ડ્રગ્સનો દરિયો / BIG NEWS: જખૌમાંથી ઝડપાયેલું 400 કરોડનું ડ્રગ્સ આવ્યું હતું ક્યાંથી? થયો ચોંકાવનારો ખુલાસો

• જખૌ ડ્રગ્સ કેસમાં મોટો ખુલાસો
• કરાંચીથી હેરોઈન લઈને આવી હતી બોટ
• ઈન્ટરનેશનલ દરિયાઈ સીમાથી ઝડપાઈ બોટ

400 કરોડનું 77 કિલો હેરોઈનને પાકિસ્તાનની બોટમાં કરાંચથી લોડ કરાયું હતું. આ ડ્રગ્સને ગુજરાતનો કોઈ એક શખ્સ રિસિવ કરવાનો હતો.

પંજાબ મોકલવાનું હતું હેરોઈન 

જોકે તે પૂર્વે જ ATS અને કોસ્ટગાર્ડે સંયુક્ત ઓપરેશન હાથ ધરીને હેરોઈનને ઝડપી લીધું છે. આ કરોડોનું હેરોઈન પંજાબ મોકલવાનું હતું. આ મામલે પાકિસ્તાનના 6 નાગરિક  ઝડપાયા છે. જે આગામી સમયમાં પોલીસ પૂછપરછમાં મોટા ખુલાસા કરી શકે છે.

જખૌના દરિયાકિનારેથી 400 કરોડનું હેરોઈન ઝડપાયું

કચ્છમાં જખૌના દરિયાકિનારેથી 400 કરોડનું હેરોઈન ઝડપાયું, કોસ્ટગાર્ડ અને ATSએ સંયુક્ત ઓપરેશન હાથ ધરી 77 કિલો હેરોઈન સાથે પાકિસ્તાની બોટ ઝડપી. બોટમાંથી 6 પાકિસ્તાની પણ ઝડપાયા.

ગુજરાતના દરિયાકાંઠેથી ફરી ઝડપાયું ડ્રગ્સ

ઘણા મહિનાથી ગુજરાત જાણે ડ્રગ્સ માટે ગેટ વે બની રહ્યું હોય તેવી પરિસ્થિતિ સર્જાઇ છે. રાજ્યમાં એક બાદ એક ડ્રગ્સનાં જથ્થા ઝડયાવાના મામલા વધતાં જઈ રહ્યા છે. ખાસ કરીને રાજસ્થાન બોર્ડર અને ગુજરાતનાં દરિયા કિનારાનો ડ્રગ્સની હેરફેરી માટે ઉપયોગ કરવામાં આવે છે. આ પહેલા દેવ ભૂમિ દ્વારકામાંથી પણ મોટા પ્રમાણમાં ડ્રગ્સનો જથ્થો પકડાયો હતો. ત્યારે ગુજરાતમાં કચ્છના દરિયા કિનારેથી ફરી હેરોઈન ઝડપાયતા ખળભળાટ મચી ગયો છે. 

ગુજરાતને કોણ બનાવવા માંગે છે ઉડતા ગુજરાત? 

ડ્રગ્સ મામલે ગુજરાતના ગૃહરાજ્ય મંત્રી હર્ષ સંઘવી પણ મોટું નિવેદન આપી ચુક્યા છે કે ગુજરાતમાં હવે ડ્રગ્સ અને દારૂબંધીમાં કોઈ કચાશ નહીં ચાલે અને કડકાઇથી કામ કરવામાં આવશે. નવા વર્ષે પણ જ્યારે ગુજરાત રાજ્યના પોલીસ વડા આશિષ ભાટિયાએ પત્રકાર પરિષદ કર્યા બાદ  રાજ્યમાં ડ્રગ્સ કેસમાં કડકમાં કડક કાર્યવાહી અને એક્શન લેવામાં આવશે તેવી ચેતવણી આપી હતી.

