વેક્સિનેશનને લઈને વિવાદ, એપોલોએ શરૂ કરેલા ડ્રાઈવ થ્રૂ વેક્સિનેશન પર AMCએ હાથ ઉંચા કર્યા
વેક્સિનેશનને લઈને રાજ્યમાં વિવાદ
અપોલોએ ડ્રાઈવ થ્રુ વેક્સિનેશન શરૂ કર્યા બાદ વિવાદ
AMCએ ફેરવી તોળ્યું અને હાથ ઊંચા કરી દીધા
એક તરફ ગુજરાતમાં કોરોનાની વેક્સિનની ભારે અછત છે ખાસ કરીને 18થી 44 વર્ષ સુધીના લોકોને ઓનલાઇન બૂકિંગમાં સ્લોટ મળવો ખુબ મુશ્કેલ છે. સરકારી વેક્સિનેશન સેંટર પર પણ પુરતા પ્રમાણમાં વેક્સિન ઉપલબ્ધ નથી. સરકાર દ્વારા ફ્રી વેક્સિન આપવાની વાતો કરવામાં આવી રહી છે પરંતુ તેનું બૂકિંગ નથી મળી રહ્યું આવા સમયે ખાનગી હોસ્પિટલ એપેલો દ્વારા ડ્રાઇવ થ્રૂ વેક્સિનેશન શરૂ કરી દેવામાં આવ્યું છે. એપોલોનું ડ્રાઇવ થ્રૂ હવે વિવાદના વંટોળમાં ફસાયું છે કારણ કે, કેન્દ્ર સરકારી રાજ્યોને એવી સૂચના આપી છે કે, કોઈ પણ વ્યક્તિનું ઓન ધ સ્પોટ રજિસ્ટ્રેશનને મંજૂરી આપવી કે નહીં તે અંગેનો નિર્ણય રાજ્યની સરકાર કરી શકશે.
ગુજરાત રાજ્યની સરકારે એવો નિર્ણય કર્યો છે ગુજરાતમાં 18થી 44 વર્ષના લોકોનું ઓન ધ સ્પોટ રજિસ્ટ્રેશન નહીં થાય તેઓએ ઓન લાઇન અપોઇન્ટમેન્ટ લીધા પછી જ રસી મળશે. સ્વભાવિક છે કે, ગુજરાત સરકારે લીધેલો આ નિર્ણય આખા રાજ્યમાં લાગુ પડે પરંતુ આવું ન બન્યું. અમદાવાદ મહાનગર પાલિકાએ 26 મેના રોજ જાહેરાત કરી કે, GMDC ગ્રાઉન્ડમાં એપોલો દ્વારા પબ્લિક પ્રાઇવેટ ધોરણે વેક્સિન આપવામાં આવશે. આ વેક્સિનેશન માટે નાગરિકોએ 1000 રૂપિયા ચુકવવા પડશે. જોકે, પાછળથી ભાન થયું કે, રૂપિયા વસૂલતી વેક્સિનેશન ડ્રાઇવમાં AMCનું નામ જોડાશે તો લોકો સવાલ ઉઠાવશે એટલે AMCએ ફેરવી તોળ્યું અને હાથ ઊંચા કરી દીધા.
વહીવટ કોણ કરે છે? "મને ખબર નથી"
AMCએ પલ્ટો માર્યા બાદ નાયબમુખ્યમંત્રી નીતિન પટેલને આ અંગે પુછવામાં આવ્યું તો તેમણે જણાવ્યં કે, " આ મારી જાણકારીમાં નથી, આ કોર્પોરેશનનો પોતાનો સ્વતંત્ર નિર્ણય હોઈ શકે છે. AMCએ મુખ્યમંત્રી સાથે પરામર્શ કરીને આ નિર્ણય કર્યો કે કેમ તે મને ખબર નથી." જ્યારે નીતિન પટેલને પુછવામાં આવ્યું કે, સરકારે વેક્સિનના ભાવ 600 રૂપિયા નક્કી કર્યા છે તેમ છતા 1000 રૂપિયા ઉઘરાવવામાં આવી રહ્યા છે તો તેના ઉત્તરમાં પણ નીતિન પટેલે જુનો અને જાણિતો જવાબ આપી દીધો કે "મને ખબર નથી"
સરકારમાં સંકલનની ઉણપ
નીતિન પટેલના નિવેદન પરથી લાગી રહ્યું છે કે, ગુજરાત સરકારમાં સંકલનનો અભાવ છે. કોણ શું નિર્ણય કરે છે તે કોઈને ખબર નથી હોતી. મુખ્યમંત્રીને નાયબમુખ્યમંત્રીએ કરેલા નિર્ણય અંગે ખબર નથી હોતી અને નાયબ મુખ્યમંત્રીને મુખ્યમંત્રીએ કરેલા નિર્ણય અંગે ખબર નથી હોતી. ઘણી વખત બન્નેને સાથે પણ ખબર નહોય તેવું બને છે. AMCના કિસ્સામાં પણ એવું જ છે. AMCના અધિકારીઓએ નિર્ણય કરી નાખ્યો અને હવે પદાધિકારીઓ કહી રહ્યા છે કે, "મને ખબર નથી"
વેક્સિનેશન મુદ્દે સરકારની બેવડી નીતિ
કોરોનાની વેક્સિન મુદ્દે સરકાર બે મોઢાવાળી વાત કરી રહી હોય તે જણાઈ રહ્યું છે. કારણ કે, સરકાર એક તરફ કહે છે કે, ગુજરાતમાં 18 વર્ષથી ઉપરની વ્યક્તિએ ઓનલાઇન રજિસ્ટ્રેશન કરાવ્યા બાદ જ વેક્સિન મળશે. જ્યારે બીજી તરફ એપોલે દ્વારા ડ્રાઇવ થ્રૂ વેક્સિનેશન શરૂ કરવામાં આવ્યું છે જે અંતર્ગત સ્થળ પર જ રજિસ્ટ્રેન કરવામાં આવી રહ્યું છે. ત્યારે સવાલ ઉઠી રહ્યા છે કે શું એપોલો હોસ્પિટલને ગુજરાત સરકારના નિયમો લાગુ નથી પડતા? એપોલો હોસ્પિટલમાં લોકોને ઓન સ્પોટ વેક્સિનેશન માટે કોણે મંજૂરી આપી
ભાવને લઈને પણ વિવાદ
કોરોનાની વેક્સિનના ભાવને લઈને પણ વિવાદ થયો છે. સરકારે વેક્સિનની કિંમત 600 રૂપિયા નક્કી કરી છે અને તેના પર વહિવટી ખર્ચો લગાવીને ખાનગી હોસ્પિટલ તે પ્રમાણે વેક્સિન આપી શકે છે. જોકે, એપોલોની વેક્સિનની કિમંત 1000 રૂપિયા છે. જેને લઈને પણ વિવાદ થયો છે. આપને જણાવી દઈએ કે, હાલ સરકાર પાસે ભલે વેક્સિનની ઉણપ હોય પરંતુ ખાનગીમાં ઓનલાઇન રજિસ્ટ્રેશન વગર વેક્સિન મળી રહે છે તેને લઈને પણ વિવાદ વકર્યો છે.