અમદાવાદમાં 50 ટકા લોકો સંપૂર્ણ વેક્સિનેટેડ થઇ ચૂક્યા છે ત્યારે હવે મનપા દ્વારા દિવાળી પહેલા 100 ટકા રસીકરણનો પ્રયાસ કરવામાં આવી રહ્યો છે. તો આ અંતર્ગત અમદાવાદમાં એક નવતર પ્રયોગ પણ શરૂ કરાયો છે.
અમદાવાદમાં રસીકરણ માટે સફળ પ્રયાસ
દિવાળી પહેલા 100 ટકા રસીકરણનો ટાર્ગેટ
95 ટકા લોકોને પ્રથમ ડોઝ અપાયો
કોરોના વૈશ્વિક મહામારી સામે લડવા માટે હાલ સૌથી મોટું હથિયાર હોય તો તે વેક્સિન છે. ભારતમાં હાલ મોટા પાયે વેક્સિનેશન ચાલી રહ્યું છે. વિશ્વમાં સૌથી વધારે વેક્સિન આજે ભારતમાં અપાઈ રહી છે. ત્યારે હવે અમદાવાદમાં વેક્સિનેશન માટે મનપા દ્વારા અનેક પ્રયાસ કરવામાં આવી રહ્યા છે. દિવાળી પહેલા 100 ટકા વેક્સિનેશનનો મનપાનો ટાર્ગેટ છે. અત્યાર સુધી 95 ટકા લોકોને પ્રથમ ડોઝ અપાઇ ચૂક્યો છે. તો 50 ટકા લોકોને વેક્સિનના બંને ડોઝ અપાયા છે. તો અમદાવાદ શહેરમાં શહેરમાં અત્યાર સુધી વેક્સિનનો પહેલો ડોઝ 45.75 લાખ અને બીજો ડોઝ 23.30 લાખને અપાયો છે. આમ શહેરમાં અત્યાર સુધી કુલ 69.05 લાખ લોકોનું વેક્સિનેશન થયું છે.
બે દિવસમાં લકી ડ્રો વિજેતાઓને ફોન આપવામાં આવશેઃ AMC
જોકે હજુ એવા કેટલાક લોકો છે જે વેક્સિન લેવા માટે આવતા નથી. ખાસ કરીને સ્લમ વિસ્તારમાં રસીકરણ મંદ ગતિએ ચાલી રહ્યું છે. ત્યારે અમદાવાદમાં એક નવતર પ્રયોગ શરૂ કરાયો છે. આ પ્રયોગના સફળ પરિણામ પણ મળ્યા છે. તો શું છે આ સફળ પ્રયોગ?
અમદાવાદમાં વેક્સિનેશનને અદભૂત પ્રતિસાદ મળી રહ્યો છે. અમદાવાદમાં વેક્સિનેશન વધારવા લકી ડ્રો સ્કીમ શરૂ કરાશે. લકી ડ્રોમાં વિજેતાઓને 25 સ્માર્ટ ફોન આપવામાં આવશે. હાલ સ્લમ વિસ્તારમાં વેક્સિન લેનારને ખાદ્યતેલ અપાઇ રહ્યું છે. તો આ અંગે AMCના આરોગ્ય અધિકારી ડો.ભાવિન સોલંકીએ જણાવ્યું હતું કે, હાલ 20 હજાર લિટર કરતા વધુ ઓઈલ આપવામાં આવી રહ્યું છે. બે દિવસમાં લકી ડ્રો વિજેતાઓને ફોન આપવામાં આવશે.