નિવેદન / ડીકે શિવકુમારની ધરપકડ પર બોલ્યા રાહુલ ગાંધી, વિરોધીઓને નિશાન બનાવી રહી છે સરકાર

રાહુલ ગાંધીએ મોદી સરકાર પર આરોપ લગાવ્યો છે કે સરકાર તપાસ એજન્સીઓનો ઉપયોગ કરીને વિપક્ષના લોકોને નિશાન બનાવી રહી છે. રાહુલ ગાંધીએ ટ્વિટ કર્યું, 'ડી કે શિવકુમારની ધરપકડ ઇડી, CBI અને સત્તાપક્ષના પ્રભાવ વાળી મીડિયાનો ઉપયોગ કરી સરકાર તરફથી કરવામાં આવી રહેલી બદલાની રાજનીતિનું એક ઉદાહરણ છે.'

વર્ષ 2017માં ઇનકમ ટેક્સની રેડમાં ડી કે શિવકુમારના લગભગ 60 ઠેકાણાઓ પર દરોડા પાડવામાં આવ્યા હતા. આ દરમિયાન 11 કરોડ રૂપિયા કેશ મળ્યા હતા અને કરોડોની સંપત્તિ વિશે જાણવા મળ્યું હતું. ત્યારબાદ ઇડીએ ડીકે શિવકુમાર વિરુદ્ધ મની લોન્ડ્રિંગનો કેસ નોધ્યો હતો. 

The arrest of DK Shivakumar is another example of the vendetta politics unleashed by the Govt, using agencies like the ED/CBI & a pliant media to selectively target individuals.

#DKShivakumararrested

— Rahul Gandhi (@RahulGandhi) September 4, 2019

મની લોન્ડ્રિંગ મામલામાં ધરપકડ કરાયેલા કોંગ્રેસના દિગ્ગજ નેતા ડીકે શિવકુમાર (DK Shivakumar)ની જામીન અરજી કોર્ટે ફગાવતા એમને 13 સપ્ટેમ્બર સુધી EDની કસ્ટડીમાં મોકલી દેવાયા છે. ડીકે શિવકુમારની ઇડી (ED)એ મની લોન્ડ્રિંગના મામલામાં મંગળવારે ધરપકડ કરી હતી. 

ધરપકડ બાદ ડીકે શિવકુમારને રામ મનોહર લોહિયા હોસ્પિટલમાં મેડિકલ કરાવાયું હતું. ત્યારબાદ એમને કોર્ટમાં રજૂ કરાયા હતા. કોર્ટે ડીકે શિવકુમારને 13 સપ્ટેમ્બર સુધી ઇડીના રિમાન્ડમાં મોકલ્યા છે. આ દરમિયાન શિવકુમારના પરિવારજનો રોજ અડધો કલાક માટે મુલાકાત કરી શકે છે. કોંગ્રેસ નેતાના જામીન અરજી પર બાદમાં સુનાવણી થશે. ઇડીએ શિવકુમારના 14 દિવસની કસ્ટડીની માંગ કરી હતી. 

નોંધનીય છે કે ડીકે શિવકુમારને રોઉસ એવેન્યૂ કોર્ટમાં રજૂ કરવામાં આવ્યા હતા. ઇડીએ કોર્ટમાં કહ્યું હતું કે ડીકે શિવકુમારની મેડિકલ રિપોર્ટના હિસાબે તે બિલકુલ ઠીક છે. ઇડીએ કહ્યું કે પૂછપરછમાં તે સત્ય નથી બતાવી રહ્યા. અને સહયોગ નથી કરી રહ્યા. એમણે પોતાના પાવરનો ઉપયોગ કરીને ખોટી રીતે પૈસા બનાવ્યા છે. ઇડી તરફથી કહેવામાં આવ્યું છે કે એમણે મની લોન્ડ્ર્રિંગ કરી છે. 

જ્યારે બીજી તરફ ડીકે શિવકુમાર તરફથી વકીલ અભિષેક મનુ સિંઘવીએ દલીલ કરી હતી કે ઇડીએ એમની (ડીકે શિવકુમાર) 4 દિવસ સુધી લગભગ 30 કલાકથી વધારે પૂછપરછ કરી છે. એમનો આખો કેસ આયકર વિભાગ અને આઇટી વિભાગની સર્ચ પર આધારિત છે જે 2 ઓગસ્ટ 2017ના દિવસે કરાઇ હતી. ડીકે શિવકુમારે જામીન માટે પણ અરજી દાખલ કરી છે.