા વેપારીઓ સામે કડકમાં કડક સજા થાય તે જરૂરી છે.