આંધ્રપ્રદેશના ઘણા જિલ્લામાં ગધેડાના ગેરકાયદેસર માંસના વેચાણનો વેપાર ફૂલીફાલી રહ્યો છે.
આંધ્રમાં ગધેડાના માંસનો વેપાર ફૂલોફાલ્યો
ગધેડાનું માંસ સ્વાદિષ્ટ અને તાકાતમાં વધારો કરતું હોવાનો લોકોનો દાવો
આડેધડ કતલને કારણે રાજ્યમાં ગધેડાની સંખ્યા ઘટી
આંધ્રપ્રદેશમાં ગધેડાના અદ્રશ્ય થવા પાછળ એક વિચિત્ર અને હેરાનીભર્યું કારણ સામે આવ્યું છે. ગોદાવરી, કૃષ્ણા, પ્રકાસમ અને ગુટુર જિલ્લામાં ગધેડાના માંસના વેચાણમાં ખૂબ જ મોટો વધારો થયો છે અને તેને માટે ગેરકાયદેસર અને આડેધડ ગધેડાની કતલ કરવામાં આવશે.
ગધેડાના માંસથી શક્તિ અને જોશમાં વધારો થાય છે-લોકોનો દાવો
આંધ્રના વેસ્ટ ગોદાવરી, કૃષ્ણા, પ્રકાસમ અને ગુટુર જિલ્લામાં ગધેડાનું માંસ ખાવું સર્વસામાન્ય છે. ગધેડાનું માંસ ખાવાના શોખીનનો દાવો છે કે ગધેડાના માંસથી શક્તિ અને જોશમાં વધારો થાય છે. એટલે લોકો મોંઘા ભાવે પણ ગધેડાનું માંસ ખરીદીને ખાઈ રહ્યાં છે.
આંધ્રપ્રદેશમાં ગધેડાના માંસનુ એક ગેરકાયદેસર મોટું રેકેટ ચાલી રહ્યું છે. એક ગેંગ ગધેડાની ખરીદી કરે છે જ્યારે બીજી ગેંગ ગધેડાની કતલ કરીને ખૂબ ઊંચા ભાવે માંસ વેચી રહી છે.
રાજ્યમાં ખૂબ જુજ સંખ્યામાં ગધેડા બચ્યાં
આડેધડ કતલને કારણે રાજ્યમા ગધેડાની સંખ્યામાં સતત ઘટાડો થઈ રહ્યો છે અને રાજ્યમાં ખૂબ જુજ સંખ્યામાં ગધેડા બચ્યાં છે.
રાજ્યના એનિમલ રેસ્ક્યુ ઓર્ગેનાઈઝેશનના સચિવ ગોપાલ આર સુરબથુલાએ કહ્યું કે આંધ્રમાંથી અદ્રશ્ય થયા હોવાથી ગધેડાને રાજસ્થાન, યુપી, તમિલનાડુ, મહારાષ્ટ્ર અને કર્ણાટકમાંથી લાવવામાં આવી રહ્યાં છે.
સરકારની રહેમરાહે ગધેડાના માંસનું વેચાણ ચાલી રહ્યું હોવાનું લાગી રહ્યું છે. તાજેતરમાં એક એનજીઓએ અચાનક જ ગધેડાના માંસની બજાર પહોંચીને થોડી તસવીરો પાડી હતી. એનજીઓએ વેસ્ટ ગોદાવરી એડમિનીસ્ટ્રેશનને ગધેડાના ગેરકાયદેસર કતલની પણ ફરિયાદ કરી હતી. એનજીઓના અધિકારીએ કહ્યું કે રાજ્ય સરકારે ગધેડાનું રક્ષણ કરવું જોઈએ. કાયદાનું પાલન કરાવનાર એજન્સીઓએ ગધેડાની કતલને અટકાવીને તેનું રક્ષણ કરવું જોઈએ.
ફરિયાદ વધતા સરકાર સફાળી જાગી
વેસ્ટ ગોદાવરીમાં પશુપાલન વિભાગના જોઈન્ટ ડિરેક્ટર જી નહેરુ બાબુએ જણાવ્યું કે ગધેડાની કતલ ગેરકાયદેસર છે, આ ગુનામાં સંડોવાયેલા લોકોની સામે આકરા પગલા ભરવામા આવશે. લોકોની ખોટી માન્યતાનો શિકાર ગધેડા બની રહ્યાં છે. અમે ગધેડાના માંસનો વેપાર અટકાવીશું.