USA / વ્હાઈટ હાઉસ છોડતા પહેલાં ટ્રમ્પ એવું કામ કરીને જવાની ફિરાકમાં કે બાયડનની મુશ્કેલીઓ વધી જશે

• જતા જતા બાયડનની મુશ્કેલીઓ વધારી શકે છે ડોનાલ્ડ ટ્રમ્પ 
• ટ્રમ્પ એવા નિર્ણય લઇ શકે જેથી બાયડન પર ચીન સામે કડક વલણ રાખવાનું જ દબાણ રહે 
• 20મી જાન્યુઆરી સુધી ટ્રમ્પનો કાર્યકાળ, ચીન વિરુદ્ધ મોટા એક્શનની તૈયારી 

ટ્રમ્પ બાયડન માટે ઉભી કરશે મુશ્કેલી 

મહાસત્તા અમેરિકામાં મહાસંઘર્ષ બાદ હવે બાયડન રાષ્ટ્રપતિ પદની ચૂંટણી જીતી ગયા છે અને ટ્રમ્પનો કારમો પરાજય થયો છે. મતગણતરીમાં ટ્રમ્પ વિવિધ આરોપો લગાવતા રહ્યા પરંતુ આખરે હાર જ થઇ, એવામાં હવે રાજસિંહાસન છોડતા પહેલા ચીન મુદ્દે ટ્રમ્પ મોટો નિર્ણય લે તેવી શકયતા છે. નિષ્ણાતો માની રહ્યા છે કે ટ્રમ્પ એવો નિર્ણય લઇ શકે છે કે જે આવનાર રાષ્ટ્રપતિ માટે માથાનો દુઃખાવો સાબિત થશે.  

સીનેટની મંજૂરી જરૂરી નથી 

કોરોના વાયરસ મહામારીને લઈને ટ્રમ્પ સતત ચીન પર આરોપ લગાવતા રહ્યા છે અને એવામાં આશંકા છે કે વેપાર ક્ષેત્રમાં તે ચીનને લઈને મોટા નિર્ણયો લેશે. એક અહેવાલ અનુસાર અમેરિકાની વિદેશ નીતિ માટે ટ્રમ્પ એક્ઝીક્યુટીવ ઓર્ડરના માધ્યમથી પરિવર્તન કરી શકે છે તેના માટે તેઓ સિનેટની મંજૂરી લેવા માટે બંધાયેલા નથી. ટ્રમ્પ પેઇચિંગ વિરુદ્ધ એક્શન લઇ શકે છે. 

બાયડન માટે ઉભી કરશે મુશ્કેલી 

આ સિવાય ટ્રમ્પ શિનજિયાંગમાં ઉઈગુર મુસ્લિમોના નરસંહારને લઈને પણ ચીનને સતત અપરાધી ઠેરવતા આવ્યા છે. ટ્રમ્પ ચીની કમ્યુનિસ્ટ પાર્ટીના અધિકારીઓ પર વિઝા બેન લગાવી શકે છે. એવું માનવામાં આવી રહ્યું છે કે 2022માં ચીનમાં થનાર વિન્ટર ઓલમ્પિકમાં સામેલ ન થવા માટે અમેરિકાના એથ્લીટને આદેશ આપી શકાય છે.  

હવે જો ટ્રમ્પ આવા કોઈ પણ નિર્ણય લે છે તો તેની કિંમત બાયડને ચુકવવાની રહેશે, આ પહેલા ટ્રમ્પે ચીની વસ્તુની આયાત પર ટેક્સ, એપ પર પ્રતિબંધ જેવા નિર્ણયો કર્યા છે. એવામાં જો ટ્રમ્પ જતા જતા કૉઈ નિર્ણય લે તો તે બાયડન માટે એક પડકાર સાબિત થઇ શકે છે.