આણંદ / ડમ્પર ચાલકો બેફામ! ઉમરેઠ-ડાકોર માર્ગ પર ડમ્પર ચાલકે એક્ટિવાને અડફેટમાં લેતા 5 વર્ષની બાળકીનું મોત, અન્ય 2 ઇજાગ્રસ્ત

• આણંદના ઉમરેઠ ડાકોર માર્ગ પર અકસ્માત
• પૂરઝડપે આવતા ડમ્પરે એક્ટિવાને લીધી અડફેટે
• પાંચ વર્ષની માન્યાનું મોત થતાં પરિવારજનોમાં શોકનો માહોલ

 અવાર નવાર મોટા વાહન ચાલકોની પુર ઝડપે અને ગફલતભરી રીતે વાહન હંકારતા લોકોએ જીવ ગુમાવવાનો વારો આવે છે. આવો જ એક બનાવ આજે આણંદના ઉમરેઠ-ડાકોર માર્ગ પર બનવા પામ્યો હતો. જેમાં ઉમરેઠની સેન્ટ જેવિયર્સ સ્કૂલમાં કેજીમાં અભ્યાસ કરતી 5 વર્ષીય બાળકીને લઈને એક્ટિવા પર લઈને સ્કૂલની બહાર નીકળી રહ્યા હતા. પુર ઝડપે આવી રહેલ ડમ્પર ચાલકે એક્ટિવાને હડફેટે લેતા એક્ટિવા પ સવાર 1 બાળકીનું મોત નિપજવા પામ્યું હતું. જ્યારે અન્ય 2 ને સામાન્ય ઈજા પહોંચવા પામી હતી. પાંચ વર્ષીય બાળકી માન્યાનું મોત નિપજતા પરિવારજનોમાં શોકની માહોલ છવાઈ જવા પામ્યો હતો. ઘાયલોને તાત્કાલીક 108 મારફતે સારવાર અર્થે લઈ જવામાં આવ્યા હતા. 

અકસ્માત સર્જાતા લોકો દોડી આવ્યા
અકસ્માત સર્જાતા આજુબાજુમાં કામ કરતા લોકો તેમજ સ્કૂલ સંચાલકો દોડી આવ્યા હતા અને ડમ્પર ચાલકને ઝડપી પાડી પોલીસને હવાલે કર્યો હતો. અવાર નવાર માર્ગ અકસ્માતમાં  લોકોએ પોતાનો જીવ ગુમાવવાનો વારો આવે છે. ત્યારે કેટલાક બનાવમાં વાહન ચાલકની ભૂલના કારણે અકસ્માત સર્જાય છે તો કેટલીક વખત  પુર ઝડપે વાહન હંકારતા ડમ્પર, ટ્રક ચાલકોની ભૂલના કારણે લોકોએ જીવ ગુમાવવાનો વારો આવ્યો છે.