તમારા કામનું / ગમે ત્યારે ગમે ત્યાં ડ્રોન ન ઉડાવતા, 1 લાખ રૂપિયાનો થશે દંડ, જાણી લો શું છે નિયમ

• ડ્રોન રૂલ્સ 2021ના ઉલ્લંઘન પર 1 લાખ રૂપિયા સુધીનો દંડ
• નેનો અથવા માઇક્રો કેટેગરીના ડ્રોનનો ઉપયોગ માટે પરમિટ જરૂર નથી 
• Digital Sky પોર્ટલ પર મળશે તમને સંપૂર્ણ માહિતી 

ડ્રોન માટેના નિયમ ભંગ પર લાગશે દંડ 
Unmanned Aircraft Sytems એટલે કે ડ્રોન ભારત માટે નવા નથી. તેનો ઉપયોગ લગ્નમાં વીડિયો શૂટ કરવાથી લઈને ઈન્સ્ટાગ્રામ રીલ્સ બનાવવા સુધીમાં કરવામાં આવી રહ્યો છે. સરકારે ડ્રોન ઉડાડવા માટે અનેક નિયમો બનાવ્યા છે. આ માટે એક અલગ વેબસાઈટ પણ જાહેર કરવામાં આવી છે. આના પર તમને ડ્રોન ઉડાવવા માટે લાયસન્સથી લઈને રૂટ સુધીની જાણકારી મળશે. ડ્રોન રૂલ્સ 2021ના ઉલ્લંઘન પર 1 લાખ રૂપિયા સુધીના દંડની જોગવાઈ છે. હવે સવાલ એ થાય છે કે, શું લગ્નમાં ઉપયોગમાં લેવાતા ડ્રોન નિયમો હેઠળ ઉડે છે? શું તમારે આવા ડ્રોનનો ઉપયોગ કરતા પહેલા પરમિટ લેવી પડે છે? આવા જ કેટલાક સવાલોના જવાબ તમને આ પોસ્ટ માં મળી જશે.

ડ્રોનની પાંચ કેટેગરી
ભારતમાં ડ્રોનને પાંચ કેટેગરીમાં વહેંચવામાં આવ્યા છે. 250 ગ્રામથી ઓછા વજનવાળા ડ્રોનને નેનો કહેવામાં આવે છે. આ સાથે જ તેનાથી વધુ વજન ધરાવતા અને 2 કિલો સુધી વજન ધરાવતા ડ્રોનને માઈક્રોની કેટેગરીમાં, 2થી 25 કિલો વજનના ડ્રોનને સ્મોલ કેટેગરીમાં, 25 થી 150 કિલો વજનના ડ્રોનને મીડિયમ ડ્રોનની કેટેગરીમાં મૂકવામાં આવ્યા છે અને 150 કિલોથી વધુ વજન ધરાવતા ડ્રોનને મોટા ડ્રોનની કેટેગરીમાં મૂકવામાં આવ્યા છે.

શું તમારે પરમિટ લેવી પડશે ?
તમારે તમામ પ્રકારના ડ્રોન માટે પરમિટની જરૂર નથી. જો તમે નેનો અથવા માઇક્રો કેટેગરીના ડ્રોનનો ઉપયોગ કરોછો, તો તમારે આ માટે કોઈ પણ રીતે પરમિટની જરૂર નથી. હા, ઉપરની કેટેગરી માટે તમારે UNI એટલે કે યુનિક આઇડેન્ટિફિકેશન નંબરની જરૂર પડે છે. લગ્નમાં અને સામાન્ય વીડિયો બનાવવા માટે ઉપયોગમાં લેવાતા ડ્રોનનું વજન ૨ કિલોથી પણ ઓછું હોય છે. આવી સ્થિતિમાં, તેમના માટે કોઈ પરવાનગીની જરૂર નથી. ડ્રોન ઉડાડવાના કેટલાક નિયમો છે. જેમ કે તમે ડ્રોનને ક્યાં ઉડાડી શકો છો અને ડ્રોનને તમે કેટલી ઉંચાઇ સુધી ઉડાવી શકો છો. 

અહીંથી મળશે માહિતી
આ તમામની માહિતી તમને Digital Sky પોર્ટલ પર મળશે. અહીં ડ્રોન ઉડાડવા માટે એરિયલ મેપ આપવામાં આવ્યો છે, જેમાં તમને ગ્રીન, યલો અને રેડ ઝોન વિશે માહિતી મળશે. ડ્રોન રૂલ્સ 2021ના ઉલ્લંઘન પર 1 લાખ રૂપિયા સુધીનો દંડ લાગી શકે છે.