14 વર્ષની કિશોરી પર રેપ કરીને ગર્ભવતી કરનાર આરોપીને જામીન આપવાનો ઈન્કાર કરીને બોમ્બે હાઈકોર્ટે એક મહત્વપૂર્ણ ટીપ્પણી કરી છે.
14 વર્ષની કિશોરી પર બળાત્કાર અને તેને ગર્ભવતી બનાવવાનો મામલો
DNA રિપોર્ટને આધારે આરોપીનો દાવો, તે ગર્ભસ્થ બાળકનો પિતા નથી
હાઈકોર્ટે ચુકાદો આપ્યો- રેપ કેસમાં DNA રિપોર્ટને નિર્ણાયક ન ગણી શકાય
હાઈકોર્ટે આરોપીના જામીન ફગાવ્યાં
બોમ્બે હાઈકોર્ટે 14 વર્ષની કિશોરી પર બળાત્કાર અને તેને ગર્ભવતી બનાવવાના આરોપમાં આરોપીને જામીન આપવાનો ઈનકાર કરી દીધો છે. સુનાવણી દરમિયાન આરોપીના વકીલે કોર્ટમાં ડીએનએ રિપોર્ટ રજૂ કરીને દાવો કર્યો હતો કે, આરોપી બાળકીના ગર્ભમાં રહેલા બાળકનો પિતા નથી, તેથી તેને જામીન આપવા જોઇએ. આરોપીની દલીલ સાંભળીને કોર્ટે કહ્યું કે રેપ કેસમાં ડીએનએ ટેસ્ટને નિર્ણાયક પુરાવા તરીકે ગણી શકાય નહીં, પરંતુ તે પુષ્ટિ આપનારો પુરાવો હોઈ શકે છે. ત્યારબાદ ખંડપીઠે આરોપીની અરજી ફગાવી દીધી હતી.
પીડિતા અને આરોપી બાજુબાજુમાં રહે છે
જસ્ટિસ ભારતી ડાંગરેએ કહ્યું કે, "ડીએનએ ટેસ્ટ મુજબ આરોપી બાળકનો પિતા ન હોય તો પણ તે પીડિતાને બદનામ ન કરી શકે. પીડિતાએ 164માં આપેલા પોતાના નિવેદનનો પુનરોચ્ચાર કર્યો છે કે અરજદારે તેની સાથે બળજબરીથી યૌન સંબંધ બાંધ્યા હતા.પોલીસની ચાર્જશીટ પ્રમાણે આરોપીએ પોતાના ઘરમાં કામ કરતી યુવતીના સંજોગોનો ગેરલાભ ઉઠાવ્યો હતો. પીડિતાના પરિવાર તરફથી નેરુલ પોલીસ સ્ટેશનમાં કેસ દાખલ કરવામાં આવ્યો હતો, ત્યારબાદ આરોપીની ધરપકડ કરવામાં આવી હતી. સગીરના માતા-પિતા ઝૂંપડપટ્ટીમાં રહે છે જ્યારે આરોપી બાજુની બિલ્ડિંગમા રહે છે.
આરોપીએ પોતાના ઘેર કિશોરી પર 10 દિવસ સુધી રેપ કર્યો
પીડિતાએ પોલીસમાં નોંધાવેલી ફરિયાદ અનુસાર, આરોપી અને તેની પત્ની ફેબ્રુઆરી 2020 માં તેમના 6 અને 1 વર્ષના બે બાળકોની સંભાળ રાખવા માટે કિશોરીને નોકરીએ રાખી હતી અને આ દરમિયાન આરોપીએ તેની સાથે બળજબરીથી યૌન સંબંધો બાંધ્યા હતા. ચાર મહિના બાદ જુલાઇમાં કિશોરીને પેટમાં દુખાવો થયો હતો. જ્યારે તેને પૂછવામાં આવ્યું તો તેણે જણાવ્યું કે આરોપીની પત્ની જ્યારે શહેરની બહાર ગઈ હતી ત્યારે આરોપીએ તકનો લાભ ઉઠાવીને 10 દિવસ સુધી બળાત્કાર ગુજાર્યો હતો.કિશોરીએ પોલીસને જણાવ્યું હતું કે આરોપીએ તેને ખાતરી આપી હતી કે તે તેની સાથે લગ્ન કરશે. આ પછી તેણે યુવતીને 200 રૂપિયા આપ્યા હતા અને ત્યારબાદ તેની સાથે દિવસમાં બે વાર શારીરિક સંબંધ બાંધ્યા હતા.
આરોપીની પત્નીએ ગર્ભપાત કરાવવાનો પ્રયાસ કર્યો
જાણકારી અનુસાર પરિવારજનોએ જ્યારે આરોપીઓ વિરુદ્ધ ફરિયાદ નોંધાવી તો તેમનો સંપર્ક આરોપીની પત્નીએ કર્યો હતો. તેણે પોતાની ભૂલ કબૂલી લીધી અને બાળકીની સારવાર કરાવવા કહ્યું. ત્યારબાદ આરોપીની પત્ની બાળકીને તેના માતા-પિતાની ગેરહાજરીમાં હોસ્પિટલ લઈ ગઈ હતી. તેણીને બે ઇન્જેક્શન અને ચાર ગોળીઓ મળી હતી પરંતુ તે ગર્ભપાત કરાવી શકી ન હતી.