બિટકોઇન જેવી ક્રિપ્ટોકરન્સી રાખવા, વેચવા કે ખરીદવા પર હવે ૧૦ વર્ષની જેલની સજા થઇ શકે છે. ક્રિપ્ટોકરન્સી પ્રતિબંધ અને નિયમન ડિજિટલ કરન્સી વિધેયક ૨૦૧૯ના મુસદ્દામાં ક્રિપ્ટોકરન્સીનું માઇનિંગ, જનરેશન, તેને રાખવા, વેચવા, ટ્રાન્સફર કરવા, નાશ કરવા, જારી કરવા અને સોદા કરવામાં સંડોવાયેલ વ્યક્તિને ૧૦ વર્ષની જેલની સજા કરવાની જોગવાઇ કરવામાં આવી છે.
આ વિધેયકમાં ક્રિપ્ટોકરન્સીને સંપૂર્ણપણે ગેરકાયદેસર ગણાવીને ક્રિપ્ટોકરન્સી રાખવાના કૃત્યને બિનજામીન અપરાધ ગણવાની જોગવાઇ કરવામાં આવી છે. ક્રિપ્ટોકરન્સી ડિજિટલ કે વર્ચ્યુઅલ કરન્સી હોય છે, જે સામાન્યતઃ બ્લોક ચેન ટેક્નોલોજી પર આધારિત હોય છે. બિટકોઇન દુનિયામાં સૌથી પ્રસિદ્ધ ક્રિપ્ટોકરન્સી છે.
મની લોન્ડરિંગમાં ક્રિપ્ટોકરન્સીનો દુરુપયોગ થવાની મોટી શક્યતાને જોઇને વિવિધ સરકારી એકમો-ઇન્કમટેક્સ અને સીબીઆઇસીએ ક્રિપ્ટોકરન્સી પર પ્રતિબંધ મૂકવાની ભલામણ કરી હતી. આર્થિક બાબતોના સચિવ સુભાષચંદ્ર ગર્ગ છેલ્લા કેટલાક સમયથી ક્રિપ્ટોકરન્સીને પ્રતિબંધિત કરવાના વિધેયકના ડ્રાફ્ટ પર કામ કરી રહ્યા છે. આમ ક્રિપ્ટોકરન્સી રાખવાના કૃત્યને બિનજામીન અપરાધ ગણીને 10 વર્ષ સુધીની જેલની સજા કરવાની જોગવાઇ કરવામાં આવી છે.