વલસાડમાં વિદ્યાર્થીની જગ્યાએ શિક્ષક પરીક્ષા આપતો પકડાયો હોવાની ઘટના બની છે. વલસાડની કુસુમ વિદ્યાલયમાં અત્યારે ધોરણ 10ની પુરક પરીક્ષા ચાલી રહી છે. ત્યારે પૂરક પરીક્ષા દરમિયાન પરીક્ષા કેન્દ્રના બ્લોક નંબર 69માં સેલવાસના એક વિદ્યાર્થીનો નંબર હતો. જો કે પરીક્ષા દરમિયાન સહી કરવા જતી વખતે ડમી વિદ્યાર્થી હોવાનું સામે આવ્યુ હતું.
વિદ્યાર્થીના બદલે પરીક્ષા શિક્ષક આપી રહ્યો હતો. જો કે આરોપી રંગેહાથ ઝડપાઈ ગયો હતો. પોલીસે શાળાની ફરિયાદના આધારે ડમી વિદ્યાર્થીની અટકાયત કરીને આગળની કાર્યવાહી હાથ ધરી હતી.
શું છે સમગ્ર ઘટના?
પરીક્ષા દરમિયાન સહી કરવા જતી વખતે પરીક્ષા કેન્દ્રના સુપરવાઇઝરને શંકા જતા ગઈ હતી. ત્યારબાદ જાણવા મળ્યું કે સાચા પરીક્ષાર્થીના બદલે કોઈ ડમી વિદ્યાર્થી પરીક્ષા આપી રહ્યો છે. આથી શાળા દ્વારા પોલીસનો સંપર્ક કરવામાં આવ્યો હતો. આ મામલો વલસાડ સિટી પોલીસ સ્ટેશન પહોંચ્યો હતો. આથી પોલીસે તપાસ કરતાં પ્રાથમિક તપાસમાં સેલવાસની એક સ્કૂલના વિદ્યાર્થીનો વલસાડના આ પરીક્ષા કેન્દ્રમાં નંબર હતો.
જોકે આજે વિદ્યાર્થીના બદલે પરીક્ષા આપવા સુરેશ ભોયા નામનો વ્યક્તિ બેઠો હતો. તેની સઘન પૂછપરછ કરતા સુરેશ ભોંયા સેલવાસની એક શાળામાં પ્રવાસી શિક્ષક તરીકે ફરજ બજાવતો હોવાનુ બહાર આવતા પોલીસ પણ ચોંકી ઉઠી હતી. આરોપીએ પરીક્ષાના દસ્તાવેજોમાં પોતાનો ફોટો લગાવી અને ખોટી માહિતી આપી હતી. વિદ્યાર્થીના બદલે પરીક્ષા આપી રહ્યો હતો અને રંગેહાથે ઝડપાઈ ગયો હતો. આથી પરીક્ષા કેન્દ્રના સુપરવાઇઝરની ફરિયાદને આધારે વલસાડ સીટી પોલીસે ગુનો નોંધી તપાસ હાથ શરૂ કરી છે.
આમ, ધોરણ 10ની પુરક પરીક્ષામાં વિદ્યાર્થીને બદલે પરીક્ષામાં ડમી વિદ્યાર્થી તરીકે પરીક્ષા આપતો એક પ્રવાસી શિક્ષક ઝડપાઈ જતાં સમગ્ર પંથકમાં ચકચાર મચી ગઈ છે. આથી પોલીસે હવે વિદ્યાર્થી અને તેના બદલે ડમી વિદ્યાર્થી તરીકે પરીક્ષા આપેલ આપવા આવેલ પ્રવાસી શિક્ષક સુરેશ ભોયાની અટકાયત કરી આગળની કાર્યવાહી હાથ ધરી હતી.