દેશમાં જેટલી ઝડપે નવી ટેકનોલોજી આવી રહી છે એટલી જ ઝડપથી છેતરપિંડીના નવા નવા કેસ સામે આવી રહ્યા છે. તેવામાં ફાસ્ટ ટેગમાં પણ છેતરપિંડી થતી હોય તે પ્રકારનો એક વીડિયો સોશિયલ મીડિયા પર વાયરલ થઈ રહ્યો છે. જેને લઈને લોકોમાં નવી ચિંતા ઊભી થઈ છે. લોકોને લાગે છે કે, કેટલાક તત્વો વાહન પર ચીપકાવેલા ફાસ્ટટેગને સ્કેન કરીને એકાઉન્ટમાંથી પૈસા ઉઠાવી રહ્યા છે. લોકોમાં મજબૂત થઈ રહેલી આ માન્યતાને હવે એક વીડિયોએ નવી હવા આપી છે.
છેતરપિંડીનો વીડિયો સોશિયલ મીડિયા પર વાયરલ
નરેન્દ્ર મોદી સરકારે વર્ષ -2016માં ફાસ્ટટેગની શરૂઆત કરી હતી. જેનાથી ટોલપ્લાઝા પર ઇલેક્ટ્રોનિક રીતે ટોલ ટેક્સ ચૂકવાઈ શકે છે. સરકારે વાહનો પર ફાસ્ટ ટેગનો ઉપયોગ એટલા માટે લાગુ કર્યો હતો કે લોકોને ટોલટેક્ષ ભરવા માટે ટોલ પ્લાઝા પર લાંબી લાઈનોમાં ઊભું ન રહેવું પડે અને સમય કે, ઇંધણી પણ બચત થાય. આ સિસ્ટમથી લોકોને લાંબી લાઈનોમાં ઊભા રહેવાની ઝંઝટથી મુક્તિ મળી છે. લોકોમાં હવે એક માન્યતા દ્રઢ થઈ રહી છે કે, આતો બકરું કાઢતાં ઊંટ પેઠું', કેમ કે, હવે વાહન ચાલકોને એવું લાગી રહ્યું છે કે, ફાસ્ટ ટેગથી તેમની સાથે જબરજસ્ત છેતરપિંડી થઈ રહી છે અને એ ફ્રોડ એવી રીતે થઈ રહ્યું છે જેને જોઈને એક તબક્કે તો પોલીસ પણ ચોંકી ગઈ છે. ઉત્તરપ્રદેશ પોલીસમાં તહેનાત સચિન કૌશિકે પોતાના ટ્વીટર હેન્ડલ પરથી એક વીડિયો પોસ્ટ કર્યો છે, સચિન કૌશિકે વીડિયો પોસ્ટ કરીને લખ્યુ છે કે,આ ફાસ્ટ ટેગથી ફ્રોડ કરવાની નવી રીત છે. જરૂર છે સતર્ક રહેવાની, જરૂર છે સાવધાન રહેવાની. સચિન કૌશિકે પોસ્ટ કરેલો આ વીડિયો સોશિયલ મીડિયા પર ખૂબ વાયરલ થઈ રહ્યો છે.
ફાસ્ટ ટેગથી જોડેયેલું બેંક એકાઉન્ટ સાફ કરવાનો સ્માર્ટ વોચનો અસલી મકસદ
રેડલાઈટ સિગ્નલ પર કાર સાફ કરનારા ગરીબ છોકરાઓના હાથમાં મોંઘી ડિજિટલ ઘડિયાળ હોય ખરી ? બસ આ મોંઘી સ્માર્ટ વોચનો અસલી મકસદ કાર સાફ કરવાનો નથી પરંતુ ફાસ્ટ ટેગથી જોડેયેલું તમારું બેંક એકાઉન્ટ સાફ કરી નાખવાનો છે. આવા કિસ્સાઓમાં કાર સાફ કરનાર છોકરાઓ ફાસ્ટટેગ સ્ટીકર સ્કેન કરી લેતા હોય છે અને તમારા એકાઉન્ટમાંથી રકમ સાફ કરી નાખે છે. આ પ્રકારના વીડિયોએ ફાસ્ટટેગ ધારક વાહનચાલકોમાં નવી ચિંતા ઊભી કરી છે. જો કે, ફાસ્ટટેગથી આ રીતે છેતરપિંડી થાય તેવી ફેલાયેલી અફવાને વીટીવી પુષ્ટી કરતું નથી. છતાં વાહન ચાલકોના મગજમાં ઊભી થયેલી શંકાના સમાધાન માટે, વીટીવી દ્વારા ફાસ્ટેટેગ છેતરપિંડી વિશે રિયાલિટ ચેક હાથ ધરાયું હતું જેમાં સમગ્ર હકીકત જાણવા મળી હતી.