તંત્રની લાલિયાવાડી / આ જિલ્લામાં મંત્રીની મુલાકાત પહેલા ગોઠવાયા કોરોનાના ડમી દર્દી, બીજા દિવસે મહિલાએ નિવેદન બદલ્યું

• કોવિડ સેન્ટરના નામે લાલિયાવાડી!
• શું ફરી દર્દી પર દબાણ કરાયું?
• એક જ દિવસમાં કેમ બદલી ગયા સૂર?

મોરવાહડફના સંતરોડ કોવિડ સેન્ટરમાં ડમી દર્દીનો મામલે બે મહિલા દર્દીઓ અને કોવિડ કેર સેન્ટરના મેડિકલ ઓફિસરે લુલો બચાવ કર્યો છે. ગઈકાલે મંત્રી જયદ્રથસિંહની વિઝિટ બાદ કોવિડ કેર સેન્ટરને તાળા લાગ્યા હતા. અને કોવિડ કેર સેન્ટરમાં ડમી દર્દી એડમિટ કરવામાં આવ્યા હોવાના આક્ષેપો સાથેનો દર્દીનો વીડિયો વાયરલ થયો હતો.

વીડિયો વાયરલ થતા કોવિડ કેર સેન્ટરના મેડિકલ ઓફિસરને પોતાની નોકરી જોખમમાં હોવાનું ભાન થયું હતું. તો બંને મહિલા દર્દીઓને પણ પોતે કરેલી ભૂલનું ભાન થતા આજે બંને મહિલા દર્દીઓએ વાયરલ વીડિયો ખોટો હોવાનો દાવો કર્યો છે. તો મેડિકલ ઓફિસરે પણ પોતાનો લુલો બચાવ કરતા દર્દીઓના માથે દોષનો ટોપલો ઢોળ્યો છે.