અમેરિકાના પ્રમુખ ડોનાલ્ડ ટ્રમ્પે ઈરાનના સુપ્રીમ લીડર અયાતોલ્લા અલી ખોમેનીને આકરા શબ્દોમાં ચેતવણી આપી છે. ટ્રમ્પે એક ટ્વિટમાં કહ્યું હતું કે ખોમેની પોતાના શબ્દો પ્રત્યે ખૂબ જ સાવધાન રહે. ખોમેનીએ ગઈ કાલે જુમ્માની નમાજમાં ઈરાનના જનરલ કાસિમ સુલેમાનીની હત્યા 'અમેરિકા માટે શરમજનક' ગણાવી હતી.
ટ્રમ્પે કહ્યું હતું કે, ઈરાનના કથિત 'સુપ્રીમ લીડર' હાલના સમયમાં એટલા સુપ્રીમ રહ્યા નથી
ખોમેનીએ કહ્યું હતું, કાસિમ સુલેમાનીની હત્યા 'અમેરિકા માટે શરમજનક'
ટ્રમ્પે ટ્ટિટ કર્યું હતું કે ઈરાનના કથિત 'સુપ્રીમ લીડર', જે હાલના સમયમાં એટલા સુપ્રીમ રહ્યા નથી તેમણે અમેરિકા અને યુરોપ વિરુદ્ધ આડાઅવળી વાતો કરી છે. તેમની (ઈરાન) અર્થવ્યવસ્થા તૂટી રહી છે અને તેમના લોકો મુશ્કેલી ભોગવી રહ્યા છે. તેમણે (ખોમેનીએ) પોતાના શબ્દો વિશે ખૂબ સાવધાન રહેવું જોઈએ.
ટ્રમ્પના જણાવ્યા અનુસાર ખોમેનીએ પોતાના ઉશ્કેરણીજનક નિવેદનમાં અમેરિકાને 'શાતિર' અને યુરોપિયન દેશો બ્રિટન, ફ્રાન્સ અને જર્મનીને 'અમેરિકાના નોકર' ગણાવ્યા હતા તે અયોગ્ય નિવેદન છે.
અન્ય એક ટ્વિટમાં ડોનાલ્ડ ટ્રમ્પે ઈરાનની પ્રજાને સંબોધિત કરતાં લખ્યું કે અમેરિકાને પ્રેમ કરતા ઈરાનના લોકોને એક એવી સરકાર મેળવવાનો હક છે, જે તેમને મારવાના બદલે તેમનાં સપનાં પૂરાં કરવામાં રસ ધરાવતી હોય. ટ્રમ્પે પોતાના ટ્વિટમાં ઈરાની નેતાઓને અપીલ કરી કે તેમણે પોતાના દેશને બદબાદી તરફ લઈ જવાના બદલે આતંકનો ત્યાગ કરવો જોઈએ અને ઈરાનને ફરીથી મહાન બનાવવું જોઈએ.