સફળતા / મહારાષ્ટ્રથી ગુજરાતમાં ડ્રગ્સ ઘુસાડવાના રેકેટનો પર્દાફાશ, મુંબઈથી ટ્રેનમાં બેસી સુરત આવતી 2 મહિલાઓ મેફેડ્રોન ડ્રગ્સ સાથે ઝડપાઈ

• મહારાષ્ટ્રથી સુરતમાં ઘુસાડાતો મેફેડ્રોન ડ્રગ્સનો જથ્થો ઝડપાયો
• મુંબઈથી 2 મહિલાઓ ટ્રેન મારફતે લાવતી હતી ડ્રગ્સનો જથ્થો
• 209.06 ગ્રામનો મેફેડ્રોન ડ્રગ્સનો જથ્થો ઝડપાયો

 
ડ્રગ્સના દૂષણને ગુજરાતમાંથી નાબૂદ કરવા પોલીસ રીતસરની મેદાને ઉતરી છે. જેને લઈને રાજ્યમાં અનેક વખત ડ્રગ્સના જથ્થા ઝડપાઇ રહ્યા છે.તેવામાં વધુ એક વાર મહારાષ્ટ્રથી સુરતમાં ડ્રગ્સ ઘુસાડવાના રેકેટનો પોલીસે પર્દાફાશ કર્યો છે. મહારાષ્ટ્રથી સુરતમાં ઘુસાડાતો 20 લાખ ઉપરાંતની કિંમતના મેફેડ્રોન ડ્રગ્સનો જથ્થો ઝડપી પાડ્યો છે.  

20 લાખ 90 હજારની કિંમતનું ડ્રગ્સ ઝડપાયું
મુંબઈથી 2 મહિલાઓ ટ્રેન મારફતે ડ્રગ્સનો જથ્થો લાવતી હોવાની પોલીસને બાતમી મળતા પોલીસે રેડ પાડી હતી. આ દરમિયાન હિના શેખ, હસમત સૈયદ નામની 2 મહિલાઓ ઝડપાઇ હતી. જેની પોલીસે તલાસી લેતા કુલ 209.06 ગ્રામનો મેફેડ્રોન ડ્રગ્સનો જથ્થો મળી આવ્યો હતો. જેને પગલે પોલીસે બંને મહિલાઓ પાસેથી રૂપિયા 20 લાખ 90 હજારનું ડ્રગ્સ કબજે કરી હિના શેખ, હસમત સૈયદ નામની 2 મહિલાઓની ધરપકડ કરી હતી.  ક્રાઈમ બ્રાન્ચે રેલવે સ્ટેશનથી બહાર આવેલા બસ સ્ટેન્ડ પાસેથી બંને મહિલાઓને દબોચી લીધી હતી. 
 
ડ્રગ્સ માફિયા પર સુરત શહેર પોલીસે હાથધરી કાર્યવાહી
ગુજરાતમાંથી ડ્રગ્ઝના દૂષણને નાબૂદ કરવા સરકાર કટીબદ્ધ હોવાનું જણાવી ગૃહ રાજ્ય મંત્રી હર્ષ  સંઘવીએ ઉમેર્યું હતું કે છેલ્લા 11 માસમાં જ રાજ્યમાંથી રૂ. 5200  કરોડનું ડ્રગ્ઝ અને 6,500 વ્યક્તિઓને પકડવામાં આવ્યા છે. જેમાં પોલીસ ઝપટે ચડેલા  28 લોકો પાકિસ્તાની નાગરિક છે. ગુજરાતના સીમાડેથી આ દૂષણ ઘુસે નહીં એ માટે પોલીસે આંતરરાષ્ટ્રીય સમુદ્રી સીમા સુધી જઈ ડ્રગ્ઝ પકડ્યું છે. વધુમાં ડ્રગ્સના દૂષણને અટકાવવા પોલીસ સતર્ક હોવાનું ગૃહ રાજ્ય મંત્રી હર્ષ  સંઘવીએ અનેક વખત નિવેદનમાં જણાવ્યું છે. ત્યારે હવે ડ્રગ્સ માફિયા પર સુરત શહેર પોલીસે કાર્યવાહી હાથ ધરી છે.