દીવ-દમણ બેઠકને લઇને કોંગ્રેસે જાહેર કર્યું નામ, ફરી જોવા મળશે 2014 જેવો જંગ...

દમણ-દીવ લોકસભા બેઠક માટે કોગ્રેસ પાર્ટીએ ઉમેદવારની જાહેરાત કરી છે. આ વખતે ફરીવાર કોંગ્રેસે દમણ-દીવ લોકસભા બેઠક પર પાર્ટીના પ્રદેશ પ્રમુખ કેતન પટેલ પર પસંદગી ઉતારી છે અને કેતન પટેલને આ વખતે ચૂંટણી જંગમાં ઉતાર્યા છે. કોંગ્રેસે જાહેર કરેલી યાદીમાં ઉમેદવાર તરીકે કેતન પટેલનું નામ જાહેર થતાં જ તેમના સમર્થકોમાં ઉત્સાહનો માહોલ જોવા મળ્યો.



મહત્વપૂર્ણ છે કે કેતન પટેલ 2014માં પણ લોકસભા ચૂંટણીમાં કોંગ્રેસના ઉમેદવાર હતા. જોકે 2014 માં ભાજપના ઉમેદવાર અને વર્તમાન સાંસદ લાલુભાઇ પટેલ સામે કેતન પટેલની હાર થઈ હતી. ત્યારે ફરી એક વખત પાર્ટીએ કેતન પટેલ પર વિશ્વાસ મૂકી 2019ની ચૂંટણી જંગમાં ઉતાર્યા છે.



આમ 2019ની ચૂંટણીમાં પણ દમણ-દીવ બેઠક પર ફરી એક વખત 2014ના જ ભાજપ અને કોંગ્રેસના બંને ઉમેદવારો સામ સામે ટકરાશે. ઉમેદવાર જાહેર થયા બાદ VTV ગુજરાતીએ દીવ-દમણના કોંગ્રેસના ઉમેદવાર કેતન પટેલ સાથે એક્સક્લુઝીવ વાત કરી હતી.



જેમાં તેઓએ 2014ની ચૂંટણીમાં જે ભૂલને કારણે હાર થઈ હતી એવી ભૂલ ફરી વખત નહિ થાય તેનું ધ્યાન રાખીને આ વખતે પૂરા જોશ સાથે કોંગ્રેસ લોકો સમક્ષ જશે અને આ વખતે 2019ની ચૂંટણીમાં જંગી લીડથી દીવ-દમણ લોકસભા બેઠક પર જીત મેળવશે તેવો આત્મવિશ્વાસ વ્યક્ત કર્યો હતો.