Coronavirus / કોરોના ન થાય તે માટે ટ્રમ્પ 10 દિવસથી આ દવા લઈ રહ્યાં હોવાનો દાવો, ભારતનો માન્યો હતો આભાર

અમેરિકાના રાષ્ટ્રપતિ ટ્રમ્પે પત્રકારોને જણાવ્યું હતું કે તેઓ લગભગ દોઢ અઠવાડિયાથી દરરોજ દવા, હાઇડ્રોક્સાઇક્લોરોક્વિન અને ઝીંક સપ્લિમેન્ટ લઇ રહ્યાં છે. રાષ્ટ્રપતિ ટ્રમ્પે જણાવ્યું કે તેમણે આ દવા ખાવા માટે વ્હાઇટ હાઉસના ડોક્ટર પાસે સૂચનો માંગ્યા હતા અને તેમણે આ માટે તેમની સંમતિ આપી હતી.

ટ્રમ્પે જણાવ્યું કે મે ડોકટરોને પૂછ્યું કે તમારી શું સલાહ છે ત્યારે તેઓએ જવાબ આપ્યો, જો તમે ઇચ્છતા હો તો લઇ શકો છો. 

જો કે અમેરિકાના રાષ્ટ્રપતિ ડોનાલ્ડ ટ્રમ્પ કોરોના પોઝિટિવ નથી જેના કારણે તેઓને આ દવાનું સેવન કરવાની કોઇ જરૂરિયાત નથી. 

યુએસના રાષ્ટ્રપતિ ટ્રમ્પે કહ્યું કે મે આ દવા લેવાનું એટલા માટે શરૂ કર્યું કે મને આ લેવી ગમે છે. મે આ દવાને લઇને ઘણી સકારાત્મક વાત સાંભળી છે. ટ્રમ્પે દવાની આડઅસરની ખબરોનું ખંડન કરતાં કહ્યું કે હું તમને બધાને કહી શકું છું કે હવે હું સાજો છું. 

ગત મહિને ભારત દ્વારા અમેરિકામાં કોવિડ-19 ના દર્દીઓના ઇલાજ માટે હાઇડ્રોક્સીક્લોરોક્વીનનો જથ્થો મોકલવાની મંજૂરી આપવામાં આવી હતી. અમેરિકામાં હાલ કોરોના વાયરસ મહામારીનો કહેર જોવા મળી રહ્યો છે.