ભૂજ: હજુ ઉનાળાની શરૂઆત થવા જઈ રહી છે ત્યાં ભૂજમાં પાણીનો પોકાર સંભળાવવા માંડયો છે. ભૂજમાં છેલ્લાં ઘણા સમયથી પાણીની સમસ્યા વકરી રહી છે. નગરપાલિકા પાણીના પ્રશ્નનો હલ કરવામાં સદંતર નિષ્ફળ નીવડી છે. આથી નાગરિકો રોષે ભરાયા હતા.
સ્થાનિક મહિલાઓએ નગરપાલિકાના સત્તાધીશોને ઢંઢોળવા માટે મોરચો કાઢયો હતો. ધારાસભ્ય નીમાબેન આચાર્ય વિરુદ્ધ સૂત્રોચ્ચારો કર્યા હતા. મહિલાઓએ ખાલી વાસણો ખખડાવીને નીમાબેને આપેલા વચનો યાદ કરાવવાનો પ્રયાસ કર્યો હતો.
ભૂજ નગરપાલિકાના વિવિધ વિસ્તારોમાં ચાર પાંચ દિવસે એક વખત પાણી મળે છે. કાળ ઝાળ ગરમીમાં પાણીની સમસ્યા વિકટ બની રહી છે. સત્તાધીશો પાણી વહેંચણી કરવામાં નિષ્ફળ ગયા છે. ભૂજના વોર્ડ નં-8ની સમસ્યા વધારે ખરાબ છે.
અહીં 15 દિવસે માંડ 1 વખત પાણી મળે છે. લોકો કહે છે કે પાલિકામાં કાયદેસર ટેક્સ ભરીયે છીએ. છતાં પાલિકા સુવિધા આપવામાં ઊણી ઉતરી રહી છે. ઉલ્લેખનીય છે કે ભૂજ નગર પાલિકાના સત્તાધીશો દ્વારા ઉનાળામાં પાણીને લઈને કોઈ નક્કર આયોજન કરવામાં આવ્યું નથી. જેના કારણે નાગરિકો નારાજ છે.