કેન્દ્રીય માર્ગ અને પરિવહન મંત્રી નીતિન ગડકરીએ રાજ્યસભામાં આજે દેશમાં અકસ્માતથી મરનાર લોકોની સંખ્યાની માહિતી આપી.
ભારતમાં અકસ્માતથી મોતના આંકડા જાહેર કર્યાં નીતિન ગડકરીએ
અકસ્માતથી મરનાર લોકોની સંખ્યાના મામલે ભારતે દુનિયામાં ટોપ પર
અકસ્માતમાં ઘાયલ થનાર લોકોની સંખ્યાના મામલે ભારત ત્રીજા નંબરે
નીતિન ગડકરીએ રાજ્યસભામાં કહ્યું કે અકસ્માતથી મરનાર લોકોની સંખ્યાના મામલે ભારતે દુનિયામાં ટોપ અને ઘાયલ થનાર લોકોની સંખ્યાના મામલે ત્રીજા નંબર પર છે. ગડકરીએ વધી રહેલા અકસ્માતો પર ગંભીર ચિંતા વ્યક્ત કરી હતી.
2 લાખનું વળતર
માર્ગ મંત્રાલયે એક યોજના હેઠળ માર્ગ અકસ્માતનો ભોગ બનેલા લોકોને વધુ વળતર આપવા માટે એક સ્થાયી સમિતિની રચના કરી છે. આ સમિતિની રચના 'હિટ એન્ડ રન' મોટર અકસ્માત યોજના ૨૦૨૨ હેઠળ કરવામાં આવી હતી.પરિવહન અને રાજમાર્ગ મંત્રાલયે આવા કેસોમાં ગંભીર રીતે ઘાયલ વ્યક્તિને ચૂકવવાના વળતરની રકમ 12,500 રૂપિયાથી વધારીને 50,000 રૂપિયા કરી દીધી છે. આ સાથે મોતના કિસ્સામાં રકમ 25 હજાર રૂપિયાથી વધારીને 2 લાખ રૂપિયા કરી દેવામાં આવી છે.
30 માર્ચે ગડકરીએ રાજ્યસભામાં કરી હતી આ જાહેરાત
આ પહેલા 30 માર્ચે ગડકરીએ એવું જણાવ્યું કે જો કારમાં એરબેગ્સ કામ કરતી હોત તો 2020ના વર્ષમાં ઓછામાં ઓછા 13,022 લોકોના જીવ બચી ગયા હોત. ગડકરીએ કહ્યું કે વાહન ચાલકો અને તેમાં બેસનાર લોકોની સલામતી માટે નવા નિયમ બનાવાઈ રહ્યાં છે.
1 ઓક્ટોબરથી તમામ વાહનોમાં 6 એરબેગ રાખવી પડશે
ગડકરીએ કહ્યું કે પરિવહન મંત્રાલયે 1 ઓક્ટોબરથી એક નવો નિયમ લાગુ પાડવાની યોજના બનાવી છે. તમામ વાહનોમાં ઓછામાં ઓછી 6 એરબેગ્સ હોવી જોઈએ જેમા સાઈડ એરબેગ્સનો પણ સમાવેશ થાય છે. ગડકરીની જાહેરાત બાદ 1 ઓક્ટોબરથી તમામ વાહનોમાં સાઈડ સહિત ઓછઆમાં ઓછી 6 એરબેગ્સ રાખવી પડશે.
દર વર્ષે અકસ્માતમાં 1.5 લાખ લોકોના મોત-ગડકરી
ગડકરીએ કહ્યું કે વાહનોની સીધી ટક્કર બાદ એરબેગ્સના ઉપયોગથી 2020માં ઓછામાં ઓછા 8598 લોકોના જીવન બચાવી શકાય હોત. તેમણે કહ્યું કે દર વર્ષે આપણે પાંચ લાખ અકસ્માતનો સામનો કરવો પડે છે અને અકસ્માતમાં 1.5 લાખ લોકોના મોત થાય છે. આવી ઘટના અટકાવવા અમે સંખ્યાબંધ પગલાં ભરી રહ્યાં છીએ. તેમણે કહ્યું કે વાહનોમાં 6 એરબેગ્સ રાખવી ફરજિયાત છે.
2020માં વાહનોની સીધી ટક્કરમાં 25,289 લોકોના મોત
ગડકરીએ કહ્યું કે 2020માં વાહનોની સીધી ટક્કરમાં ઓછામાં ઓછા 25,289 લોકોના મોત થયા હતા અને એરબેગ્સ હોત તો તેમાંથી 30 ટકા લોકોના જીવન બચી શક્યા હોત.