ડ્રગ્સ હેરાફેરીનું કેન્દ્ર બની રહ્યું છે ગુજરાત 

• સુરત અને દ્વારકામાં ઝડપાયું ડ્રગ્સ
• સુરતમાં MD ડ્રગ્સનો 58.530 ગ્રામ જથ્થો ઝડપાયો
• મુંદ્રા પોર્ટ ઉપરથી ઝડપાયો ડ્રગ્સનો જથ્થો
• 21 હજાર કરોડનો 2988 કિલો હેરાઇન ઝડપાયું
• 24 ઓક્ટોબરે અમદાવાદમાં 25 લાખનું ડ્રગ્સ ઝડપાયુ
• 23 ઓક્ટોબરે વડોદરામાંથી ગાંજો અને MD ડ્રગ્સ ઝડપાયું
• 22 ઓક્ટોબરે રાજકોટમાં ક્રિકેટર ડ્રગ્સ સાથે ઝડપાયો
• 12 ઓક્ટોબરે ડિસામાંથી 15 લાખનું ડ્રગ્સ ઝડપાયું
• 26 સપ્ટેમ્બરે સુરતથી 1 કિલો હાઇબ્રિડ ગાંજો ઝડપાયો
• 25 સપ્ટેમ્બરે સુરતથી 19.62 લાખનું MD ડ્રગ્સ જપ્ત
• 20 સપ્ટેમ્બરે પોરબંદર ડ્રગ્સ સાથે 7 ઇરાની નાગરિકો ઝડપાયા
• 4 ઓગસ્ટે વલસાડથી MD ડ્રગ્સ બનાવતી કંપની ઝડપાઇ
• આણંદમાં ગાંજાના 900 કિલો છોડ પોલીસે ઝડપી પાડ્યા
• ગુજરાતમાં જૂનથી ઓક્ટોબર સુધી 21 ડ્રગ્સના કેસ થયા
• પોલીસ અને NCBએ 6.6 કરોડના માદક દ્રવ્યો જપ્ત કર્યા
• રાજ્યમાં રેલવે, માર્ગ અને હવાઇ માર્ગે હેરાફેરીમાં 52 લોકોની ધરપકડ
• ગુજરાતમાં 2020માં ડ્રગ્સના 308 કેસ નોંધાયા
• જેમાં 117 વ્યક્તિગત વપરાશના કેસ
• 2019માં NDPSના 289 કેસ નોંધાયા
• 112 અંગત વપરાશ માટેના હતા
• 2018માં 150 કેસ નોઁધાયા
• 60 કેસો અંગત ઉપયોગ માટે ડ્રગ્સ વાપરતા હોવાનું ખુલ્યુ

દક્ષિણ ગુજરાતમાં ક્યારે કેટલું ઝડપાયું ડ્રગ્સ?

સુરત(તા.12-2-2021) : ધોરણ 9ના વિદ્યાર્થીના સ્કૂલ-બેગમાં અંદાજે 1.98 લાખની કિંમતનો 2 કિલોગ્રામ જેટલો અફીણનો જથ્થો

સુરતમાં અફીણની હેરાફેરીમાં વિદ્યાર્થીનો ઉપયોગ કરાયો હોવાનું સામે આવ્યું છે.સુરતમાં એક વિદ્યાર્થી બે કિલોના અફીણના જથ્થા સાથે ઝડપાયો પોલીસ પૂછપરછમાં વિદ્યાર્થીઓ અફીણની ડિલીવરી કરતા હોવાનું બહાર આવ્યું છે. આ અફીણ રાજસ્થાનના ચિત્તોડગઢથી સુરત લાવવામાં આવ્યું હતું. જેને વિદ્યાર્થીઓ સ્કૂલ બેગમાં છુપાવીને તેની હેરાફેરી કરતા હતા. જો કે પુણા પોલીસને શંકા જતા નિયોલ ચેકપોસ્ટ ઉપરથી વિદ્યાર્થીઓની પૂછપરછ કરવામાં આવી હતી. જેમાં વિદ્યાર્થીઓની બેગની તલાસી લેતા વિદ્યાર્થીની સ્કૂલ બેગમાંથી બે કિલો અફીણ મળી આવ્યું હતું. ધોરણ 9ના વિદ્યાર્થીના સ્કૂલ-બેગમાં અંદાજે 1.98 લાખની કિંમતનો 2 કિલોગ્રામ જેટલો અફીણનો જથ્થો હતો. તે રાજસ્થાનથી સુરતમાં ડિલિવરી કરવા આવી રહ્યો હતો.

સુરત(તા.12-2-2021) : 40 કિલો ગાંજો ઝડપાયો

સુરત SOGએ 40 કિલો ગાંજો પકડી પાડ્યો છે. 4 લાખની કિંમતનો ગાંજો જપ્ત કરાયો છે. ગાંજા સાથે 4 આરોપીની SOGએ ધરપકડ કરી છે. જેમાં 2 મહિલા અને 2 પુરૂષ આરોપી છે. આ ગાંજો ટ્રેન મારફત ઓરિસ્સાથી સુરત લાવ્યા હતા.

