GST / તમે નહીં માનો હવે ઈલેક્ટ્રિશિયન તેમજ બ્યુટિશિયનોને પણ GST ભરવું પડશે

કેન્દ્ર સરકાર પ્લમ્બર, ઇલેક્ટ્રિશિયન અને બ્યૂટિશિયન જેવી સેવાઓને પણ ટૂંક સમયમાં ગુડસ એન્ડ સર્વિસીસ એકટ (જીએસટી) નેટવર્કના દાયરામાં લાવવા ‌સક્રિય વિચારણા કરી રહી છે. ખાસ કરીને જેઓ ઓનલાઇન પ્લેટફોર્મ પર લિસ્ટેડ છે તેમને જીએસટીના દાયરામાં લાવવામાં આવશે. તેમને ગીગ ઇલેકોનોમી વર્કર્સ (સ્વતંત્ર રીતે કામ કરનારા કામદારો)ને ફોર્મલ વર્ક ફોર્સમાં લાવવાની કોશિશ તરીકે જોવામાં આવે છે.

ડિપાર્ટમેન્ટ ફોર પ્રમોશન ઓફ ઇન્ડસ્ટ્રી એન્ડ ઇન્ટરનલ ટ્રેડ (ડીપીઆઇઆઇટી) અર્બનક્લેપ, હાઉસજોય અને બીઆરઓ ફોર યુ જેવા ઓનલાઇન માર્કેટ પ્લેસ માટે જીએસટી ફરજિયાત કરવા પર વિચારણા કરી રહ્યું છે અને આવા સર્વિસ પ્રોફેશનલ્સને પણ જીએસટી નંબર લેવો પડશે.

જોકે ઓનલાઇન પ્લેટફોર્મ સાથે સંકળાયેલ મોટા ભાગના પ્લમ્બર, ઇલેક્ટ્રિશિયન અને બ્યૂટિશિયન તેમજ ફિટનેસ ટ્રેનર્સની વાર્ષિક આવક રૂ.૪૦ લાખથી ઓછી છે અને તેથી તેમણે જીએસટી ચૂકવવો નહીં પડે. સરકાર આ પગલંુ આવા પ્રોફેશનલ્સના ડેટાબેઝ તૈયાર કરવાના હેતુથી ભરનાર છે.

એક વરિષ્ઠ અધિકારીએ પોતાનું નામ જાહેર નહીં કરવાની શરતે જણાવ્યું હતું કે આ પ્રોફેશનલ્સ લોકોના ઘરે જાય છે અને તેમની ઓળખ કરવાનો અમારી પાસે બીજો કોઇ માર્ગ નથી. શકય છે કે તેમને કદાચ જીએસટી ચૂકવવો નહીં પડે અને ત્રિમાસિક ફાઇલિંગ પણ કરવું નહીં પડે, પરંતુ જો તેઓ નેટવર્ક પર રજિસ્ટર્ડ હોય તો કોઇ અનિચ્છનીય ઘટનાની સ્થિતિમાં તેમને શોધી શકાય. અર્બનક્લેપે આ મુદ્દા પર કોઇ પણ ટિપ્પણી કરવાનો ઇનકાર કર્યો છે. અધિકારીએ એમ પણ જણાવ્યું હતું કે આ પ્રોફેશનલ્સને જોડનારી કંપનીઓને તમામ કામગીરીના હિસાબ રાખવાનું જણાવાશે.