Yoga Day Special / ફક્ત 1 આસન ખાસ મંત્રો સાથે રોજ સવારમાં કરવાથી મળે છે આ અઢળક Benefits

જાણી લો સૂર્યનમસ્કારના સ્ટેપ્સ, તેની સાથે બોલાતા ખાસ મંત્ર અને દરેક સ્ટેપ્સથી થતા શરીરને ફાયદા વિશે.

1. ઓમ મિત્રાય નમઃ

રીત - દરી પર બંને પગ એકસાથે રાખીને સીધા ઊભા રહેવું. શ્વાસ ભરતા બંને હાથ છાતી પાસે નમસ્કાર મુદ્રામાં રાખો અને થોડીવાર આ સ્થિતિમાં રહો.

ફાયદા- શારીરિક અને માનસિક સંતુલન વધે છે. આંતરિક ચેતના જાગૃત થાય છે અને એકાગ્રતા વધે છે. 

2. ઓમ રવયે નમઃ (અર્ધચંદ્રાસન)

રીત - બંને પગ વચ્ચે ખભા જેટલું અંતર રાખો. શ્વાસ ભરતાંની સાથે કોણીમાંથી હાથ વાળ્યા વિના સીધા ઊંચા કરીને કમરથી પાછળ ઝૂકો. આ સ્થિતિમાં થોડું રહો અને મૂળ સ્થિતિમાં પાછા આવો.

ફાયદા- પેટ, પીઠ, પગના સ્નાયુઓ મજબૂત થશે, પાચનશક્તિ વધશે, કરોડરજ્જુ મજબૂત થશે અને આંતરડા મજબૂત થશે.

3. ઓમ સૂર્યા નમઃ (પાદહસ્તાસન)

રીત - ધીરે ધીરે શરીરને કમરમાંથી આગળ વાળો. આ સમયે શ્વાસ બહાર કાઢવાનો છે. બંને હાથની હથેળીને જે - તે પગની બાજુમાં મૂકો અથવા બંને પગના અંગૂઠા પકડો. ઘૂંટણમાંથી પગ સીધા રાખો. માથું ઘૂંટણને અડે તેવા પ્રયાસ કરો.

ફાયદા - પેટની ચરબી ઘટે, છાતી બળવાન બને, અશક્તિનો નાશ થાય.

4. ઓમ ભનાવે નમઃ (અશ્વસંચાલન)

રીત - ડાબા પગને પાછળ તરફ લંબાવો. તે પગના પંજાને અને ઘૂંટણને જમીન સાથે અડાવો. જમણા પગનો પંજો બંને હાથની હથેળી વચ્ચે જમીન પર રાખો. માથુ ઉપર તરફ થોડું પાછળ ઝૂકેલું રાખવું. આ સ્થિતિમાં શ્વાસ અંદર લેવાનું રાખો. 

ફાયદા- કબજિયાત દૂર થાય અને સાથે ગળાના રોગમાં પણ ફાયદો આપે છે.

5. ઓમ અગ્રાય નમઃ (દંડાસન)

રીત - જમણા પગને પાછળ તરફ લાવો. બંને પગ વચ્ચે ખભા જેટલું અંતર રાખો. નિતંબ થોડા ઉપર તરફ તથા માથું બંને હાથની વચ્ચે રાખવું. આ સ્થિતિમાં શ્વાસ બહાર કાઢતા રહો.

ફાયદા- શરીરની પાછળના ભાગના સ્નાયુઓ મજબૂત બને, હાથ-પગ, ફેફસાં મજબૂત થાય. પેટની ચરબી પણ દૂર થશે.

6. ઓમ પૂષ્ણે નમઃ (અષ્ટાંગ નમસ્કાર કે પીપીલીકાસન)

રીત - ઘૂંટણ, છાતી અને દાઢી જમીન સાથે અડાડો. નિતંબ અને કમર જમીનથી ઉપર રહેશે. આ સ્થિતિમાં શ્વાસનો રોકી રાખો.

ફાયદા - હાથ, ખભાના સ્નાયુઓ મજબૂત થાય. કરોડ સમ્યક બને અને શરીર હલકું રહે છે.

7. ઓમ હિરણ્યગર્ભાય નમઃ (ભૂજંગાસન)

રીત - શ્વાસ ભરતાંની સાથે પગના પંજા અને હથેળી હલાવ્યા વિના છાતી અને માથાને ઉપરની તરફ ખેંચો. હાથને કોણીથી સીધા રાખો. કમરથી શક્ય તેટલું પાછળ તરફ ઝૂકો.

ફાયદા - કરોડ મજબૂત થાય છે, થાઇરોઇડ ગ્રંથિને લગતા રોગોમાં અસરકારક છે. રક્તસંચારણ સારું થાય છે, ચહેરો તેજોમય બને, પેટના રોગો દૂર થાય.

8. ઓમ મરીચયે નમઃ (પર્વતાસન)

રીત - શ્વાસ બહાર કાઢતાં તે જ સ્થિતિમાં નિતંબને ઉપર ઉઠાવો. બંને પગના એડી, હાથની હથેળી જમીનને અડેલી રહેશે. માથું નીચે તરફ ઝૂકાવો.

ફાયદા- હાથ-પગ, ખભાના સ્નાયુ મજબૂત બને. માનસિક સંતુલનશક્તિ વધે. સંધિવા, લકવામાં ફાયદો રહે.

9. ઓમ આદિત્યાય નમઃ (અશ્વસંચાલન)

રીત - આ સ્થિતિ ચોથી સ્થિતિ જેવી છે. જમણા પગને આગળ તરફ લઇ જઇ બંને હાથની હથળી વચ્ચે મૂકો. કમરથી થોડા પાછળ તરફ ઝૂકો. માથું પર રહેશે. શ્વાસ અંદર રહેશે.

ફાયદા - નિતંબ, ખભા મજબૂત થાય અને કંઠરોગ દૂર રહે.

10. ઓમ સાવિત્રે નમઃ
આ આસન 3 નંબરના આસનની જેમ જ કરવું.

11. ઓમ અર્કાય નમઃ
આ આસન 2 નંબરના આસનની જેમ કરવું.

12. ઓમ ભાસ્કરાય નમઃ
આ આસન 1 નંબરના આસનની જેમ કરવું અને મૂળ સ્થિતિમાં આવી જવું.