સુરત(17-11-2021) સરથાણામાં MD ડ્રગ્સ લેબોરેટરી ઝડપાઇ

સુરતના સરથાણા વિસ્તારમાંથી MD ડ્રગ્સની લેબોરેટરી પકડાવાના મામલે પોલીસને વધુ એક સફળતા મળી છે. પોલીસે કોસાડ આવાસમાં રહેતા ત્રીજા આરોપી ફૈઝલની ધરપકડ કરી છે. ફૈઝલ ડ્રગ્સના મામલે જૈમીન સવાણીની મદદ કરતો હતો. રાજસ્થાનથી ડ્રગ્સ લાવનાર પ્રવિણ વાનાની પહેલા જ પોલીસે ધરપકડ કરી છે. સિન્થેટિક MD ડ્રગ્સ બનાવનાર જૈમીનની પણ પોલીસે ધરપકડ કરી છે. આ કેસમાં રાજસ્થાનથી ડ્રગ્સ મોકલનાર આશુરામ હજુ પોલીસ પકડથી દૂર છે.

સુરત(25-9-2021) : કડોદરા પાસે 19.62 લાખ રૂપિયાનું મેફેડ્રોન ડ્રગ્સ ઝડપાયું

ક્રાઈમ બ્રાન્ચે કડોદરા નિયોલ ચેકપોસ્ટ પરથી સુરત ક્રાઈમ બ્રાન્ચની ટીમે 19.62 લાખ રૂપિયાના ડ્રગ્સને ઝડપી પાડ્યું હતું. ગાડીમાં મેફેડ્રોન ડ્રગ્સ લાવતા ત્રણ આરોપીને પણ ઝડપી પડાયા હતા. પોલીસે આરોપી પાસેથી 196.2 ગ્રામ ડ્રગ્સ કબજે કર્યું હતું. આરોપીઓ આ ડ્રગ્સ મુંબઈથી લાવ્યા હોવાનું સામે આવ્યું હતું.

વલસાડ(4-8-2021) : વલસાડમાં 85 લાખનું 4.5 કિલો MD ડ્રગ્સ ઝડપાયું

વલસાડના વાપી GIDC વિસ્તારમાં આવેલા ડુંગરી ફળિયામાંથી ગુજરાત નાર્કોટિક્સ કન્ટ્રોલ બ્યુરોની ટીમે દરોડા પાડીને 4.5 કિલો MD ડ્રગ્સ, 85 લાખ રોકડ સાથે 2 શખ્સોને ઝડપી પાડ્યા હતા.

સૌરાષ્ટ્રમાં ક્યારે કેટલું ઝડપાયું ડ્રગ્સ?

રાજકોટ(તા.12-2-2021) : ગોંડલમાં 10.6 મિલિગ્રામ ડ્રગ્સ સાથે 2 ઝડપાયા

રાજકોટના ગોંડલથી 10.6 મિલિગ્રામ ડ્રગ્સ સાથે બે શખ્સને SOGએ ઝડપી પાડ્યા છે. 1 લાખથી વધુ કિંમતનું ડ્રગ્સ ઝડપાયું છે. અસરફ સોલંકી અને જુમ્મા લંઘા નામના આરોપીને મુદ્દામાલ સાથે ઝડપીને આગળની કાર્યવાહી હાથ ધરવામાં આવી રહી છે. આરોપીઓ નશીલા પદાર્થનું વેચાણ કરી રહ્યા હતા.

રાજકોટ(20-11-2021) રાજકોટમાંથી 7 ગ્રામ મેફેડ્રોન ડ્રગ્સ ઝડપાયું

રાજકોટમાં મેફેડ્રોન ડ્રગ્સ સાથે કચ્છના વતની મુસ્તાક અબ્દુલ ધીસોરાની ધરપકડ કરવામાં આવી છે. પોલીસે મુસ્તાક પાસેથી 70 હજારનું 7 ગ્રામ મેફેડ્રોન ઝડપ્યુ હતું. સોમનાથ-વેરાવળથી ડ્રગ લાવ્યાની SOG સમક્ષ કબૂલાત કરી હતી.

