ગુજરાત / વડોદરાથી ડ્રગ્સ પેડલર અસગર ખાનની ડ્રગ્સ સાથે ધરપકડ, બોલિવુડને લઇને કર્યો ચોંકાવનારો ખુલાસો

• રાજ્યમાં ડ્રગ્સની હેરાફેરી સાથે વધુ એક શખ્સ ઝડપાયો
• વડોદરાથી MD ડ્રગ્સ સાથે અસગર ખાન ઉર્ફે બોબીની ધરપકડ
• બોલીવુડ ફિલ્મ ઇન્ડસ્ટ્રીમાં ડ્રગ્સ સપ્લાય કરતો હોવાનું સામે આવ્યું

ગુજરાતના યુવાધનને બરબાદ કરવાનું ષડયંત્ર ચાલી રહ્યું છે. શાળા-કોલેજના વિદ્યાર્થીઓ સુધી ડ્રગ્સની ડિલિવરી થઇ રહી છે. શહેરથી લઇને ગામડા સુધી ડ્રગ્સનો વેપાર પ્રવેશી ચૂક્યો છે. તેવામાં સંસ્કારી નગરી ગણાતા વડોદરાથી 2.310 ગ્રામ MD ડ્રગ્સ સાથે શખ્સની ધરપકડ કરવામાં આવી છે. આ ડ્રગ્સની અંદાજિત રુપિયા 23,000 હજારની કિંમત આંકવામાં આવી છે. 

કેવી રીતે ઝડપાયો આરોપી?
વડોદરાની કોલેજોમાં ડ્રગ્સ સપ્લાયની ગાંધીનગર CID ક્રાઈમના નાર્કોટિક્સ સેલને બાતમી મળી હતી. ત્યારબાદથી નાર્કોટિક્સ સેલની ટીમ તપાસ કરી રહી હતી. છેલ્લાં કેટલાંક સમયથી અહીં વોચ ગોઠવવામાં આવી હતી. જોકે નાર્કોટિક્સની ટીમને એક વિદ્યાર્થીની મદદ લીધી અને ડ્રગ્સ પેડલર અસગર ખાન સુધી પહોંચવામાં સફળતા મળી. ગાંધીનગર CID ક્રાઈમે એક વિદ્યાર્થી પાસે ડ્રગ્સ મંગાવ્યું હતું. CID ક્રાઇમ દ્વારા ડ્રગ્સ પેડલર અસગર ખાન ઉર્ફે બોબી અબ્દુલસત્તાર ખાનને રંગેહાથ પકડવામાં આવ્યો છે. 

વડોદરાની ખ્યાતનામ યુનિવર્સિટીઓમાં કરતો હતો ડ્રગ્સ સપ્લાય
ડ્રગ્સ સાથે ઝડપાયેલો આરોપી વડોદરાની યુનિવર્સિટીઓમાં ભણતા વિદ્યાર્થીઓને ડ્રગ્સ સપ્લાય કરતો હતો. ત્યારે આજે ગાંધીનગર CID ક્રાઇમે આરોપીને રંગેહાથ ઝડપીને વડોદરાના ગ્રામ્ય વરણામા પોલીસને સોંપ્યો છે. પોલીસે વધુ કાર્યવાહી હાથધરી છે. પૂછપરછમાં ચોંકાવનારા ખુલાસા થયા છે.

મુંબઇ અને ગોવાથી મંગાવતો હતો ડ્રગ્સ
આરોપી અસગરખાન વડોદરામાં આજવા રોડ પર આવેલી ભાગ્યલક્ષ્મી ટાઉનશીપમાં રહેતો હતો. મહારાષ્ટ્રના નજીકના વિસ્તારમાં પણ તે રહેતો હતો. આરોપી અસગરખાને પોલીસ પૂછપરછમાં એવી પણ કબૂલાત કરી કે, વિદ્યાર્થીઓને ડ્રગ્સ સપ્લાય કરતો હતો અને તે મુંબઈ અને ગોવાથી ડ્રગ્સ મંગાવતો હતો.

બોલીવુડ ફિલ્મ ઇન્ડસ્ટ્રીમાં ડ્રગ્સ સપ્લાય કરતો હોવાનું સામે આવ્યું
આરોપી ફિલ્મ પ્રોડ્યુસર તરીકે પોતાની ઓળખ આપતો હતો. સપના ફિલ્મ પ્રોડક્શન એન્ટરટેઈનમેન્ટ કંપનીનો રાઈટર અને ડિરેક્ટર તરીકે નોકરી કરે છે. આરોપી પાસેથી ઓછી માત્રામાં ડ્રગ્સ મળી આવ્યું છે પરંતુ તેની સાથે અન્ય શખ્સો પણ આ વેપારમાં સંકળાયેલા હોઇ શકે છે. આ ડ્રગ્સ સપ્લાય અને હેરાફેરીનું નેટવર્ક મોટાપાયે હોવાનું અનુમાન લગાવવામાં આવી રહ્યું છે. બોલીવુડ ફિલ્મ ઇન્ડસ્ટ્રીમાં ડ્રગ્સ સપ્લાય કરતો હોવાનું સામે આવ્યું છે.