બનાસકાંઠાના ડીસામાં પતિએ દારુના નશામાં સળગાવ્યુ ઘર,પતિ દારૂ પી ઘરે આવતા પત્ની પહોંચી હતી પોલીસ સ્ટેશન
કલાપીનગરમાં પતિએ ઘરમાં લાગાવી આગ
દારૂના નશામાં પતિએ ઘરમાં લગાવી આગ
ઘર વખરીનો સામાન બળીને ખાખ
ગુજરાતમાં દારૂબંધી હોવા છતાં મોટા પ્રમાણમાં દારૂનુ વેચાણ થતુ હોવાના દાવા વિપક્ષી પાર્ટી સહિતના લોકો કરે છે. આ બધા વચ્ચે રાજ્યના અનેક વિસ્તારોમાંથી દારૂના જથ્થા પણ ઝડપાય છે. રાજ્યમાં લાંબા સમયથી દારૂબંધીનો કાયદો અમલમાં છે તેમ છતાં વિવિધ વિસ્તારોમાંથી મોટા પ્રમાણમાં દારૂના જથ્થા ઝડપાવાથી દારૂબંધીના કાયદાની અસરકારકતા ઉપર પણ સવાલો ઉઠી રહ્યા છે કે રાજ્યમાં દારૂ પ્રવેશે ક્યાંથી ? બોર્ડર પર પેટ્રોલીંગ કરતી પોલીસ પર પણ સવાલો ઊભા થઈ રહ્યા છે. આ અંગે વાવ ધારાસભ્ય ગેનીબેન ઠાકોરે આ મુદ્દો ઉઠાવ્યો હતો. ત્યારે બનાસકાંઠામાં જ દારુને કારણે આખુ ઘર બળી ગયુ હોવાનું સામે આવ્યુ છે.
દારુના નશામાં ઘરમાં લગાવી આગ
ડીસાના કલાપીનગરની આ ઘટના છે. દારુના નશામાં પતિએ ઘરમાં આગ લગાવતા ઘર બળીને ખાખ થઇ ગયું. ઘર વખરી સહિત તમામ સામાન બળીને ખાખ થઇ ગયો. વાત જાણે એમ છે કે પતિ દારુ પીને ઘરે આવતા પત્ની પોલીસ સ્ટેશન પહોંચી હતી. પતિ દારુના નશામાં ધમાલ મચાવી રહ્યો હતો. આથી પત્ની મદદ મેળવવા પોલીસ સ્ટેશન પહોંચી પરંતુ પોલીસ ન હોવાથી મહિલા ઘરે મોડી આવી. ઘરે આવીને જોયુ તો ઘર બળીને ખાખ થઇ ગયુ હતું.
પોલીસ દ્વારા કાર્યવાહી ન કર્યાનો આક્ષેપ
મહિલા પોલીસની મદદ મેળવવા પોલીસ સ્ટેશન ગઇ હતી. પરંતુ પોલીસ હાજર ન હતી. મહિલા 4 કલાક સુધી પોલીસ સ્ટેશન બેસી રહી પણ પોલીસ ન આવી. પોલીસની બેદરકારીના કારણે આગની ઘટના બન્યાનો આક્ષેપ કરવામાં આવ્યો છે. પોલીસે દારૂડિયા પતિને પકડ્યો હોત તો આગની ઘટના બની ન હોત તેવી ચર્ચાએ જોર પકડ્યુ છે.