વિવાદ / વોટના બદલે નોટોની લ્હાણી! કોંગ્રેસના પ્રભુત્વવાળી બેઠક પર ભાજપનો વધુ એક VIDEO વાયરલ થતા ખળભળાટ

• વિધાનસભાની ચૂંટણી પહેલા નોટોની લ્હાણી!  
• અમીરગઢના સુરેલા ગામે ભાજપની સભામાં પૈસાનું વિતરણ 
• કાર્યકર્તાઓ લોકોને રૂપિયા આપતા હોવાનો વીડિયો વાયરલ

ગુજરાત વિધાનસભાની ચૂંટણીનું પ્રથમ તબક્કાનું મતદાન આવતીકાલે થવા જઈ રહ્યું છે. મતદાનને ગણતરીની કલાકો જ બાકી છે. એવામાં ચૂંટણી પહેલા વાયરલ થયેલા એક વીડિયોથી ગુજરાતનું રાજકારણ ગરમાયું છે. આ વીડિયોમાં કેટલાક લોકો રાત્રીના સમયે રૂપિયાનું વિતરણ કરતા દેખાઈ રહ્યા છે.   

વીડિયો સોશિયલ મીડિયા પર વાયરલ 
ગુજરાત વિધાનસભાની ચૂંટણીમાં નેતાઓ મત માટે અનેક પ્રકારના હથકંડા અપનાવતા હોય છે. કોઈક સાડીની લ્હાણી કરે છે તો કોઈક નોટોની લ્હાણી કરે છે, ત્યારે હાલ એક વીડિયોથી ગુજરાતનું રાજકારણ ગરમાયું છે. જેમાં કેટલાક લોકો રાત્રીના સમયે રૂપિયાનું વિતરણ કરતા જોવા મળી રહ્યા છે. આ વીડિયો દાંતા વિધાનસભા વિસ્તારનો હોવાનું કહેવામાં આવી રહ્યું છે. એવું કહેવાઈ રહ્યું છે કે અમીરગઢના સુરેલા ગામે ભાજપ સભામાં કાર્યકરો દ્વારા પૈસાનું વિતરણ કરવામાં આવ્યું હતું. જોકે, આ વીડિયોની VTV ન્યૂઝ પુષ્ટી કરતું નથી. 

ગતરોજ દાખલ થઈ હતી ફરિયાદ
આપને જણાવી દઈએ કે, ગતરોજ પણ દાંતા પંથકનો એક વીડિયો વાયરલ થયો હતો, વાયરસ વીડિયોમાં આદિવાસી લોકોને ખુલ્લેઆમ નીતે બેસાડીને રૂપિયા વહેંચવાનો વીડિયો વાયરલ થયો હતો. આ વાયરલ વીડિયોમાં દાંતાનાં ભાજપનાં અગ્રણી એલ.કે બારણ પણ ફરતા જોવા મળ્યા હતા. ભાજપ કાર્યકર પૈસા આપતા વીડિયો પર ફરિયાદ દાખલ થઈ હતી. આ ફરિયાદ બાદ ફરી એક આવો વીડિયો વાયરલ થતા ખળભળાટ મચી ગયો છે. 

સળગતા સવાલો
- ચૂંટણીપંચ ઉમેદવાર વિરુદ્ધ કાર્યવાહી કરશે?
- શું રૂપિયા આપ્યા વિના વોટ લેવામાં નેતા સક્ષમ નથી?
- રૂપિયા લઇને ધારાસભ્ય બનનારા લોકોના કામ કરશે?
- શું જનતા રૂપિયાની લાલચમાં વોટ વેંચી દેશે?