રશિયા પરના પ્રતિબંધો વચ્ચે રશિયન કંપનીઓ ભારતને સસ્તામાં ક્રૂડ ઓઈલ આપવા તૈયાર પણ અમેરિકાએ આ અહેવાલો પર નારાજગી વ્યક્ત કરી
અમેરિકાએ રશિયા પર આકરા પ્રતિબંધો લગાવ્યા
શું ભારત ખરીદશે રશિયા પાસેથી ઓઇલ ?
પ્રતિબંધોને સમર્થન આપવા અમેરિકાની છે અપીલ
યુક્રેન-રશિયા વચ્ચે ચાલી રહેલા યુદ્ધને પગલે વિવિધ દેશો દ્વારા રશિયા પર પ્રતિબંધો મૂકવામાં આવી રહ્યા છે. અમેરિકા સહિત ઘણા દેશોએ રશિયા પર આકરા આર્થિક પ્રતિબંધો લગાવ્યા છે. તેમજ જો બાઇડન પ્રશાસને ભારતની સાથે સાથે ઘણા દેશોને પણ અમેરિકી પ્રતિબંધોને સમર્થન આપવા અપીલ કરી છે. આ દરમિયાન એવા અહેવાલો આવ્યા છે કે ભારત રશિયા પાસેથી રાહત દરે ક્રૂડ ઓઈલ ખરીદવાની યોજના બનાવી રહ્યું છે. હવે ભારતીય વિદેશ મંત્રાલયે આ અહેવાલો પર પ્રતિક્રિયા આપી છે.
'તમામ શક્યતાઓ પર વિચાર કરીશું'
વિદેશ મંત્રાલયના પ્રવક્તા અરિંદમ બાગચીએ કહ્યું કે ભારત એક મોટો તેલ આયાતકાર દેશ હોવાના કારણે હંમેશા તમામ શક્યતાઓ પર વિચાર કરે છે. જ્યારે તેમને પૂછવામાં આવ્યું કે શું ભારત રશિયા દ્વારા સસ્તા ક્રૂડ ઓઈલની ઓફર પર વિચાર કરી રહ્યું છે? બાગચીએ સીધો જવાબ આપ્યો ન હતો. તેમણે કહ્યું, 'ભારત મોટાભાગનું તેલ આયાત કરે છે, તેની જરૂરિયાત આયાત દ્વારા પૂરી થાય છે. તેથી જ અમે વૈશ્વિક બજારમાં તમામ શક્યતાઓને ઉપયોગ કરતા રહીએ છીએ.
રશિયા મુખ્ય સપ્લાયર નથી
બાગચીએ કહ્યું કે રશિયા એ ભારત માટે તેલનો મોટો સપ્લાયર રહ્યો નથી. તેમણે કહ્યું કે અમે તેલના મોટા આયાતકાર છીએ અને અમે અમારી ઉર્જા જરૂરિયાતો માટે તમામ વિકલ્પો પર વિચાર કરી રહ્યા છે. જ્યારે બાગચીને પૂછવામાં આવ્યું કે આ ખરીદી રૂપિયા-રુબલ કરારના આધારે થઇ શકે છે ? તો તેમણે કહ્યું કે તેઓને આ અંગે કોઇ ખાસ માહિતી નથી.
'ભારત રાહ જોશે'
ભારત-રશિયા વેપાર પર રશિયા સામે પશ્ચિમી પ્રતિબંધોની અસર અંગેના અન્ય એક પ્રશ્નના જવાબમાં બાગચીએ કહ્યું કે ભારત રાહ જોશે. "અમે રશિયા સાથેના અમારા આર્થિક વ્યવહારો પર કોઈપણ એકપક્ષીય પ્રતિબંધોની અસરના મૂલ્યાંકનની રાહ જોઈશું," તેમણે કહ્યું. યુક્રેન પર રશિયાની સૈન્ય કાર્યવાહીના સંદર્ભમાં ભારતના વલણ વિશે પૂછવામાં આવતા બાગચીએ કહ્યું કે ભારત તમામ પક્ષોના સંપર્કમાં છે.
અમેરિકાએ શું કહ્યું ?
મહત્વનું છે કે અમેરિકાએ પણ કહ્યું હતુ કે ભારત જો રશિયાને સસ્તી કિંમતોમાં કાચા તેલની ખરીદી કરે છે તો આ અમેરિકી પ્રતિબંધોનું ઉલ્લંઘન નહી ગણાય. જો કે સાથે જ અમેરિકાએ સલાહ આપી હતી કે રશિયાનું સમર્થન એક હુમલાનું સમર્થન આપવા બરાબર છે. આવામાં ભારતે ન્કકી કરવાનું છે કે તમે ઇતિહાસમાં કયો પક્ષ નોંધાવા માંગો છો.