સિદ્ધિ / ગુજરાતની દિવ્યાંગ દીકરીએ રાષ્ટ્રીય કક્ષાએ નામ કર્યું રોશન, જીત્યા 16 મેડલ

• દિવ્યાંગ વેદાંશીની દિવ્ય સિદ્ધિ 
• ગોળા ફેંક અને બરછી ફેંકમાં ગોલ્ડ મેડલ
• 16 મેડલ હાંસિલ કરી ચૂકી છે વેદાંશી 

આણંદના પીપળાવ ગામની વેદાંશી પટેલ જેનો જન્મ તો દિવ્યાંગતા સાથે થયો હતો. પરંતુ તેને આસમાનની ઊંચાઈઓ સુધી પહોંચતા તેનું દિવ્યાંગતા પણું રોકી શક્યું ન હતું. આ દીકરીએ અભ્યાસની સાથે-સાથે રમત-ગમતમાં અનેરી સિદ્ધિ હાંસલ કરી છે. જેને ગોળા ફેંક અને બરછી ફેંકમાં તાલુકા, જિલ્લા અને રાજ્ય કક્ષાએ મેડલ જીતીને આણંદનું નામ તો રોશન કર્યું જ છે.  સાથે-સાથે 17મી નેશનલ પેરા ઓલિમ્પિરમાં પણ ત્રણ ગોલ્ડ મેડલ હાંસિલ કરીને ભારતમાં પણ ગુજરાતનું નામ રોશન કર્યું છે.

17મી નેશનલ પેરા ઓલિમ્પિરમાં ત્રણ ગોલ્ડ મેડલ મેળવ્યા

જન્મ કેવા રંગરુપ, આકાર અને તકલીફો સાથે થશે તે માણસના હાથમાં નથી. પરંતુ જન્મ પછી તકલીફોને અવગણી સિદ્ધિ મેળવવીએ માણસના હાથમાં હોય છે જે આણંદ પંથકની દિવ્યાંગ દીકરીએ સાર્થક કરી બતાવ્યું છે. વેદાંશી દિવ્યાંગતા સાથે જન્મી હોવાથી માતા-પિતા પણ વેદાંશીના ભવિષ્યને લઈને ચિંતિત હતા. વેદાંશી સામાન્ય જીવન જીવે તે માટે તેના માતા-પિતાએ અનેક હોસ્પિટલોમાં તેની સારવાર કરાવી હતી.પરંતુ કોઈ પરિણામ મળ્યું ન હતું. આથી અંતે પરિવારજનોએ કુદરત પર બધું છોડી દીધું હતું. તેવામાં કુદરતે વેદાંશીને સિદ્ધિનો માર્ગ બતાવ્યો હોય તેમ 17મી નેશનલ પેરા ઓલિમ્પિરમાં પણ ત્રણ ગોલ્ડ મેડલ મેળવ્યા છે ઉપરાંત  વેદાંશી 16 મેડલ પણ હાંસિલ કરી ચૂકી છે.

વિશ્વ લેવલે ગુજરાત અને દેશનું નામ રોશન કરવાનું સપનું

આજે તેની સફળતાને જોઈને તેના માતા-પિતા પણ ખુશ છે. એવી લાગણી વ્યક્ત કરી રહ્યા છે કે, કદાચ કુદરતે વેદાંશીને આ સિદ્ધિ માટે આ સ્વરૂપમાં જન્મ આપ્યો છે.વેદાંશીએ રાષ્ટ્રીય સ્તરે તો ગુજરાતનું નામ રોશન કર્યું જ છે. પરંતુ હવે તેનું સપનું વિશ્વ લેવલની રમતોમાં ભાગ લઈને ગુજરાત અને દેશનું નામ રોશન કરવાનું છે. ત્યારે વેદાંશીનું આ સપનું પણ પૂર્ણ થાય અને તે વિશ્વકક્ષાએ સિદ્ધિ હાંસિલ કરે તેવી શુભેચ્છા વર્ષા થઈ રહી છે.