દિવાળી વેકેશન ૨૪ ઓક્ટોબરથી શરૂ થઈ રહ્યું છે ત્યારે કાંકરિયા લેકફ્રન્ટ ખાતે બાળકોને પ્રિય એવી મિની ટ્રેન, એમ્યુઝમેન્ટ પાર્ક અને બલૂન સફારીની રાઇડ ઠપ થઇ ગઇ છે. છેલ્લા દાયકા કરતાં વધુ સમયથી કાંકરિયા લેકફ્રન્ટ રાજ્ય બહારના સહેલાણીઓ માટે પણ આકર્ષણનું કેન્દ્ર બન્યું છે, પરંતુ પહેલી વાર કાંકરિયા લેકફ્રન્ટની રોનક ઝાંખી પડી છે. કાંકરિયાની મુલાકાતે જનારા સહેલાણી અને ખાસ કરીને બાળકોને આ વખતે નિરાશા થશે.
મેન્ટેનન્સના અભાવે બંધ છે ટ્રેન
50 ટકા સહેલાણીઓ ઘટ્યા
કાંકરિયા ફૂડકોર્ટમાં કાગડા ઉડે છે
ગત તા.14 જુલાઇ, 2019ના રોજ એમ્યુઝમેન્ટ પાર્ક-2માં 20 ફૂટથી વધુ ઊંચાઇથી ડિસ્કવરી રાઇડ તૂટી પડતાં બેનાં મોત થયાં હતાં અને 29 ઘાયલ થયા હતા. ડિસ્કવરી રાઇડ દુર્ઘટનાએ રાજ્યભરમાં ખળભળાટ મચાવ્યો હતો, જેના પગલે સત્તાવાળાઓ દ્વારા ગુજરાતભરની રાઇડની સેફટી ચકાસણી કરવાનો આદેશ અપાયો હતો. આના પગલે કાંકરિયા લેકફ્રન્ટના બંને એમ્યુઝમેન્ટ પાર્કને બંધ કરાયા છે. આગામી દિવાળીના સપરમા દિવસોમાં આ બંને એમ્યુઝમેન્ટ પાર્ક ફરી ધમધમતા થાય તેવી શક્યતા નહીંવત્ છે.
સ્વર્ણિમજયંતી એક્સપ્રેસ ટ્રેન સપ્ટેમ્બર-2010માં લોકોના આકર્ષણનું કેન્દ્ર બની
બાળકો અને વયસ્કો માટે અટલ એકસપ્રેસ ટ્રેન અને સ્વર્ણિમજયંતી એક્સપ્રેસ ટ્રેનની સફર પણ હંમેશાં આહ્લાદક રહી છે. અટલ એકસપ્રેસ ટ્રેન પહેલાં કાર્નિવલ વખતે ખુલ્લી મુકાઇ હતી, જ્યારે સ્વર્ણિમજયંતી એક્સપ્રેસ ટ્રેન સપ્ટેમ્બર-2010માં લોકોના આકર્ષણનું કેન્દ્ર બની હતી.
મેન્ટેનન્સના અભાવે બંધ છે ટ્રેન
જોકે આ બંને મિની ટ્રેનને મેન્ટેનન્સના અભાવે ઘસારો પહોંચ્યો છે અને પાટા પણ ઘસાયા હોઇ છેલ્લા પાંચ-છ મહિનાથી તે પણ બંધ છે, જોકે હવે તેનું રિપેરિંગ શરૂ કરાયું છે, પરંતુ દિવાળીના તહેવારોમાં મિની ટ્રેનની મોજ માણી શકાશે કે કેમ તે મોટો પ્રશ્ન છે. કાંકરિયામાં અત્યારે ફક્ત બોટિંગનો આનંદ મળે છે.
બલૂન તો ચાલુ થયુ ત્યારથી બંધ
બીજી તરફ સહેલાણીઓ બલૂન સફારી રાઇડની પણ કાંકરિયા લેકફ્રન્ટમાં આનંદભેર મોજ માણતા રહ્યા છે, પરંતુ આ બલૂન પણ લાંબા સમયથી બંધ પડ્યું હોઇ સહેલાણીઓ તેની સફર કરી શકતા નથી.
50 ટકા સહેલાણીઓ ઘટ્યા
કાંકરિયા લેકફ્રન્ટમાં આ તમામ મહત્ત્વના આકર્ષણ ઠપ હોઇ સહેલાણીઓ દેખીતી રીતે ઓછા થયા છે. અત્યારે 50 ટકા સહેલાણી ઘટ્યા છે એટલે કે રોજના માંડ ચારથી પાંચ હજાર સહેલાણી લેકફ્રન્ટની મુલાકાત લે છે, જ્યારે સામાન્ય દિવસોમાં તેની સંખ્યા સાતથી આઠ હજાર અને શનિવાર-રવિવારમાં 15 થી 25 હજાર સુધીની તંત્રમાં નોંધાઇ છે.
કાંકરિયા ફૂડકોર્ટમાં કાગડા ઉડે છે
કાંકરિયા લેકફ્રન્ટની રોનક ઝાંખી પડવાથી બાલવાટિકા પાસેનાં 26 ફૂડ કોર્ટ અને ઝૂ પાસેનાં 29 ફૂડકોર્ટ મળીને કુલ 45 ફૂડકોર્ટના વેપારી ગ્રાહકોના અભાવે બગાસાં ખાતા થઇ ગયા છે. દિવાળીના તહેવારોમાં 25 થી 30 હજાર સહેલાણીઓ રોજના કાંકરિયા લેકફ્રન્ટ ખાતે ઊમટે છે અને તેનાથી મ્યુનિ. તિજોરીને રૂ. ચારથી પાંચ લાખની આવક થાય છે, જોકે હવે આ આવકનું પ્રમાણ અને સહેલાણીની સંખ્યા દિવાળીમાં જાળવી રાખવાનું તંત્ર માટે પડકારરૂપ બનશે.
આકર્ષણો તો બનાવ્યા હતા પણ સાચવી ન શક્યા
અત્રે ઉલ્લેખનીય છે કે, વર્ષ 2006માં કાંકરિયા લેકફ્રન્ટ ડેવલપમેન્ટ પ્રોજેક્ટ હેઠળ તેના નવનિર્માણની કાર્યવાહી શરૂ કરાઇ હતી, જે ડિસેમ્બર-2008માં પૂરી થતાં તે વર્ષે અવિસ્મરણીય એવા પ્રથમ કાંકરિયા કાર્નિવલનું આયોજન કરી કાંકરિયા લેકફ્રન્ટ લોકો માટે ખુલ્લો મુકાયો હતો. ત્યારબાદ મ્યુનિસિપલ કોર્પોરેશનના સત્તાવાળા દ્વારા તબક્કાવાર અટલ એક્સપ્રેસ બાદ સ્વર્ણિમજયંતી એક્સપ્રેસ ટ્રેન, બલૂન સફારી રાઇડ, કિડ્સ સિટી, એમ્યુઝમેન્ટપાર્ક વગેરે આકર્ષણ સહેલાણીઓ માટે ઉમેરાયાં હતાં.