કથિત શંકાસ્પદ પ્રવૃતિઓમાં સંડોવાયેલ અને અગાઉ અમદાવાદ બોમ્બ બ્લાસ્ટ કેસમાં ATSએ અટકાયત કરેલ તબીબ સાદાબ પાનવાલાની ગુજરાત ATS દ્વારા વડોદરામાંથી અટકાયત.
વડોદરામાંથી ડૉ. સાદાબ પાનવાલાની ATSએ કરી અટકાયત
પ્રતિબંધિત સંગઠન SIMI સાથે કનેકશન હોવાની આશંકાએ અટકાયત
અગાઉ અમદાવાદ સિરિયલ બોમ્બ બ્લાસ્ટમાં પણ ATSએ કરી હતી અટકાયત
વડોદરામાંથી ડૉ. સાદાબ પાનવાલા નામના વ્યક્તિની ATS દ્વારા અટકાયત કરાઇ છે. ડૉ. સાદાબ પાનવાલા કે જેનું પ્રતિબંધિત સંગઠન SIMI સાથે કનેકશન હતું. ડૉ. સાદાબ પાનવાલા કે જે મુસ્લિમ ડોક્ટર એસોસિએશનના સભ્ય છે. અગાઉ અમદાવાદ સિરિયલ બોમ્બ બ્લાસ્ટમાં પણ ATSએ અટકાયત કરી હતી. અમદાવાદ ATSએ સ્થાનિક પોલીસને સાથે રાખી ગઇકાલે પૂછપરછ કરી હતી. ATS દ્વારા રાજ્યભરમાંથી 3થી 4 શખ્સોની પૂછપરછ કરાઇ રહી છે. જો કે, સમગ્ર મામલાનું કારણ હજુ સુધી અકબંધ છે.
વાડી તાઈવાડામાં રહેતા ડૉ. સાદાબ પાનવાલાની પૂછપરછ માટે શહેર પોલીસની ટીમને સાથે રાખી ATS એ ગુપ્તપણે ઓપરેશન પાર પાડ્યું હતું. પરંતુ પોલીસના ધાડા જોઈને આસપાસમાં ગભરાટ ફેલાઇ ગયો હતો. તમને જણાવી દઇએ કે, ડૉ. સાદાબને અગાઉ અમદાવાદ બ્લાસ્ટ કેસમાં આરોપી ઇમરાન શેખ અને મહંમદ ઉસ્માન અગરબત્તી વાલા સાથે સંપર્કો હોવાનું માની ATS એ અમદાવાદ લઇ જઇને પૂછપરછ હાથ ધરી હતી. તપાસ દરમ્યાન સાદાબ અગાઉ SIMIના સ્લીપર સેલ સાથે સંકળાયેલો હોવાનું માનવામાં આવી રહ્યું છે.
ધર્માંતરણ કેસ બાદ મુસ્લિમ ડોક્ટર એસોસિએશન ચર્ચામાં આવ્યું હતું
ઉલ્લેખનીય છે કે, ઉત્તરપ્રદેશના ધર્માંતરણ મામલાના તાર વડોદરા સાથે જોડાયેલા હતા. શહેરના ફતેગંજમાંથી સલાઉદ્દિનને UP એટીએસ લઈ ગયા બાદ શહેર પોલીસે પણ ગુનો નોંધી મુસ્લિમ મેડિકલ સેન્ટરનાં મેનેજરને ઝડપ્યો હતો. આ મેડિકલ સેન્ટર સાથે મુસ્લિમ ડોક્ટર એસોસિએશન સંકળાયેલ હતું જેમાં ડૉ. સાદાબ પાનવાલા જોડાયેલ છે.