સત્તાના દુરુપયોગના આરોપમાં અમેરિકાના રાષ્ટ્રપ્રમુખ ડોનાલ્ડ ટ્રમ્પ વિરુદ્ધ નીચલા ગૃહ હાઉસ ઓફ રિપ્રેઝન્ટેટિવમાં યોજાયેલ ઐતિહાસિક મતદાનમાં મહાભિયોગ પ્રસ્તાવ પાસ થઇ જતાં હવે ડોનાલ્ડ ટ્રમ્પની પ્રમુખપદની ખુરશી સામે જોખમ ઊભું થયું છે. હવે તેમને અમેરિકાના પ્રમુખપદેથી હટાવવા માટે ઉપલા ગૃહ સેનેટમાં તેમની વિરુદ્ધ મહાભિયોગની પ્રક્રિયા હાથ ધરાશે.
મહાભિયોગ પ્રસ્તાવની તરફેણમાં ર૩૦ અને વિરોધમાં ૧૯૭ મત પડ્યા
નીચલા ગૃહમાં મહાભિયોગ પ્રસ્તાવ પાસ ; હવે સેનેટમાં પ્રક્રિયા શરૂ થશે
વિપક્ષ ડેમોક્રેટ્સની બહુમતી ધરાવતા હાઉસ ઓફ રિપ્રેઝન્ટેટિવમાં મહાભિયોગ પ્રસ્તાવની તરફેણમાં ર૩૦ અને વિરોધમાં ૧૯૭ મત પડ્યા હતા. આ રીતે અમેરિકાના ઇતિહાસમાં ડોનાલ્ડ ટ્રમ્પ દેશના એવા ત્રીજા રાષ્ટ્રપ્રમુખ બની ચૂક્યા છે.
યુક્રેન વિવાદ બન્યો મહાભિયોગનું કારણ
યુક્રેન વિવાદ બાદ સ્પીકર નેલ્સી પોલોસીએ ડોનાલ્ડ ટ્રમ્પ પર સત્તાના દુરુપયોગનો આક્ષેપ કરીને મહાભિયોગ લાવવાની વાત કરી હતી. ગુરુવારે છ કલાક સુધી ચાલેલી ચર્ચા બાદ મતદાન થયું ત્યારે બે આર્ટિકલ હેઠળ મહાભિયોગ પ્રસ્તાવ પાસ કરી દેવામાં આવ્યો છે.
નિષ્પક્ષ પ્રક્રિયાનું પાલન થયું નથી : ટ્રમ્પનો આક્ષેપ
આ પ્રસ્તાવ પાસ થયા બાદ વ્હાઇટ હાઉસે પોતાના નિવેદનમાં જણાવ્યું છે કે ડોનાલ્ડ ટ્રમ્પને આશા છે કે સેનેટ યોગ્ય રીતે આ પ્રક્રિયા પૂરી કરશે. નિષ્પક્ષ પ્રક્રિયાનું પાલન હાઉસ ઓફ રિપ્રેઝન્ટેટિવમાં કરવામાં આવ્યું નથી. હવે આગળની જે પણ પ્રક્રિયા હશે તેના માટે ડોનાલ્ડ ટ્રમ્પ તૈયાર છે.
સેનેટમાં ડેમોક્રેટ્સને કપરા ચઢાણ
હાઉસ ઓફ રિપ્રેઝન્ટેટિવમાં વિરોધ પક્ષ ડેમોક્રેટ્સની બહુમતી હતી, પરંતુ ઉપલા ગૃહ સેનેટમાં બહુમતી નથી. અમેરિકન સેનેટમાં કુલ ૧૦૦ સભ્ય છે, તેમાં પ૩ રિપબ્લિકન પાર્ટીના, ૪પ ડેમોક્રેટ અને બે અપક્ષ સભ્ય છે.
સેનેટમાં હવે ડોનાલ્ડ ટ્રમ્પ પર લગાવવામાં આવેલા આરોપની એક ટ્રાયલ લેવામાં આવશે. સેનેટમાં ટ્રાયલની પ્રક્રિયા ૬ જાન્યુુઆરી બાદ ચાલશે, જે અનેક સપ્તાહ સુધી ચાલી શકે છે. ટ્રાયલ બાદ સેનેટમાં આ પ્રસ્તાવ પર મતદાન થશે. જો મતદાનમાં પ્રસ્તાવ ઊડી જશે તો ડોનાલ્ડ ટ્રમ્પ અમેરિકાના પ્રમુખપદે યથાવત્ રહેશે, પરંતુ જો પ્રસ્તાવ પાસ થશે તો તેમણે રાજીનામું આપવું પડશે અને તેમના સ્થાને વાઇસ પ્રેસિડેન્ટ ટેક ઓવર કરશે.