વડોદરા: કૌભાંડી અમિત ભટનાગરની ઉપસ્થિતિમાં વડોદરામાં ફેડરેશન ઓફ ગુજરાત ઇન્ડસ્ટ્રીઝનો એવોર્ડ વિતરણ કાર્યક્રમ યોજાયો હતો. મેનકા ગાંધી પણ આ કાર્યક્રમમાં ઉપસ્થિત રહ્યા હતા. એવોર્ડ વિતરણ કાર્યક્રમમાં કૌભાંડી અમિત ભટનાગરે જયૂરીની ભૂમિકા નિભાવી હતી.
ભટનાગરે એવોર્ડ વિજેતા ઉધોગકારોના નામ નક્કી કર્યા હતા. CSR હેઠળ દાન કરનાર કંપનીના નામની એવોર્ડ માટે પસંદગી થતી હોય છે. ત્યારે કૌભાંડી અમિત ભટનાગરની એવોર્ડ ફાળવણીમાં મહત્વની ભૂમિકા હોવાથી અનેક સવાલો ઉભા થાય છે.
ઉલ્લેખનીય છે કે ખાનગી બેંકો પાસેથી કરોડોની લોન લઈને તે નાણાં ભરપાઈ નથી કર્યા તેવા અમિત ભટનાગરે સામાજિક સેવામાં વધુ દાન કરનાર કંપનીને એવોર્ડ આપવાની ભલામણ કરી છે અને આજે કેન્દ્રીય મંત્રીના હસ્તે આ કૌભાંડીએ નક્કી કરેલો એવોર્ડ આપવામાં આવતા આખો વિવાદ સામે આવ્યો છે અને એક સમયે સરકાર અને પક્ષને પણ નીચું જોવું પડે તેવી આ ઘટના વડોદરામાં બની છે જોકે કેન્દ્રીય મંત્રીએ કહ્યું કે અમારી સરકાર કોઈને પણ નહિં છોડે તેવો પણ સંકેત આપ્યો હતો.