ગુજરાત ATSને વધુ એક સફળતા હાથ લાગી છે. વડોદરાના સાવલીમાંથી ઇતિહાસનું સૌથી મોટી માત્રામાં ડ્રગ્સ ઝડપાયું હોવાની ઘટના સામે આવી છે.
વડોદરાના સાવલીમાંથી મોટી માત્રામાં ઝડપાયું કરોડોનું ડ્રગ્સ
વડોદરા SOG અને ગુજરાત ATS દ્વારા સંયુક્ત ઓપરેશન હાથ ધરાયું
નેક્ટર કેમ કેમિકલ ફેક્ટરીમાંથી મળી આવ્યો ડ્રગ્સનો મોટો જથ્થો
રાજ્ય (Gujarat) માં અવારનવાર ડ્રગ્સ અને ગાંજા સહિતના કેફી દ્રવ્યોના જથ્થા ઝડપાતા હોવાની ઘટનાઓ સામે આવતી રહે છે. ત્યારે એકવાર ફરી ગુજરાત ATSએ વડોદરાના સાવલી તાલુકાના મોક્ષી ગામની સીમમાં કેમિકલ ફેક્ટરીની આડમાં ચાલતી લેબોરેટરીમાંથી ખૂબ મોટી માત્રામાં કરોડોનું ડ્રગ્સ કબજે કર્યું છે. ATSએ ઘટનાસ્થળ પરથી અંદાજિત 1000 કરોડથી વધુ કિંમતનું 200 કિલોનું MD ડ્રગ્સ ઝડપી પાડ્યું છે. હાલમાં ગુજરાત ATSએ કંપનીની આસપાસનો વિસ્તાર સીલ કર્યો છે.
FSLની ટીમ પણ ઘટના સ્થળે પહોંચી હતી
નોંધનીય છે કે, સાવલીના મોક્ષી ગામે વડોદરા SOG અને ગુજરાત ATS એમ બંને દ્વારા સંયુક્ત સર્ચ ઓપરેશન હાથ ધરવામાં આવ્યું હતું. મોડી રાત્રે ATS અને SOGએ દરોડા પાડ્યા હતા. દરમ્યાન નેક્ટર કેમ કેમિકલની ફેક્ટરીમાંથી ATSને અંદાજિત 1000 કરોડથી વધુ કિંમતનો 200 કિલો MD ડ્રગ્સનો જથ્થો હાથ લાગ્યો હતો. મહત્વનું છે કે, ડ્રગ્સના વજન માટે તોલમાપની એક ટીમ પણ બોલાવવામાં આવી હતી. આ મામલે FSLની ટીમ પણ ઘટના સ્થળે પહોંચી હતી.
હાલમાં પોલીસ દ્વારા આ મામલે કયા-કયા મોટા માથા સંડોવાયેલા છે અને ડ્રગ્સનો કાચો માલ ક્યાંથી આવતો હતો, તેને બનાવીને કઇ જગ્યાએ મોકલવામાં આવતો હતો. જેવી અનેક બાબતે તલસ્પર્શી તપાસ હાથ ધરવામાં આવી રહી છે.
નેક્ટર કેમ્પ કંપનીની ફેક્ટરીમાં વિવિધ પ્રકારના કેમિકલનું ઉત્પાદન થતું
મોક્ષી ગામમાં આવેલી નેક્ટર કેમ્પ કંપનીની ફેક્ટરીમાં વિવિધ પ્રકારના કેમિકલનું ઉત્પાદન થતું હોવાની માહિતી સામે આવી અને કંપનીની પાછળના ભાગે MD ડ્રગ્સ બનાવવામાં આવતુ હતું. આ માહિતી મળતા જ ગુજરાત ATS અને વડોદરા SOGના 25થી વધુની ટીમે ઘટનાસ્થળે જઇને દરોડા પાડ્યા હતા અને સર્ચ ઓપરેશન હાથ ધર્યું હતું. જેમાં ખૂબ જ મોટા પ્રમાણમાં MD ડ્રગ્સ મળી આવતા ઉચ્ચ અધિકારીઓ પણ ચોંકી ઉઠ્યા હતા.