ગુજરાત / રાજકોટમાં ડ્રગ્સ માફિયાનું 'રાજ': ડ્રગ્સ પેડલર મહિલા અને બોયફ્રેન્ડે નશીલા પદાર્થ વેચવાનું દબાણ કરતા સગીરાએ પીધું ફિનાઈલ

• રાજકોટમાં મહિલા ડ્રગ્સ પેડલરનો ત્રાસ
• ડ્રગ્સ પેડલરના ત્રાસથી સગીરાએ પીધુ ફિનાઈલ
• સગીરાને સારવાર માટે સિવિલ ખસેડાઈ

ગુજરાત રાજ્ય શહેર સહિત રાજકોટમાં ડ્રગ્સ માફિયાઓ સામે પોલીસે કડક વલણ અપનાવ્યું છે. છતાં આ ડ્રગ્સ માફિયાઓ ડ્રગ્સનો પીછો છોડી રહ્યાં નથી. થોડા દિવસો અગાઉ જ રાજકોટ પોલીસે ડ્રગ્સના રેકેટનો પર્દાફાશ કર્યો હતો. અંડર 19 ક્રિકેટ ટુર્નામેન્ટ રમી ચુકેલા ક્રિકેટરની માતાએ ડ્રગ્સ પેડલર અંગે અને પોતાનો પુત્ર ડ્રગ્સના રવાડે ચઢ્યો હોવાની કબૂલાત કરી હતી. અનેક વિસ્તારોમાં ડ્રગ્સ વેંચાતું હોવાનો તેમણે દાવો કર્યો હતો. ત્યારબાદ પોલીસે 6 જેટલા શખ્સોની ધરપકડ કરી હતી. તેવામાં હવે રાજકોટ શહેરમાં ડ્રગ્સ માફિયાનો વધુ એક કિસ્સો સામે આવ્યો છે. રાજકોટમાં ડ્રગ્સ પેડલર મહિલાના ત્રાસથી સગીરાએ ફિનાઈલ પીધું છે. 17 વર્ષીય સગીરાને સારવાર માટે સિવિલ ખસેડાઈ છે. 

ડ્રગ્સ પેડલર મહિલા અને બોયફ્રેન્ડ પર ગંભીર આક્ષેપ

ડ્રગ્સ પેડલર મહિલા તેમજ તેના બોયફ્રેન્ડ પર સગીરાએ ગંભીર આક્ષેપ લગાવ્યા છે. સગીરાને ડ્રગ્સ વેચવાનું દબાણ કરાતું હોવાનો આક્ષેપ લગાવ્યો છે. સગીરાને ઘરે આવીને ધમકી પણ આપી હોવાનો આક્ષેપ કર્યો છે. સમગ્ર મામલે હજુ સુધી કોઈ પોલીસ ફરિયાદ નોંધાઈ નથી. એક બાદ એક ડ્રગ્સના કિસ્સા સામે આવી રહ્યા છે ત્યારે એવું લાગી રહ્યું છે કે ડ્રગ્સ નેટવર્કમાં મહિલાઓનો ઉપયોગ થઇ રહ્યો છે.

મહત્વનું છે કે, બોલિવુડમાં ડ્રગ્સના સેવન અને ડ્રગ્સના વેચાણના પર્દાફાશ થઇ રહ્યા છે તેની જેમ જ ગુજરાતના રાજકોટમાં પણ ડ્રગ્સ માફિયા કોઈ ડર વગર પોતાનો બિઝનેસ ચલાવી રહ્યા છે.

રાજકોટ સુધી ડ્રગ્સ પહોંચે છે કંઇ રીતે?

ત્યારે કેટલાક સવાલ થાય છે કે, શું ડ્રગ્સના નેટવર્કમાં સગીરોનો ઉપયોગ? શું રાજકોટમાં ડ્રગ્સનું ખુલ્લેઆમ વેચાણ ચાલે છે? ડ્રગ્સના નેટવર્કને કોણ મજબૂત કરી રહ્યું છે? રાજકોટ સુધી ડ્રગ્સ પહોંચે છે કંઇ રીતે? ડ્રગ્સની સપ્લાય માટે સગીરોનો ઉપયોગ કેમ? ડ્રગ્સ માફિયાઓ સામે દાખલારૂપ કાર્યવાહી ક્યારે? ગુજરાતમાં ડ્રગ્સ માફિયાઓ શું બેફામ બની રહ્યા છે? ડ્રગ્સ પેડલર પર રાજકોટ પોલીસ કેમ કાર્યવાહી નથી કરતી ? ગૃહ રાજ્યમંત્રીના આદેશ પછી પણ ડ્રગ્સ પેડલર બેફામ કેમ ? રાજકોટમાં શા માટે મહિલાએ આત્મહત્યાનો પ્રયાસ કરવો પડે ? રાજકોટમાં ડ્રગ્સ પેડલરને કારણે મહિલાને શા માટે આત્મહત્યાનો પ્રયાસ કરવો પડે ? શું રાજકોટ પોલીસ ગૃહમંત્રીના આદેશને ઘોળીને પી ગઇ છે?  શું લોકો અસામાજિક તત્વો સામે ફરીયાદ કરશે ત્યારે જ પોલીસ એકશન લેશે?  પોલીસની અસામાજિક તત્વો સામે આકરી કાર્યવાહી કરવાની ફરજ નથી?