કિમના નિવેદનથી ભડક્યા ડોનાલ્ડ ટ્રમ્પ રદ કરી સિંગાપોરની બેઠક

અમેરિકાના રાષ્ટ્રપતિ ડોનાલ્ડ ટ્રમ્પે ગઈકાલે એટલે કે ગુરુવારે ઉત્તર કોરિયાના નેતા કિમ જોંગ ઉન સાથે આગામી 12 જૂનનારોજ યોજાનારી બેઠક રદ કરી દીધી છે. વ્હાઈટ હાઉસ દ્વારા આ અંગે એક પત્રમાં માહિતી આપવામાં આવી હતી. 

આ પત્રમાં ટ્રમ્પને જણાવાયું હતું કે હું તમને મળવા ઘણો આશાવાદી હતો પરંતુ દુ:ખની વાત એ છે કે તાજેતરમાં તમે કરેલા નિવેદનોમાં જબરજસ્ત ગુસ્સો અને ખુલી રીતે શત્રુતાનો આભાસ થયો છે. મને લાગી છે કે આવા સમયે બેઠક યોજવી યોગ્ય નથી. ઉત્તર કોરિયાએ રાષ્ટ્રપતિ ડોનાલ્ડ ટ્રમ્પ સાથે વાતચીત મુદ્દે ઉત્તર કોરિયાને ચેતવણી આપવા બદલ યુએસના ઉપ રાષ્ટ્રપતિ માઈક પેન્સને અજ્ઞાની અને મૂર્ખ ગણાવ્યા હતા. 

પેન્સે સોમવારે પત્રકારો સાથેની વાતચીત દરમિયાન ઉ. કોરિયાના નેતા કિમ જોંગ ઉનને ચેતવતા કહ્યું હતું કે ટ્રમ્પને અજમાવવા અને તેમની સાથે ખીલવાડ કરવો ભારે ભૂલ સાબિત થશે. પેન્સના આ નિવેદન પર ઉ. કોરિયાના વિદેશી બાબતોના ઉપ મંત્રી ચો સન હુઈએ તેમને અજ્ઞાની અને મૂર્ખ ગણાવ્યા હતા. 

આ ઉપરાંત પેન્સે પોતાની ચેતવણીમાં એમ પણ જણાવ્યું હતું કે જો કિમ જોંગ ઉન કોઈ સમજૂતિ નહીં કરે તો ઉ. કોરિયાની હાલત લિબિયા જેવી થઈ શકે છે જેના નેતા મોહમ્મદ ગદ્દાફીની અમેરિકન સમર્થિત વિદ્રોહીઓએ હત્યા કરી દીધી હતી.