આક્ષેપ / છૂટાછેડા થઇ ગયાનું ખોટું બોલીને ફૂલહાર કરી બીજા લગ્ન કર્યા : વડોદરા ફાયર વિભાગના ઓફિસર સામે દુષ્કર્મની ફરિયાદ

• વડોદરા ફાયર વિભાગના ઓફિસર સામે દુષ્કર્મની ફરિયાદ
• માંજલપુર પોલીસ સ્ટેશનમાં યુવતીએ નોંધાવી ફરિયાદ
• પત્ની સાથે છૂટાછેડા થયા હોવાનું જણાવી યુવતીને પ્રેમજાળમાં ફસાવી

વડોદરા ફાયર વિભાગના વિવાદિત ઓફિસર નિકુંજ સામે દુષ્કર્મની ફરિયાદ દાખલ કરવામાં આવતા ચકચાર મચી જવા પામી છે. ભોગગ્રસ્ત પીડિતાએ વડોદરાના માંજલપુર પોલીસ સ્ટેશનમાં ફાયર ઓફિસર વિરુદ્ધ ફરિયાદ દાખલ કરાવી છે. નોંધનિય છે કે, વિવાદિત ઓફિસર નિકુંજ અગાઉ પણ દારૂના નશાના પ્રકરણમાં પોલીસ ચોપડે ચડી ચૂક્યો છે. તેવામાં ધગધગતા આરોપ સાથે વધુ એક ફરિયાદ દાખલ થતા સવાલો ઊભા થાય છે. 
 
વડોદરા ફાયર વિભાગના ઓફિસર સામે દુષ્કર્મની ફરિયાદ
પીડિતએ માંજલપુર પોલીસ સમક્ષ ફરિયાદમાં જણાવ્યુ કે, આરોપી નિકુંજે પોતાની પત્ની સાથે છૂટાછેડા થયા હોવાનું જણાવી ખોટું બોલી પ્રેમજાળમાં ફસાવી હતી. જે બાદ તે યવતીને ગોવા અને અમદાવાદ ફરવા લઈ ગયો હતો જે દરમિયાન ગોવા, અમદાવાદ સહિતના સ્થળોએ હોટલમાં લઈ જઇ અનેક વખત શારીરિક સંબંધ બાંધ્યા હતા. એટલું જ નહી આરોપી નિકુંજે અંગત પાળોનો વીડિયો પણ બનાવી લીધો હતો. ત્યારબાદ નિકુંજ સાથે તેની પત્નીના છૂટાછેડા ન થયા હોવાનું સામે આવતા ઓફિસર વિરુદ્ધ દુષ્કર્મની ફરિયાદ નોંધાવી છે. વધુમાં પત્ની હોવા છતાં યુવતી સાથે નિકુંજે ફૂલહાર કરી બીજા લગ્ન કર્યા હોવાનો પણ ફરિયાદમાં ઉલ્લેખ કરાયો છે.

અગાઉ દારૂના નશામાં ધમાલ કરી હોવાની ફરિયાદ પણ થઇ હતી 
દુષ્કર્મની ફરિયાદ સાથે જ ફાયર ઓફિસર નિકુંજ મનમાની ચાલાવી ફાયર બ્રિગેડની એમ્બ્યુલન્સનો આડેધડ દુરૂપયોગ કરતાં હોવાનો અને જાસૂસી કરવાના ઇરાદે પોતાના ઘરમાં કેમેરા લગાવ્યા સહિતના સણસણતા આક્ષેપો કર્યા છે. આ મામલે પોલીસે ફરિયાદ નોંધી કાર્યવાહી અગાળ ધપાવી છે. ઉલ્લેખનીય છે કે, નિકુંજ વિરુદ્ધ અગાઉ દારૂના નશામાં ધમાલ કરી હોવાની ફરિયાદ પણ નોંધાઈ ચૂકી છે.