અમદાવાદ: અમેરિકાથી ડીપોર્ટ થયેલા એનઆરઆઇ યુવકે તેની પત્નિને દર મહિને નક્કી કરેલા 55 હજાર રુપિયા ભરણ પોષણ પેટે નહી આપતા છેલ્લા એક વર્ષથી તે નાસતો ફરે છે. મેટ્રોપોલીટીન કોર્ટે યુવકને 135 દિવસની સજા ફરમાવી હતી જે પુરી થયા બાદ તે નાસી ગયો છે.
અંદાજીત છ મહિના પહેલા અડાલજ પાસે યુવકે તેની ક્રેટા કાર ડીવાઇડર સાથે અથડાઇને અકસ્માત સર્જયો હતો જેમાં હજુ સુધી તે કાર છોડાવવા માટે પણ નથી ગયો. અકસ્માત બાદ યુવક નાસી જતા તેની કાર હજુ સુધી ઘટના સ્થળે છે. પોલીસે કાર ચાલકને શોધવા તજવીજ શરૂ કરી છે. આ હાઇપ્રોફાઇલ કેસમાં યુવકે તેની પત્નિને 17 લાખ રુપિયા ભરણપોષણ પેટે આપવાના છે.
મેમનગર વિસ્તારમાં આવેલ જયશ્રી અંબિકાપાર્ક બંગલોમાં રહેતી ધર્મીષ્ઠાબેન પટેલના લગ્ન 14 વર્ષ પહેલા વિનોદભાઇ જશુભાઇ પટેલ સાથે અમેરિકાના શિકાગોમાં થયા હતા. બન્ને જણા અમેરિકામાં પોતાનો પેટ્રોલપંપ ચલાવતા હતા. કોઇ કારણોસર બે વર્ષ પહેલા ધર્મીષ્ઠાબેન પર વિનોદભાઇએ રીવોલવર ટાંકીને જાનથી મારી નાંખવાની ધમકી આપી હતી. જેમાં ધર્મીષ્ઠાબેન વિનોદભાઇ વિરુધ્ધમાં ફરિયાદ કરતા અમેરિકા પોલીસ તેની ધરપકડ કરીને 45 દિવસ સુધી જેલમાં રાખ્યો હતો.
જેલમાં છુટીને અમેરિકા પોલીસે તેને ડીપોર્ટ કર્યો હતો જેના એક મહિના બાદ ધર્મીષ્ઠાબેને 85 લાખ રુપિયામાં પેટ્રોલપંપ વેચી મારીને બાળકો સાથે અમદાવાદ સાસરીમાં આવી ગયા હતા. સાસરીમાં આવી ગયા બાદ વિનોદ અવારનવાર ધર્મિષ્ઠાબેન સાથે મારઝુડ કરતો હતો. ગતવર્ષે વિનોદભાઇ અને ધર્મિષ્ઠાબેન ગોતા રોડ પર આવેલી ગોદરેજ ગાર્ડન સીટીમાં રહેવા માટે આવી ગયા હતા. જ્યાં તારીખ 22-7-16 ના રોજ વિનોદભાઇએ ધર્મિષ્ઠા બેનને જાહેરમાં મારામાર્યો હતો.
આ ઘટનામાં ધર્મીષ્ઠાબેને મેટ્રોપોલીટીન કોર્ટમાં ડોમેસ્ટીક વાયોલન્સ એક્ટ હેઠળ ફરિયાદ કરી હતી અને વચગાળાના ભરણપોષણ માગ્યુ હતું. દરેક પુરાવા તપાસતા મેટ્રોપોલીટીન કોર્ટે દરમહિને 55 હજાર રુપિયા ભરણપોષણના આપવા માટે વિનોદભાઇને આદેશ કર્યા હતા. વિનોદભાઇ ભરણ પોષણ નહીં આપતા કોર્ટે તેને 135 દિવસની સજા કરીને જેલના હવાલે કર્યો હતો. જેલમાંથી છુટીને આવ્યા બાદ પણ ભરણપોષણ નહી આપતા તે નાસી ગયો હતો. છેલ્લા એક વર્ષથી તે ફરાર રહેતા 16 લાખ રુપિયા ભરણપોષણ ધર્મિષ્ઠાબેનને આપવાનું છે.
ઉલ્લેખનીય છે કે વિનોદ પોતાની ક્રેટા કાર લઇને છ મહિના પહેલા અડાલજથી આવતો હતો. ત્યારે તેને સ્ટીયરીંગ પરનો કાબુ ગુમવતા કર ડીવાઇટર સાથે અથડાઇ હતી. કાર અથડાતાની સાથે જ વિનોદ નાસી ગયો હતો. ભરણપોષણના કેસમાં ધરપકડના થાય તે માટે હજુ સુધી વિનોદ કાર લેવા માટે જતો નથી.