રેલ્વે વિભાગ / ઓડિશામાં આવેલા ફેની વાવાઝોડાના કારણે ગુજરાતની આ ટ્રેનો કરાઇ રદ્દ

તમને જણાવી દઇએ કે, બંગાળની ખાડીમાં હવાના હળવા દબાણમાંથી પ્રચંડ વાવાઝોડાનું સ્વરૂપ ધારણ કરી ચૂકેલો ચક્રવાત ફની શુક્રવારે ઓરિસ્સાના દરિયાકિનારાના ગોપાલપુર અને ચાંદબાલી વચ્ચે ગમે ત્યારે ટકરાય તેવી આગાહી ભારતીય હવામાન વિભાગે કરી છે. જ્યારે ફની વાવાઝોડાના કારણે દક્ષિણ ભારતમાં એલર્ટ જાહેર કરવામાં આવ્યુ છે. ત્યારે હવે પશ્ચિમ રેલ્વે દ્વારા પુરી એક્સપ્રેસ ટ્રેન રદ કરવામાં આવી છે. 

પુરી એક્સપ્રેસ ટ્રેનને રદ કરવામાં આવતા મુસાફરો રેલ્વે સ્ટેશને અટવાયા હતા. વાવાઝોડાની દહેશતને લઇ અમદાવાદ રેલવે વિભાગે પણ પુરી-અમદાવાદ અને અમદાવાદ-પુરી રૂટની ટ્રેન રદ્દ કરી છે. એકાએક ટ્રેન રજ થતા મુસાફરોમાં રોષ જોવા મળી રહ્યો છે. ઓરિસ્સા સરકારે પ્રચંડ વાવાઝોડા સામે બાથ ભીડવાની તૈયારીઓ શરૂ કરી દીધી છે. 

રાજ્ય સરકારે ગુરૂવાર સાંજ સુધીમાં દરિયાકિનારાના જિલ્લાઓમાં નીચાણવાળા વિસ્તારોમાં વસવાટ કરતા ૧૧ લાખ લોકોને સુરક્ષિત સ્થળો પર ખસેડયા હતા. સૂત્રોના મતે બાવન શહેરો અને દસ હજાર ગામડાઓને વાવાઝોડાને પગલે અસર હોવાની શક્યતાઓ વ્યક્ત કરાઈ છે. 

હવામાન વિભાગના જણાવ્યા અનુસાર ચક્રવાત ફની છેલ્લા ચાર દાયકામાં આવેલું ચોમાસા પહેલાનું સૌથી પ્રચંડ વાવાઝોડું છે. હાલમાં ચક્રવાત ફની ઓરિસ્સાના પુરીથી ૩૬૦ કિમી દૂર દક્ષિણ પશ્ચિમમાં પહોંચ્યો છે. ચક્રવાત ફની કલાકના ૧૬ કિલોમીટરની ઝડપથી ઉત્તર તરફ આગળ વધી રહ્યો છે અને શુક્રવારે ગમે ત્યારે ઓરિસ્સાના દરિયાકિનારા પર જમીનને સ્પર્શે તેવી સંભાવના છે. 

ચક્રવાત ફનીના કારણે ઓરિસ્સાના દરિયાકિનારાના જિલ્લાઓમાં ૨૦૦ કિમી પ્રતિ કલાકની ઝડપે પવનો સાથે ભારેથી અતિભારે વરસાદ થવાની સંભાવના છે. રાજ્યમાં સરકારી આરોગ્ય કર્મચારીઓની રજાઓ ૧૫મી મે સુધી રદ કરી દેવાં આવી હતી અને રજા પર ગયેલા કર્મચારીઓેને ફરજ પર પરત ફરવાના આદેશ અપાયા હતા. સરકારે આગામી ૩ દિવસ સુધી શાળા કોલેજોમાં રજાની જાહેરાત કરી દીધી છે.   

ભુવનેશ્વર હવામાન વિભાગના જણાવ્યા અનુસાર ગુરૂવારે ઓરિસ્સાના દરિયાકિનારાના વિસ્તારો અને અંતરિયાળ વિસ્તારોમાં ભારે વરસાદ શરૂ થઈ ગયો તો. રાજ્યના તમામ ૧૧ જિલ્લામાં શુક્રવારે અતિભારે વરસાદની આગાહી કરાઈ છે.