ગુજરાતમાં એક તરફ વરસાદનું જોર ઘટી રહ્યું છે પરંતુ બીજી બાજુ 22 જુલાઈ બાદ ફરીવાર વરસાદનું જોર વધશેની આગાહી વચ્ચે સુરત પોલીસે મહત્વનું જાહેરનામું બહાર પાડ્યું છે.
હવામાન વિભાગની આગાહીને લઇ સુરત પોલીસનું જાહેરનામું
ગુજરાતમાં આજે મધ્ય ગુજરાત અને ઉત્તર ગુજરાતમાં ભારે વરસાદની આગાહી કરવામાં આવી છે. સાથે દરિયાઇ કાંઠાના વિસ્તારોને પણ એલર્ટ રહેવા જણાવ્યું છે. એવામાં સુરતમાં હવામાન વિભાગની આગાહીને લઇને સુરત પોલીસે જાહેરનામું બહાર પાડ્યું છે. જેમાં ડુમ્મસ અને સુવાલી બીચ સહેલાણીઓ માટે બંધ કરાયો છે.
40થી 50 કિમીની ઝડપે પવન ફુંકાવાની આગાહી
હવામાન વિભાગની 40થી 50 કિમીની ઝડપે પવન ફુંકાવાની આગાહીને લઇને સુરત પોલીસે મહત્વનો નિર્ણય લીધો છે. પોલીસનો જ્યાં સુધી આગામી હુકમ ના થાય ત્યાં સુધી બંને બીચ સહેલાણીઓ માટે બંધ રહેશે. તેમજ માછીમારોને પણ દરિયો ન ખેડવા માટે સૂચન કરાયું છે.
આજે મધ્ય ગુજરાત અને ઉત્તર ગુજરાતમાં ભારે વરસાદની આગાહી
તમને જણાવી દઇએ કે, રાજ્યમાં વરસાદને લઇ હવામાન વિભાગ દ્વારા મોટી આગાહી કરવામાં આવી છે. હવામાન વિભાગના જણાવ્યા મુજબ રાજ્યમાં 22 જુલાઈ બાદ વરસાદનું જોર વધશે. પણ આજે મધ્ય ગુજરાત અને ઉત્તર ગુજરાતમાં ભારે વરસાદની આગાહી પણ કરવામાં આવી છે. તે ઉપરાંત દાહોદ, પંચમહાલ, અરવલ્લી અને મહીસાગર, મહેસાણા, પાટણ, સાબરકાંઠા અને બનાસકાંઠા, મહેસાણા, પાટણ, સાબરકાંઠા અને બનાસકાંઠા સામાન્યથી મધ્યમ વરસાદની આગાહી કરવામાં આવી છે.
નર્મદા ડેમની જળ સપાટીમાં વધારો
ગુજરાત માટે સારા સમાચાર મળી રહ્યા છે.ગુજરાતની જીવાદોરી નર્મદા બંધની જળસપાટીમાં વધારો નોંધાયો છે.કેચમેન્ટ વિસ્તારમાં સારા વરસાદને પગલે બંધની સપાટી છેલ્લા 24 કલાકમાં 42 સે.મી જેટલી વધી છે.હાલ મધ્યપ્રદેશમાં સારા વરસાદના કારણે હજુ પણ જળસપાટી વધશે.નર્મદા ડેમની સપાટી 120.22 મીટરે પહોંચી છે. નર્મદા ડેમના કેચમેન્ટ વિસ્તાર અને મધ્ય પ્રદેશમાં સારો વરસાદ પડતા સરદાર સરોવરમાં પાણી આવ્યું છે.ઉપરવાસમાંથી 35 હજાર 696 ક્યૂસેક પાણીની આવક થઈ રહી છે. નર્મદા ડેમમાં 1198 MCM (મ્યુલીયન ક્યુબિક મીટર) લાઈવ પાણીનો જથ્થો છે.જળ સપાટીમાં વધારો થતાં નર્મદા કેનાલમાં 3 હજાર 632 ક્યૂસેક પાણી છોડાયું છે.CHPHનું માત્ર 1 યુનિટ અત્યારે કાર્યરત છે.
ઉકાઇ ડેમના 13 દરવાજા ખોલાયા
દક્ષિણ ગુજરાતમાં ભારે વરસાદને કારણે તાપીના ઉકાઇ ડેમના 13 દરવાજા ખોલી નાખવામાં આવ્યા છે. ડેમની સપાટી રુલ લેવલની નજીક પહોંચતા 13 ગેટ ખોલી નખાયા છે. ઉકાઇ ડેમના 13 દરવાજા 6 ફૂટ સુધી ખોલી નાખવામાં આવ્યા છે. ઉકાઇ ડેમમાં 87,779 ક્યુસેક પાણીની આવક આવી છે. હાલમાં ડેમમાંથી 1,45,558 ક્યુસેક પાણી છોડાઇ રહ્યું છે. ઉકાઇ ડેમની સપાટી 332.89 ફૂટ પર પહોંચી છે જેથી તાપી નદીની આસપાસના ગામોને એલર્ટ કરી દેવાયા છે.