જામનગર(22-11-2021) : જામનગરથી રૂ.10 કરોડનું ડ્રગ્સ ઝડપાયું

જામનગરથી ઝડપાયેલા રૂ.10 કરોડના ડ્રગ્સના મામલે તપાસ દરમિયાન ચોંકાવનારા ખુલાસા સામે આવ્યા છે. આ ઝડપાયેલા ડ્રગ્સની જખૌના દરિયામાં ડિલિવરી થઈ હતી. આ જખૌના દરિયામાંથી રહીમ હાજી અકબર ડ્રગ્સ લાવ્યો હતો. અને તેની સાથે અનવર પટેલીયા પણ સામેલ હતો. આ અગાઉ પકડાયેલા અનવર પટેલીયા જખૌથી ડ્રગ્સ લાવવામાં પણ સામેલ હતો. રૂપિયા 10 કરોડનું હેરોઈન લાવીને બેડી મરીન એરિયામાં સંતાડાયુ હતું.

દ્વારકા(17-11-2021) નાવદ્રા બંદરેથી રૂ.120 કરોડનું ડ્રગ્સ ઝડપાયું

ગુજરાત ATSએ 120 કરોડની કિંમતનું 24 હેરોઈનનો જથ્થો પકડી લીધો હતો. આ જથ્થો દ્રારકાના કલ્યાણપુર તાલુકાના નવાદ્રા બંદરથી ઝડપાયો છે. ATSએ રાજસ્થાન અને જોડિયાથી 3 આરોપીઓની ધરપકડ કરી હતી. જેમાં પકડાયેલા આરોપી જબ્બારે ડ્રગ્સ છુપાવ્યાની કબુલાત કરી હતી ત્યાર બાદ ATSએ દ્રારકાના કલ્યાણપુરા તાલુકાના નાવદ્રાના અનવર ઉર્ફે અનુમુસા પટેલીયાના ઘરે છુપાવેલા ડ્રગ્સના જથ્થાને ઝડપી પાડ્યો હતો. 12 કિલો હેરોઈનની રાજસ્થાનમાં ડિલવરી કરવામાં આવી હતી.

દ્વારકા કેસઃ મોરબીના ઝીંઝુડા ગામેથી રૂ.600 કરોડનું ડ્રગ્સ

ATS દ્વારા મોરબીના ઝીંઝુડા ગામેથી ડ્રગ્સ ઝડપી પાડવામાં આવ્યું હતું. આ ડ્રગ્સ કેસમાં ત્રણ આરોપીઓની ધરપકડ કરવામાં આવી હતી. આ ત્રણેય આરોપીઓને આજે મોરબીની કોર્ટમાં રજૂ કરવામાં આવશે. ATS દ્વારા 24 કલાક કામગીરી કરીને 600 કરોડનું ડ્રગ્સ ઝડપી પાડવામાં આવ્યું હતું. તમામ આરોપીઓને હાલ મોરબી જિલ્લામાં જ રાખવામાં આવ્યા છે.

દ્વારકા(તા.10-11-2021) : ખંભાળિયા હાઇવેથી 350 કરોડથી વધુ કિંમતનું 66 કિલો ડ્રગ્સનું ડ્રગ્સ ઝડપાયું

દેવભૂમિ દ્વારકા જિલ્લામાં ખંભાળિયા હાઈવે પરથી ડ્રગ્સનો જથ્થો મળી આવ્યો હતો. જેમાં ખંભાળિયા આરાધના ધામ પાસે કારમાંથી અંદાજિત 66 કિલોનો ડ્રગ્સનો જથ્થો ઝડપાયો હતો. જેની કિંમત 350 કરોડથી વધુની જણાવાઈ રહી છે. આ ડ્રગ્સ સમુદ્ર રસ્તે આવી રહ્યું હોવાની બાતમી મળી હતી. જેમાં દ્વારકા SOG અને ગુજરાત ATS દ્વારા સંયુક્ત રીતે તપાસ કરવામાં આવી રહી છે. આ અગાઉ મુદ્રા પોર્ટ પર પણ ડ્રગ્સનો મોટા પ્રમાણમાં જથ્થો ઝડપાયો હતો.

