અમદાવાદ શહેરમાં ડ્રગ્સનું ચલણ દિવસેને દિવસે વધી રહ્યુ છે. તેવામા અમદાવાદ એસઓજી વધુ એક એમડી ડ્રગ્સ પ્રકરણનો પર્દાફાસ કર્યો છે. પોલીસે 31 ગ્રામથી વધુના એમડી ડ્રગ્સ સાથે પેડલરને દબોચી લઈ તેની વિરુદ્ધ તપાસ હાથ ધરી છે અને આ પ્રકરણના મૂળ સુધી પહોચવા પોલીસે તપાસનો ધમધમાટ શરૂ કર્યો છે. પેડલરની પુછપરછમા સામે આવ્યુ કે તેનો ભાઈ સપ્લાયર છે અને તેણે જ આ ડ્રગ્સ વેચવા માટે આપ્યુ હતુ. જેથી પોલીસે તેની ધરપકડ માટે કાર્યવાહી શરૂ કરી છે.
31 ગ્રામથી વધુ MD ડ્રગ્સ ઝડપાયું
અમદાવાદ શહેર એસઓજીની ટીમને ખાનગી બાતમી માહિતી મળી હતી કે, શહેરના આશ્રમ રોડ પર આવેલી સિટી ગોલ્ડ મલ્ટીપ્લેક્સની ગલીમાં એક યુવક ખાનગી રાહે MD ડ્રગ્સનું વેચાણ કરી રહ્યો છે. જે અંગે તપાસ કરતા રઈશ ઉર્ફે પટવા નાસીરખાન પઠાણ ડ્રગ્સની પડીકીઓ સાથે મળી આવ્યો હતો. જે એમડી ડ્રગ્સના વેચાણ માટે આવ્યો હોવાનુ સામે આવ્યુ છે. આરોપીની તપાસ કરતાં ઝીપલોક થેલીમાંથી 3 લાખથી વધુની કિંમતનું 31 ગ્રામથી વધુ MD ડ્રગ્સ મળી આવ્યું હતું. પેડલર રઈસ ઉર્ફે પટવાની પુછપરછ કરતા આ ડ્રગ્સ તેના ભાઈ સોહેલ નાસીરખાન પઠાણ પાસેથી લાવી અમદાવાદમાં છુટ્ટક વેચાણ કરતો હોવાનું ભોપાળું છતું થયું હતું. જેથી એસઓજીએ પેડલરના સપ્લાયર ભાઈ સોહેલની ધરપકડ કરવા તજવીજ હાથ ધરી છે.
આરોપી હત્યા અને લુંટ સહીત 6 ગુનામા પોલીસ ચોપડે ચડી ચૂકયો છે
ડ્રગ્સ સાથે ઝડપાયેલા પેડલરની તપાસ કરતા તે છેલ્લા બે વર્ષથી એમડી ડ્રગ્સનો બંધાણી છે અને તે ડ્રગ્સનું વેચાણ પણ કરતો હોવાનુ સામે આવ્યુ છે. વધુમાં આરોપી હત્યા અને લુંટ સહીત 6 ગુનામા પોલીસ ચોપડે ચડી ચૂકયો હોવાનું સામે આવ્યું છે.સાથે જ જેલમા જેલ સિપાઈ પર પણ જીવલેણ હુમલો કરવા ઉપરાંત બે વખત પાસા પણ ભોગવી ચુક્યો હોવાનુ સામે આવ્યુ છે. બીજી તરફ પોલીસની તપાસમા સામે આવ્યુ છે કે, પેડલરનો સપ્લાયર ભાઈ પણ સોહેલ પણ ગંભીર ગુનામા સંડોવાયેલ છે. લાંબા સમયથી એમડી ડ્રગ્સનુ વેચાણ કરે છે. જેથી તેને શોધી લેવા પોલીસે કાર્યવાહી શરૂ કરી છે.
અમદાવાદમાં એક તરફ અન્ય રાજ્યમાંથી ડ્રગ્સ લાવી વેચાણ કરવામાં આવે છે. તો બીજી તરફ જુના અમદાવાદ એટલે કે કોટ વિસ્તારની અંદર ડ્રગ્સનુ દુષણ વધ્યું છે. તેવા જ એક ડ્રગ્સ પેડલરની ધરપકડ કરવામાં આવી છે. આરોપી જાવેદ કે જે અગાઉ અમદાવાદમાંથી ઝડપાયેલા 60 ગ્રામ એમડી ડ્રગ્સના ગુનામાં ફરાર હતો. તેની ધરપકડ કરવામાં આવી છે. આ કાર્યવાહી બાદ કોટ વિસ્તારની અંદર ચાલતા ડ્રગ્સ દુષણમાં સંડોવાયેલ અન્ય ડ્રગ્સ સપ્લાયર સુધી પોલીસ પહોંચી શકશે કે કેમ તે જોવું રહ્યું.