નમસ્તે ટ્રમ્પ / ટ્રમ્પ આવ્યા ત્યારે વડાપ્રધાન મોદીના કાફલામાં રખડતું કુતરૂં ઘુસ્યુંને પછી થયું એવું...

• નમસ્તે ટ્રમ્પ કાર્યક્રમ અને શાનદાર રોડ શો યોજાયો હતો
• તકેદારી છતાં ઘટનાએ શહેરમાં કૂતરાંનો ત્રાસ કેટલો ગંભીર છે તે સાબિત કર્યું
• કૂતરાંએ રોડ પર લટાર મારતાં ઢોર ત્રાસ અંકુશ વિભાગના અધિકારીઓ હેબતાઇ ગયા હતા

મોટેરા સ્ટેડિયમ ખાતે ગત સોમવારે, મ્યુનિસિપલ કોર્પોરેશન દ્વારા વિશ્વની મહાસત્તા અમેરિકાના પ્રમુખ ડોનાલ્ડ ટ્રમ્પના ઉમળકાભેર સ્વાગત માટે નમસ્તે ટ્રમ્પ કાર્યક્રમ અને શાનદાર રોડ શો યોજાયો હતો. જેમાં વડા પ્રધાન નરેન્દ્ર મોદી પણ ઉપસ્થિત હતા. આ ભવ્યાતિભવ્ય કાર્યક્રમને વધાવવા માટે અમદાવાદીઓ દિવસોથી આતુર હતા અને મ્યુનિસિપલ તંત્ર પણ તડામાર તૈયારીમાં હતું.

તંત્ર દ્વારા મોટેરા અને તેની આસપાસના વિસ્તાર અને 22 કિ.મી. લાંબા રોડ શોના રૂટ પર એક પણ રખડતું કૂતરું કે ગાય મહાનુભાવોની નજરે ન પડે તે માટે પોતાની તમામ ટીમ કામે લગાડી હતી. દસ દિવસ અગાઉથી રખડતાં કૂતરાં અને ઢોર પકડીને દૂર કરાતાં હતાં. જોકે પીએમના કોન્વોય દરમિયાન અચાનક એક રખડતાં કૂતરાંએ રોડ પર લટાર મારતાં ઢોર ત્રાસ અંકુશ વિભાગના અધિકારીઓ હેબતાઇ ગયા હતા.