પોરબંદર(23-9-2021) : પોરબંદરમાં પકડાયું હતું 150 કરોડની કિંમતનું 30 કિલોગ્રામ હેરોઈન

પોરબંદરનાં દરિયામાંથી ૧૫૦ કરોડના ડ્રગ્સ સાથે પકડાયેલા ૭ ઈરાનીઓને પોરબંદર લાવવામાં આવ્યા બાદ સુરક્ષા એજન્સીઓએ ૩૦ કિલોગ્રામ હેરોઈનનો જથ્થો કબજે કરી સઘન પુછતાછ હાથ ધરી છે. 'જુમા હુસેન' બોટના આ ખલાસીઓ પાસેથી હેરોઈનનો જથ્થો કયાંથી આવ્યો? કોને મોકલવાનો હતો? ડ્રગના હેરાફેરી પ્રકરણમાં કોણ - કોણ સંડોવાયું છે? તેની વિગતો પુછપરછ બાદ બહાર આવે તેવી સંભાવના સુત્રોએ દર્શાવી હતી.

ગુજરાત દરિયાઈ સીમા(19-9-2021) : ATSએ 250 કરોડનો હેરોઈનનો જથ્થો ઝડપાયો

ગુજરાત ATS અને ભારતીય કોસ્ટ ગાર્ડ દ્વારા સંયુક્ત ઓપરેશન હાથ ધરાયું હતું. જેમાં ભારતીય જળ સીમામાંથી અંદાજીત રૂપિયા 250 કરોડના હેરોઇન સાથે 7 ઈરાની નાગરિકોની ધરપકડ કરવામાં આવી હતી. ભારતીય જળ સીમામાંથી 50 કિલો હેરોઇન ઝડપી પાડ્યું હતું. ગુજરાત ATSને બાતમી મળી હતી કે, મોટી માત્રામાં ગુજરાતમાં ડ્રગ્સ પહોંચાડવામાં આવી રહ્યું છે. જે માહિતીના આધારે ગુજરાત ATSએ કાર્યવાહી કરી હતી.

કચ્છમાં ક્યારે કેટલું ઝડપાયું ડ્રગ્સ?

કચ્છ(તા.30-11-2021) : ભુજમાંથી ઝડપાયું 12 કિલોગ્રામ ચરસ, 2 આરોપી ઝડપાયા

કચ્છના ભુજમાંથી 12 કિલોગ્રામ ચરસ ઝડપાયું છે. ડ્રગ્સ જથ્થા સાથે બે આરોપી ઝડપાયા છે. પશ્ચિમ કચ્છ SOGએ કાર્યવાહી કરી છે. તો ડ્રગ્સ દરિયાઈ વિસ્તારમાં તણાઈ આવ્યાનુ પ્રાથમિક અનુમાન લગાવાયું છે. આ અંગે વધુ તપાસ હાથ ધરાઈ રહી છે.

કચ્છના મુન્દ્રા પોર્ટ પરથી 21,000 કરોડનું 3,000 કિલો ડ્રગ્સ ઝડપાયું

કચ્છના મુન્દ્રા પોર્ટમાં ટેલ્કમ પાવડરની આડમાં અંદાજે 21 હજાર કરોડની કિંમતનો 3 હજાર કિલો હેરોઈનનો જથ્થો ઝડપી પાડવામાં આવ્યો હતો. DRIની ટીમે મુન્દ્રામાં આ હેરોઈનનો જથ્થો પકડી પાડ્યો હતો, જે અત્યાર સુધીનો મળી આવેલો સૌથી મોટો ડ્રગ્સનો જથ્થો હતો.

કચ્છ(તા.17-4-2021) : આંતરરાષ્ટ્રીય દરિયાઈ સરહદે 150 કરોડના હેરોઈન સાથે 8 પાકિસ્તાની ઝડપાયા

આંતરરાષ્ટ્રીય દરિયાઈ સરહદે 150 કરોડના હેરોઈન સાથે 8 પાકિસ્તાની શખ્સો ઝડપાયા હતા. ભુજની સ્પેશિયલ NDPS કોર્ટે ગુનાની ગંભીરતા સમજી આરોપીઓના 12 દિવસના રિમાન્ડ મંજૂર કર્યા હતા. આરોપીઓની કસ્ટડી ATS ગુજરાતને સોંપાઈ હતી. પકડાયેલા હેરોઇનની કિંમત 150 કરોડ આંકવામાં આવી હતી. હેરોઈનના પેકેટ પાકિસ્તાની બોટમાં યુક્તિપૂર્વક છુપાવાયા હતા.

મધ્ય ગુજરાતમાં ક્યારે કેટલું ઝડપાયું ડ્રગ્સ?

