તંત્ર દ્વારા પ્રોજેક્ટ માટે રૂ.1.50 કરોડ ફાળવવામાં આવ્યા
શહેરમાં જાહેર પરિવહન ક્ષેત્રે દાયકાઓ જૂની AMTS ઉપલબ્ધ છે. AMTSનો વ્યાપ શહેરના ખૂણેખૂણે હોઈ તેની લોકપ્રિયતા મહદ્અંશે જળવાઈ રહી છે. જોકે AMTSના વધતાં જતાં ધાંધિયાંથી અનેક પેસેન્જર લાંબા સમયથી BRTS તરફ વળ્યા છે. BRTS બસ સર્વિસને તેની ઝડપ, નિયમિતતા અને સ્વચ્છતાના મામલે તેનો સીમિત વ્યાપ હોવા છતાં પેસેન્જર્સે ટૂંકા સમયગાળામાં જ ઉમળકાભેર વધાવી લીધી છે. હવે BRTS પણ પેસેન્જર્સ માટે ઉપયોગી સેવા બની ચૂકી છે, જેના કારણે મ્યુનિ. સત્તાવાળાઓ પણ આ સર્વિસને વધુ ને વધુ પેસેન્જરલક્ષી બનાવવાની દિશામાં ગંભીર બન્યા છે, જેનાં પરિણામે BRTSનાં વધુ છ બસ સ્ટેશનનાં ડોકિંગ એરિયાને આરસીસીના બનાવવા કવાયત આરંભાઈ છે.
અમદાવાદમાં BRTS સ્ટેશનના ડોકિંગ એરિયા RCCના બનશે
અમદાવાદમાં રોજના લાખો લોકો પેટિયું રળવા માટે રોજેરોજ ઘરની બહાર નીકળે છે. આ વર્ગ માટે તેમના નોકરી-ધંધાના સ્થળે જવા માટે AMTS સસ્તો અને ઘરની નજીકમાં મળી રહેતો વિકલ્પ છે, પરંતુ આ બસ સર્વિસમાં રોજે રોજનાં ધાંધિયાં હોઈ નોકરી-ધંધાનો સમય સાચવવા આજે દૈનિક બે લાખથી વધુ પેસેન્જર્સ BRTS પકડતા થયા છે. BRTSએ પણ લોકોનાં દિલમાં જાહેર પરિવહન સેવા ક્ષેત્રે મહત્ત્વનું સ્થાન મેળવી લીધું હોઈ હવે વધુ ને વધુ વિધાર્થીઓ BRTSનો ઉપયોગ કરી રહ્યા છે. રાત્રે AMTS બસ સર્વિસનાં ધાંધિયાં વધી ગયાં હોવાનાં કારણે પણ BRTS પેસેન્જર્સમાં વધુ વિશ્વસનીય બની છે. ગત ઓક્ટોબર મહિનાથી લોકો માટે મેટ્રો ટ્રેનનો ત્રીજો વિકલ્પ પણ ઉપલબ્ધ થયો છે. જોકે મેટ્રો ટ્રેન પણ રાતના આઠ વાગ્યા પછી મળતી નથી એટલે BRTSની ફાસ્ટ સર્વિસ પેસેન્જર્સમાં વખણાતી જાય છે.
છ BRTS સ્ટેશનના ડોકિંગ એરિયા RCC બનાવવાનો લેવાયો નિર્ણય
એક તરફ BRTSનો જાદુ વધતો જતો હોઈ તેના પેસેન્જર્સ અને આવકનો આંકડો વૃદ્ધિ પામતો જાય છે. બીજી તરફ મ્યુનિસિપલ સત્તાવાળાઓ પણ પેસેન્જર્સને રાહત આપવા માટે વિવિધ ઉપાય અમલમાં મૂકી રહ્યા છે. ખાસ તો જે તે BRTS બસ સ્ટેશનનાં ડોકિંગ એરિયાનો રોડ ડામરનો બનેલો હોઈ તેને સમય જતાં ઘસારો લાગે છે. BRTS બસનાં તોતિંગ પેંડાંની સતત અવરજવરના કારણે ડોકિંગ એરિયાના રોડ અમુક વાર બેસી જાય છે. આના કારણે BRTS તેનાં સ્ટેશને પહોંચે ત્યારે બસમાં બેસેલા પેસેન્જર્સને નબળા પડેલા રોડના કારણે નાના-મોટા આંચકા લાગે છે. સવાર-સાંજના પિક અવર્સ વખતે પેસેન્જર્સની ભારે ભીડમાં ખાસ કરીને મહિલાઓ, બાળકો અને વૃદ્ધો ભારે પરેશાનીમાં મુકાઈ જાય છે. આ ઉપરાંત બસ અને બસ સ્ટેશનના આગળના ભાગનાં સેન્સર વચ્ચે ઊંચા-નીચા રોડના કારણે મેચિંગ ન થવાથી સ્ટેશનના સ્લાઈડિંગ દરવાજા સરળતાથી ખૂલતા નથી. આ બધાં કારણસર તંત્રે આવાં બસ સ્ટેશનનાં ડોકિંગ એરિયાના ડામરના રોડને આરસીસીનો બનાવવાનો પ્રોજેક્ટ હાથ ધર્યો છે.
તંત્ર દ્વારા પ્રોજેક્ટ માટે રૂ.1.50 કરોડ ફાળવવામાં આવ્યા
મ્યુનિસિપલ કોર્પોરેશનના આ પ્રોજેક્ટ હેઠળ વધુ છ બસ સ્ટેશનને આવરી લેવામાં આવશે. અખબારનગર, ભાવસાર હોસ્ટેલ, મેમનગર, વાળીનાથ ચોક, ઝાંસી કી રાની અને ચંદ્રનગર બસ સ્ટેશન એમ કુલ છ બસ સ્ટેશનના ડોકિંગ એરિયાને આરસીસીનો બનાવવા માટે તંત્ર દ્વારા રૂ. 1.50 કરોડ મંજૂર કરાયા છે. BRTSના સત્તાવાળાઓ કહે છે, આનાથી આ બસ સ્ટેશનની બહાર મૂકેલા ઓટોમેટિક સ્વિંગ ગેટને પણ સરળતાથી ચાલુ-બંધ કરી શકાશે, જેના કારણે BRTSની અવરજવર બાધારહિત બનશે તેમજ તેના કોરિડોરમાં અન્ય ખાનગી વાહનોને પ્રવેશતાં રોકી શકાશે.
153 કિમી સુધી BRTSનો વ્યાપ છે
અત્યારે BRTS 89 કિમી લંબાઈના કોરિડોરમાં તો દોડે જ છે, પરંતુ તેની લોકપ્રિયતામાં વધારો થયો હોઈ તેને કોરિડોર બહાર પણ દોડાવાઈ રહી હોઈ શહેરમાં તેનો કુલ વ્યાપ 153 કિમીનો થયો છે.
200 ઈલેક્ટ્રિક બસનો કાફલો તંત્ર પાસે છે
BRTS કોરિડોરમાં રોજની સરેરાશ 331 બસ દોડતી હોઈ તેમાં પ્રદૂષણમુક્ત એવી ઈલેક્ટ્રિક બસ સૌથી વધુ એટલે કે 200 બસ છે, જ્યારે 50 સીએનજી અને 85 ડીઝલચાલિત બસ છે. હાલમાં 143 બસ સ્ટેશન અને 50 કેબિન સાથે 193 સ્ટેશન પર દોડતી બસથી તંત્રને દૈનિક રૂ. 20 લાખનો ઉલ્લેખનીય વકરો થઈ રહ્યો છે.