ચીનના રાષ્ટ્રપ્રમુખ જિન પિંગે અને અમેરિકાના રાષ્ટ્રપ્રમુખ ડોનાલ્ડ ટ્રમ્પે આજે ટેલિફોન ઉપર કોરોના વાયરસ મુદ્દે ચર્ચા કરી હતી. નોંધનીય છે કે આજે અમેરિકામાં પોઝીટીવ કેસની સંખ્યા ચીનના કેસને વટાવી ગઈ છે. બંને રાષ્ટ્રના નેતાઓ એક અથવા બીજી બાબતથી એકબીજાથી નાખુશ જણાય છે.
અત્યારે બંને દેશો સાથે મળીને કામ કરે એ જરૂરી: જિન પિંગ
કોરોના વાયરસ સમગ્ર માનવજાતનો દુશ્મન: જિન પિંગ
અમેરિકામાં વધુ ટેસ્ટ થતા હોવાથી વધુ કેસ બહાર આવ્યા: ટ્રમ્પ
જિન પિંગે ટ્રમ્પમને અમેરિકા અને ચીનના સંબંધોમાં તત્કાળ સુધારો લાવવા માટે જણાવ્યું હતું. ચીન કોરોના વાયરસનો બીજો વેવ પોતાના દેશમાં ન આવે એ માટે પોતાના દેશની સરહદો બંધ કરવાની યોજના ઘડી રહ્યું છે.
ચીનની મીડિયાના જણાવ્યા પ્રમાણે જિન પિંગે કહ્યું હતું કે અત્યારે બંને દેશો સાથે મળીને કામ કરે એ જરૂરી છે. તણાવભર્યા સંબંધો બંને દેશો માટે નુકશાનકારક છે. હવે બંને પક્ષે સૌહાર્દ અને સન્માનભર્યા સંબંધો રહે તેવી ચીન આશા રાખે છે.
કોરોના વાયરસ સમગ્ર માનવજાતનો દુશ્મન: જિન પિંગ
નોંધનીય છે કે આ તમામ ચર્ચા પછી પણ ટ્રમ્પ કોરોના વાયરસને ચાઇનીઝ વાયરસ કહે છે. આ આક્ષેપ સામે ચીનના અધિકારીઓએ એવો દાવો કર્યો છે કે આ વાયરસ મૂળ અમેરિકાથી ફેલાવાનો શરુ થયો છે. જિન પિંગે એવી આશા વ્યક્ત કરી છે કે ટ્રમ્પ અમેરિકામાં રહેતા ચીનના નાગરિકોના જીવની પણ રક્ષા કરશે. આ ઉપરાંત તેમણે એમ પણ કહ્યું છે કે આ વાયરસ સમગ્ર માનવજાતનો દુશ્મન છે. તેને હરાવવા માટે બધા દેશોએ એકતા રાખવી પડશે.
આ વાતચીત પછી ટ્રમ્પે પોતાના Twitter એકાઉન્ટ ઉપર એમ લખ્યું હતું કે તેમની જિન પિંગ સાથે ઘણી સારી વાતચીત થઇ છે. અને ચીન આ વાયરસ ઉપર ઘણી સારી માહિતી મેળવી ચુક્યું છે જેના આધારે તે US ની મદદ કરવા માટે તત્પર છે.
Just finished a very good conversation with President Xi of China. Discussed in great detail the CoronaVirus that is ravaging large parts of our Planet. China has been through much & has developed a strong understanding of the Virus. We are working closely together. Much respect!
ચીનમાં છેલ્લા કેટલાક દિવસોથી સ્થાનિક રીતે નવા કેસ આવતા બંધ થઇ ગયા છે. હવે વિદેશથી આવેલા નાગરિકો ફરીથી ચીનમાં કોરોનાવાયરસ ન ફેલાવી દે તે માટે ચીનની સરકારે શુક્રવારથી ચીનમાં પ્રવેશતી ફ્લાઈટની સંખ્યા ખૂબ જ ઘટાડી દેવાનો નિર્ણય કર્યો છે. ચીનના લોકો સરકારના આ નિર્ણયને સમર્થન આપી રહ્યા છે.
અમેરિકામાં વધુ ટેસ્ટ થતા હોવાથી વધુ કેસ બહાર આવ્યા હોવાનો ટ્રમ્પનો દાવો
અમેરિકા અત્યારે વિશ્વમાં સૌથી વધુ કોરોના કેસમાં ટોચના સ્થાને છે જ્યાં ૮૫૦૦૦થી વધુ કોરોના પોઝીટીવ કેસ છે. આ મુદ્દે ટ્રમ્પને પ્રશ્ન પૂછવામાં આવતા ટ્રમ્પે કહ્યું હતું કે આ આંકડા એટલે વધારે જણાય છે કારણ કે અમેરિકામાં ટેસ્ટ બીજા દેશો કરતા સૌથી વધુ થાય છે. ચીનમાં ટેસ્ટનો આંકડો હકીકતમાં કેટલો છે એ જાણવું અઘરું છે એમ ટ્રમ્પનું માનવું છે.