કોરોના વાયરસના પીડિતોની સારવાર કરી રહેલા એક ડૉક્ટરે પત્ની અને બાળકોને ખતરાથી બચાવવા માટે ગેરેજમાં ટેન્ટ લગાવીને રહેવાનો નિર્ણય લીધો છે. આ મામલો અમેરિકાના કેલિફોર્નિયાનો છે. કોરોના વાયરસથી દુનિયાભરમાં 30,800થી વધારે લોકોના મોત થઇ ચૂક્યા છે અને અમેરિકામાં પણ ઝડપથી ફેલાઇ રહ્યો છે.
કોરોના વાયરસથી દુનિયાભરમાં 30,800થી વધારે લોકોના મોત થઇ ચૂક્યા છે
ડૉક્ટર ટિમ્મી ચેન્ગ નથી ઇચ્છતા કે તેમના પરિવાર પર કોઇપણ પ્રકારનો ખતરો ઉભો થાય. ડેલી મેલના સમાચાર મુજબ, ડૉ. ચેન્ગ ક્રિટિકલ કેયર સ્પેશ્યાલિસ્ટ છે. તેઓ પોતાના ઘરના જ ગેરેજમાં ટેન્ટ લગાવીને રહેવા લાગ્યા છે. એક ટ્વિન મેટ્રેસ, લેપટોપ અને સ્નેક્સની સાથે તેઓ ટેન્ટમાં સમય વિતાવી રહ્યા છે.
હૉસ્પિટલમાં શિફ્ટ પૂર્ણ કર્યા બાદ ડૉ. ચેન્ગ ટેન્ટમાં જ રહે છે. ચેન્ગે ફેસબુક પર લખ્યું, મેં ખુદને હોમલેસ (જેનું કોઇ ઘર ન હોય) થવાનો નિર્ણય લીધો જેથી હું સંક્રમિત થઇ જાઉં તો મારા પરિવારને સંક્રમણ ન થાય.
તેઓએ એમ પણ જણાવ્યું કે એક રાત્રે તો તેઓએ પોતાની કારમાં જ પસાર કરી નાંખી હતી. ત્યાર પછીની ચાર રાત્રી તેઓએ હોસ્પિટલના કોલ રૂમમાં સુઇને વિતાવી. પાંચમાં દિવસે તેમની પત્ની એ જ ગેરેજમાં ટેન્ટ લગાવવાનો આઇડીયા આપ્યો.
ડૉ. ચેન્ગ કેલિફોર્નિયાના ઇરવિનમાં સ્થિત યૂસીઆઇ મેડિકલ સેન્ટરમાં કામ કરે છે. ચેન્ગ માને છે કે તેઓને ઘણા મહીના સુધી ટેન્ટમાં રહેવુ પડી શકે છે કેમકે અમેરિકામાં કોરોના વાયરસ પીડિતોની સંખ્યા સતત વધી રહી છે.
ડૉક્ટરનો પરિવાર તેમના ટેન્ટ પાસે સ્નેક્સ લઇને આવે છે, પરંતુ તેને ગેરેજના દરવાજા પાસે રાખી દે છે. ટેન્ટ પાસે તેમની કાર ઉભી રહે છે અને ત્યાંથી સીધા હોસ્પિટલ ચાલ્યા જાય છે.
ડૉક્ટર ચેન્ગે આ વાતને પોતાના ફેસબુક પર લખી છે, જેને હજારો વાર શૅર કરવામાં આવી છે. તેઓએ કહ્યું છે કે જો આપ ઇચ્છો છો કે હેલ્થ વર્કર્સ હોમલેસ ન થાય તો આપ ઘરોમાં રહો. અમેરિકાના કેલિફોર્નિયામાં 100થી વધારે લોકોના કોરોના વાયરસથી મોત થયા છે.