સોંઘવારી / હવે રેસ્ટોરન્ટમાં ખાવાનું થશે સસ્તું, ગ્રાહકોને નહીં આપવો પડે સર્વિસ ચાર્જ, જાણો સરકારનો આદેશ

• રેસ્ટોરેન્ટમાં જમવાના શૌખીન હવે ફાવી જવાના
• રેસ્ટોરન્ટ અને હોટલોમાં ખાવાનું થશે સસ્તું 
• હવે નહીં આપવો પડે સર્વિસ ચાર્જ 
• રેસ્ટોરન્ટ્સને ગ્રાહકો પાસેથી સર્વિસ ટેક્સ ન લેવાની સરકારની ચેતવણી
• 2 જુને થશે મોટી બેઠક 

જો તમને રેસ્ટોરન્ટમાં જમવાનું પસંદ હોય તો તમારા માટે સારા સમાચાર છે. હવે તમારે રેસ્ટોરન્ટમાં જમ્યા બાદ સર્વિસ ચાર્જ નહીં આપવો પડે. રેસ્ટોરન્ટ માલિકો હવે ગ્રાહકોને સર્વિસ ચાર્જ ચૂકવવા માટે દબાણ કરી શકશે નહીં.  ગ્રાહક બાબતોના વિભાગે 2 જૂને એક મોટી બેઠક બોલાવી છે, જેમાં હોટલ, રેસ્ટોરન્ટ, તેમની સાથે સંકળાયેલી સંસ્થાઓ સામેલ થશે.કેન્દ્ર સરકાર હેઠળના ખાદ્ય વિભાગે ગ્રાહકો પાસેથી સર્જિસ ચાર્જ વસૂલતી રેસ્ટોરન્ટ અને હોટલોને ચેતવણી આપીને આવું બંધ કરવાનું જણાવ્યું છે. રેસ્ટોરન્ટ્સે સર્વિસ ચાર્જને નામે ગ્રાહકો પાસેથી જે પૈસા પડાવી રહી છે તેની કેન્દ્ર સરકારે નોંધ લીધી છે અને તેથી હવે સરકારે રેસ્ટોરન્ટ્સને ગ્રાહકો પાસેથી સર્વિજ ચાર્જ લેવાનું બંધ કરવાનું કહ્યું છે. 

ગ્રાહકો પાસેથી સર્વિસ ચાર્જ ન લઈ શકાય- સરકારે રેસ્ટોરન્ટ અને હોટલોને કહ્યું 

ભારત સરકારના ઉપભોક્તા બાબતોના સચિવ રોહિત કુમાર સિંહ દ્વારા નેશલ રેસ્ટોરન્ટ એસોસિએશન ઓફ ઈન્ડીયાના પ્રેસિડન્ટને લખવામાં આવેલા પત્રમાં એવું જણાવ્યું કે રેસ્ટોરન્ટ અને હોટલો ગ્રાહકો પાસેથી સર્વિસ ચાર્જ વસૂલી રહી છે જોકે સર્વિસ ચાર્જ લેવો વૈકલ્પિક છે અને ફરજિયાત નથી. 

2 જુને સરકારે બોલાવી મોટી બેઠક 
આ બેઠકની અધ્યક્ષતા ગ્રાહક બાબતોના વિભાગના સચિવ રોહિત સિંહ કરશે. આ બેઠકમાં એનઆરએઆઈને પણ બોલાવવામાં આવ્યા છે. આ બેઠકમાં ઘણા મોટા મુદ્દાઓ પર ચર્ચા કરવામાં આવશે. આ ઉપરાંત ઝોમેટો, સ્વિગી, દિલ્હીવેરી, ઝેપ્ટો, ઓલા, ઉબેર જેવા પ્રોવાઇડર્સને પણ આ બેઠકમાં આમંત્રણ આપવામાં આવ્યું છે.

સરકારે શા માટે લીધો નિર્ણય 
વાસ્તવમાં ગ્રાહક હેલ્પલાઈન પર આ વિષયને લઈને સતત ફરિયાદો બાદ સરકારે આ મોટો નિર્ણય લીધો છે. રેસ્ટોરન્ટ સર્વિસ ચાર્જને નામે ગ્રાહકો પાસેથી મનમાની રીતે પૈસા ઉઘરાવી રહી હતી તેને કારણે સરકારે આવો નિર્ણય લેવો પડ્યો છે. 

શું છે સર્વિસ ચાર્જની ગાઇડલાઇન્સ?
નોંધનીય છે કે, 21 એપ્રિલ 2017ના રોજ જાહેર કરવામાં આવેલા સર્વિસ ચાર્જ અંગે ભારત સરકારની ગાઇડલાઇન્સમાં જણાવાયું હતું કે, ઘણી વખત ગ્રાહક બિલમાં સર્વિસ ચાર્જ ભર્યા બાદ પણ બિલમાં જે ચાર્જ લાગશે તે ટેક્સનો ભાગ હશે તેવું વિચારીને તેઓ વેઇટરને અલગથી ટિપ આપે છે. તેમાં જે ફૂડ લખેલું હોય છે તેની કિંમત માનવામાં આવે છે કે આ સર્વિસ ફૂડના ભાવ સાથે સંકળાયેલી છે.