અમદાવાદ બોપલ હાઈપ્રોફાઇલ ડ્રગ્સ કાંડ

અમદાવાદના બોપલ હાઇપ્રોફાઇલ ડ્રગ્સ કાંડનો મામલો સામે આવ્યો હતો. મુખ્ય આરોપી વંદિત પટેલની પૂછપરછમાં અનેક લોકોના નામ સામે આવ્યા છે. તો કેટલાક ડ્રગ્સ પેડલરોને પણ ઝડપી પાડવામાં આવ્યા છે.

અમદાવાદ(24-10-2021) અમદાવાદમાંથી 25 લાખની કિંમતનું 250 ગ્રામ ડ્રગ્સ ઝડપાયું

અમદાવાદમાં ક્રાઇમ બ્રાન્ચે 25 લાખની કિંમતનું 250 ગ્રામ ડ્રગ્સ ઝડપ્યું હતું. આ સાથે બે ડ્રગ્સ માફિયાઓને ઝડપી પાડ્યા હતા. ઝડપાયેલા બન્ને આરોપીઓ રાજસ્થાનથી સરકારી ST બસમાં ડ્રગ્સનો જથ્થો લઈને અમદાવાદ આવવા માટે નીકળ્યા હતા, પરંતુ પોલીસે જાણકારીના આધારે બન્નેને MD ડ્રગ્સ સાથે ઝડપી પાડ્યા હતા.

અમદાવાદ(12-8-2021) : અમદાવાદમાંથી 20 કરોડનું કોકેઈન ડ્રગ્સ ઝડપાયું

અમદાવાદમાં બે સ્થળેથી ડ્રગ્સનો જથ્થો ઝડપાયો હતો. ગુજરાત NCBને 20 કરોડનું કોકેઈન ડ્રગ્સ ઝડપાયું હતું. જેની કિંમત 20 કરોડ આંકવામાં આવી હતી. ત્યારે NCB દ્વારા પિલ્લાઇની ધરપકડ કરીને વધુ તપાસ હાથ ધરવામાં આવી હતી. પિલ્લાઈ અગાઉ પણ કેટલીક વાર ડ્રગ્સ માટે અમદાવાદ આવી ચૂક્યો હોવાનું સૂત્રો દ્વારા જાણવા મળ્યું હતું. પિલ્લાઈની સાથે અન્ય એક આરોપીની પણ પોલીસે ધરપકડ કરી હતી.

અમદાવાદ(તા.20-1-2021) : શાહીબાગથી 5 કરોડની કિંમતનો 1 કિલો ડ્રગ્સ ઝડપાયો

ATSની ટીમે મુંબઇથી આવતા શખ્સની એક કરોડની કિંમતના એક કિલો ડ્રગ્સ સાથે અમદાવાદથી ધરપકડ કરી હતી. કાર્યવાહી માટે ATSની ટીમે વોચ રાખીને આરોપીને શાહીબાગથી ઝડપી પાડ્યો હતો. ગુજરાત ATS વધુ તપાસ હાથ ધરતા માલુમ પડ્યું કે મેથામ્ફેટામાઇન નામનું ડ્રગ્સની કિંમત આંતરરાષ્ટ્રીય બજારમાં 5 કરોડ હોવાનું અનુમાન લગાવવામાં આવે છે.

ઉત્તરગુજરાતમાં ક્યારે કેટલું ઝડપાયું ડ્રગ્સ?

ડીસા(27-7-2021) : ડીસા શહેરમાંથી 8 લાખના મુદ્દામાલ સાથે ડ્રગ્સ ઝડપાયું

ડીસા શહેર દક્ષિણ પોલીસે બાતમીના આધારે ડીસા શહેરમાં આવેલી મોઢેશ્વરી સોસાયટીના એક રહેણાંક મકાનમાંથી અંદાજિત 8 લાખ રૂપિયાની કિંમતના ડ્રગ્સના જથ્થા સાથે 1 શખ્સની અટકાયત કરી હતી. તેના ઘરમાંથી જ 338.60 ગ્રામ ગાંજો, 59.760 ગ્રામ સ્મેક અને 18.25 ગ્રામ મેફેડ્રોનનો જથ્થો અને 3 મોબાઈલ રોકડ 6,350 સહિત તમામ જથ્થોની કિંમત 7,96,700 રૂપિયા હતી. પોલીસે આ તમામ જથ્થા સાથે શુભમકુમાર પટેલ ઉર્ફે પાબ્લો ઇસ્કોનની અટકાયત કરી હતી.