મોંઘવારીનો ડબલ એટેકઃ ૧૦ દિવસમાં બીજી વખત CNG-PNGમાં ભાવવધારો, આઠ મહિનામાં પાંચ વખત CNG-PNGના ભાવ વધ્યા
પેટ્રોલ-ડીઝલ બાદ CNG-PNGનો ડબલ ઍટેક!
આઠ મહિનામાં પાંચ વખત CNG-PNGના ભાવ વધ્યા
છેલ્લા 10 દિવસમાં બીજી વખત ભાવવધારો
પેટ્રોલ-ડીઝલના દરરોજ વધતા ભાવથી મોંઘવારીનો માર સહન કરી રહેલા સામાન્ય માનવી ઉપર હવે સરકારે મોંઘવારીનો ડબલ એટેક કર્યો છે. ઈન્દ્રપ્રસ્થ ગેસ લિમિટેડે ફરી એક વખત સીએનજી અને પીએનજીના ભાવ વધાર્યા છે. ૧૦ દિવસમાં બીજી વાર ગેસના ભાવ વધારવાથી આમ જનતાની મુશ્કેલી વધી છે. નવો ભાવવધારો આજથી જ લાગુ થઈ ગયો છે.
પેટ્રોલ-ડીઝલ બાદ CNG-PNGનો ડબલ ઍટેક!
આ અગાઉ ૨ ઓક્ટોબરે ભાવવધારો કરવામાં આવ્યો હતો. આમ, આઠ મહિનામાં જ પાંચમી વખત સીએનજી-પીએનજીના ભાવ વધારવામાં આવ્યા છે. ઈન્દ્રપ્રસ્થ ગેસ લિમિટેડના જણાવ્યા અનુસાર સીએનજી અને પીએનજી હવે બે રૂપિયાથી વધુ મોંઘા થઈ ગયા છે. દિલ્હીમાં સીએનજીની કિંમત વધીને પ્રતિ કિલોગ્રામ રૂ.૪૯.૭૬ થઈ ગઈ છે અને પીએનજીની કિંમત વધીને પ્રતિ એસસીએમ (સ્ટાન્ડર્ડ ક્યૂબિક મીટર) રૂ.૩૫.૧૧ના ભાવે મળશે, જ્યારે નોઈડા, ગ્રેટર નોઈડા અને ગાઝિયાબાદમાં સીએનજી પ્રતિકિલો રૂ.૫૬.૦૨ના ભાવે અને ગુરુગ્રામમાં પ્રતિકિલો રૂ.૫૮.૨૦ના ભાવે મળશે.
આઠ મહિનામાં પાંચ વખત CNG-PNGના ભાવ વધ્યા
પીએનજીની વાત કરીએ તો નોઈડા, ગ્રેટર નોઈડા અને ગાઝિયાબાદમાં પ્રતિ એસસીએમ રૂ.૩૪.૮૬ના ભાવે અને ગુરુગ્રામમાં પ્રતિ એસસીએમ રૂ.૩૩.૩૧ના ભાવે મળશે. છેલ્લા કેટલાક મહિનાથી સીએનજી અને પીએનજીના ભાવ સતત વધી રહ્યા છે, જેમ કે ૨ માર્ચના રોજ સીએનજીની પ્રતિકિલો કિંમત રૂ.૪૩.૪૦ હતી, ૮ જુલાઈના રોજ રૂ.૪૪.૩૦, ૨૯ ઓગસ્ટના રોજ રૂ.૪૫.૨૦, ૨ ઓક્ટોબરના રોજ રૂ.૪૭.૪૮ અને આજે ૧૩ ઓક્ટોબરના રોજ કિંમત વધીને દિલ્હીમાં રૂ.૪૯.૭૬ને આંબી ગઈ છે.તે જ રીતે પીએનજીના ભાવ ૨ માર્ચના રોજ પ્રતિ એસસીએમ રૂ.૨૮.૪૧ હતા તે વધીને ૮ જુલાઈએ રૂ.૨૯.૬૬, ૨૯ ઓગસ્ટે રૂ.૩૦.૯૧, ૨ ઓક્ટોબરે રૂ.૩૩.૦૧ અને આજે દિલ્હીમાં રૂ.૩૫.૧૧ને આંબી ગયો છે.
છેલ્લા 10 દિવસમાં બીજી વખત ભાવવધારો
ગઈ સાલ ૪ ઓક્ટોબરના રોજ પણ સીએનજી-પીએનજીના ભાવ વધારાયા હતા. એ વખતે રાજધાની દિલ્હીમાં સીએનજીની કિંમત વધીને પ્રતિકિલો રૂ.૪૨.૭૦ અને પીએનજીની કિંમત વધીને પ્રતિ એસસીએમ રૂ.૨૭.૫૦ થઈ હતી. કેટલાંક શહેરોમાં સીએનજી અને પીએનજીના ભાવમાં જોરદાર વધારો થઈ ગયો છે, જેમ કે કાનપુર, ફતેહપુર અને હમીરપુરમાં સીએનજીનો ભાવ પ્રતિકિલો રૂ.૬૬.૫૪ને આંબી ગયો છે. એ જ રીતે એજમેર, પાલી અને રાજસમંદમાં પ્રતિકિલો ભાવ વધીને રૂ.૬૫.૦૨ થઈ ગયો છે, જ્યારે મુઝફ્ફરનગર, મેરઠ અને શામલીમાં સીએનજીનો પ્રતિકિલો ભાવ વધીને રૂ.૬૩.૨૮ થયો છે.
મોંઘવારીનો માર પ્રજા હેરાન પરેશાન
હકીકતમાં સરકારે ૩૦ સપ્ટેમ્બરે નેચરલ ગેસ એટલે કે ડોમેસ્ટિક ગેસની કિંમતમાં ૬૨ ટકાના ધરખમ વધારાની જાહેરાત કરી હતી. ઓક્ટોબર-માર્ચના છ મહિના (ઓક્ટોબર-૨૦૨૧થી માર્ચ-૨૦૨૨) માટે નેચરલ ગેસની કિંમત વધીને હવે ૨.૯૦ ડોલર પ્રતિ મેટ્રિક મિલિયન બ્રિટિશ થર્મલ યુનિટ (એમએમબીટીયુ) થઈ ગઈ છે, જ્યારે એપ્રિલ-સપ્ટેમ્બર, ૨૦૨૧ના છ મહિનાના સમયગાળા માટે આ કિંમત પ્રતિ એમએમબીટીયુ ૧.૭૯ ડોલર હતી.